الحمد لله اشتريت ماروتي 2011 ماشية 13000 بس (اول عربية ليا)

العربية ماشاء الله موتورها ممتاز والسحب بتاعها أكثر من ممتاز (طبعا بالنسبة لحجم الموتور)
بحطلها بنزين 92 (بقى غالي بطريقة بشعة)
اول كام يوم كنت بقرص على الموتور شوية فكانت بتشرب البنزين (حوالي 12 كيلو في اللتر)
بعد اول تفويلة اتعلمت الادب بعد ما دفعت وبدءت اسوق بطريقة محترمة شوية وما اقرصش الا عند اللزوم بس وحسبت الاستهلاك حوالي 15 كيلوا في اللتر ولله الحمد
امبارح روحت رصصت العجل كله من الاول لان كان فيه عجل مش مترصص واشتريت فردة كاوتش استبن جديدة (بداية المصاريف 300)
الاتزان بتاع العربية ضايع بعد سرعة 90 والهوا بيفسحها يمين وشمال
وطبعا الفرامل عند 100 ما تنتظرش منها حاجة
حجمها الصغير مخليها تحفة في الغرز وفي الزحمة وتعرف تهرب بيها من رخامة الميكروباصات ورمية البوز اللي بيعملوها في التقاطعات والزحمة وتحشرها في اي حتة
وطبعا في الركنات اي مكان ترميها فيه زي الفل

بس عندي شوية ملاحظات وعايز اخد رأيكم فيها:
- العربية بترجرج عند الغيار الاول مع بداية الطلعة وفي الزحمة مع العلم اني مسخنها كويس
- الفتيس ساعات بيعض
- وانا ببطلها ساعات مش بتبطل علطول بتأخر ثانية وترجرج جامد وبعدين تبطل (اعتقد بيبقى غالبا ساعتها مروحة الردياتير شغالة)
- الراجل بتاع الترصيص قاللي عايزة ضبط زوايا وبدور على حد يعملها خصوصا ان جنطها 12
- للاسف مافيش معاها كوريك فياريت لو حد يفيدني سعر الكوريك كام والاقيه فين (تمساح طبعا)
- واضح ان كان فيها كاسيت محترم واتشال وباقي كابلات مدلدلة لحد لدواسات ومكشوفة
- فيها من ورا كابل مدلدل في الشارع ما اعرفش بتاع ايه ورا النمرة بتاعتها

كفاية كدة المرة دي
هي كلها حاجات صغيرة وانا عموما مبسوط من اداءها والموتور بتاعها