لسه شارى فيلشيا وفيها شويه مشاكل

**dr_medoo** · 17-07-2014 08:00 PM

انا لسه شارى عربيه سكودا فليشيا موديل 97
العربيه على طول المروحه شغاله وما بتفصلش غير حاجات بسيطه الحرارة حلوة مش بتسخن بس على طول المروحه شغاله
تانى حاجه العربيه صوتها عالى
تالت حاجه العربيه البور يغتبر مفيش غيرت الزيت طلع وسخ والميكانيى قالى الزيت هيتغير تانى هفيره واشوف هتضبط ولا لا

**kantofanto** · 17-07-2014 09:09 PM

المشاركة الأصلية كتبت بواسطة dr_medoo

انا لسه شارى عربيه سكودا فليشيا موديل 97
العربيه على طول المروحه شغاله وما بتفصلش غير حاجات بسيطه الحرارة حلوة مش بتسخن بس على طول المروحه شغاله
تانى حاجه العربيه صوتها عالى
تالت حاجه العربيه البور يغتبر مفيش غيرت الزيت طلع وسخ والميكانيى قالى الزيت هيتغير تانى هفيره واشوف هتضبط ولا لا

الف مبروك ربنا يبارك لك و فيها و يكفيك شرها ، ممكن تقولنا سعرها السوقى كام و عاملة كام كيلو.
روح للكهربائى خليه يبصللك على المروحة و يشوف لحضرتك له مش بتفصل، و يفضل كمان لو تغسل الرادياتير عشان السخونة ، الصوت العالى ده منين من الماتور و لا من تحت العربية ؟؟؟

**ahmedfouad** · 17-07-2014 11:18 PM

ممكن المروحة تكون متوصلة دايركت وده غلظ
وممكن صباع الحرارة يكون مش بتاعها وبيشتغل على درجة حرارة قليلة
يعنى لو الاصلى بيوصل الدائرة على 90 درجة
ممكن الراكب يكون 80 درجة مثلاً..
راجع عليه وبيكون مكتوب عليه الدرجة بتاعنه لما بيتفك
ولو بتاعها والمروحة شغالة دايركت لازم تظبط الكلام ده
لان المروحة هتنتهى كده
وفك المروحة فك الريش واعملها صيانة ولو محتاجة رولمان بلى غيره
لانها على الهلك ده اكيد محتاجة تفوق
وربنا يباركلك فيها والف مبرووك
وابقى قلنا عملت ايه

بالنسبة لصوت الموتور ممكن بلية دينمو
او اى بلية خشنة فى الموتور
والميكانيكى سهل يكشف عليها
وربنا معاك

**ابوابراهيم323** · 18-07-2014 01:40 AM

المشاركة الأصلية كتبت بواسطة kantofanto

الف مبروك ربنا يبارك لك و فيها و يكفيك شرها ، ممكن تقولنا سعرها السوقى كام و عاملة كام كيلو.
؟

الف مبروووك أخى الكريم ضرورى تقول مواصفات العربية وسعرها لانى ناوى أبيع

**dr_medoo** · 18-07-2014 05:11 AM

الف شكر لكل الى رد العربيه بصراحه انا واخدها من واحد معرفه فالسعر مش هيفيدكم لانى فى بينى وبينه حسابات تانيه
وان شاء الله هحاول اروح للميكانيكى يشوف الى الى فيها لانى عاوزها تفوق شويه علشان تستحمل معاى

**kantofanto** · 18-07-2014 05:16 AM

المشاركة الأصلية كتبت بواسطة ابوابراهيم323

الف مبروووك أخى الكريم ضرورى تقول مواصفات العربية وسعرها لانى ناوى أبيع

ياباشا ربنا يبارك لك فيها يارب و تتمتع بيها و بخيرها الحاات اللى بتكلم فيها دى تضبط مفيش اى مشكلة خالص ، انا مش قصدى اسالك حضرتك عشان تبيعها و الله ، انا كنت حابب اعرف تمنها لان واحد صاحبى داخلها فى دماغه اووى و ايز يشتريها فانا بقنعه يشترى فورد عشان كدا سألت و اسف لو ضايقتك من سؤالى

**أحمد جودة** · 19-07-2014 08:06 AM

الف مبروك وأهلا بيك

أولا للعلم الفليشيا بطبيعتها صوت الموتور خشن وأعلي من صوت العربيات التانية فدة ممكن يكون طبيعي .... أما بالنسبة لموضوع المروحة فتعالي نقول انك متعرفش حاجة عن صيانتها (( يعني متعرفش اللى قبلك عمل لها صيانة اخر مرة امتي ))

طبعا الاول هتكشف على الزيت ولو محتاج تغيير هوة والفلتر وفلتر البنزين والهواء وطاقم بوجيهات

بالنسبة للمروحة يفضل تغسل دورة التبريد الاول وبعدن تشوف الثرموستات احتمال يكون 80 علشان كدة المروحة شغالة أغلب الوقت

مرة تانية أهلا بيك