كل واحد يحكى حكاية نصب اتعرضلها فعلا فى شراء العربيات عشان الكل يستفيد ونحارب النصب

**amrico** · 18-10-2008 09:37 AM

السلام عليكم ورحمة الله

للأسف الشديد ونظرا لقلة ضمير بعض تجار السيارات وخصوصا فى المستعمل بنلاقى حوادث نصب فظيعة جدا والتجار بيعتمدوا ساعات على قلة خبرة المشترى، انا نفسى كل واحد من الأعضاء يقولنا على موقف حصل ليه أو لحد من معارفه وكان موقف نصب فى شراء عربية، واتوقع ان معظم الشباب هنا فى المنتدى عندهم خبرة كبيرة فى البيع والشرا، وحتى اللى ميعرفش اهو هايعرف من القصص اللى هايقراها هما عشان الناس تاخد بالها ونحارب النصب والناس اللى معندهمش ضمير!!!!!

ولو سمحتولى ابدأ بقصة حصلتلى فعلا بس الحمد لله كانت نهايتها سعيده بالنسبة لى وربنا انقذنى!!

من حوالى اربع سنين كده كنت رايح اشترى عربية سوزوكى سويفت موديل 93 وكان معايا واحد صاحبى عنده خبرة حلوة فى العربيات
انا طبعا كنت مبسوط من العربية وشكلها كان جميل
المهم صاحبى قعد يفحص الكبوت والشنطة والأبواب ومش لاقى حاجة خالص تقول ان العربية مرشوشة عشان حادثة أو عاملة حادثة أصلا
بس لقيت صاحبى بيعمل حاجة غريبة !!!
لقيته بيمشى بعيد لحد أول الشارع ويبص على العربية من بعيد وبعدين يرجع
وبعدين يرجع اول الشارع وهكذا
ولقيته بيقول للراجل ممكن نشوف العربية دى عند سمكرى
الراجل اتعصب وقاله ده اوتومبيل غشيم والعربية جديدة و و و ......
المهم اتفقنا نروح لواحد قريب
فقالى خد سوق انت العربية واحنا رايحين عشان تجربها
قلتله لأ سوقها انت !!!
سبحان الله والراجل لسه طالع من الشارع خبط فى موتوسيكل والأكصدام اللى قادم وقع (عشان نيته اللى زى وشه)
المهم حلينا المشكلة مع الراجل بتاع الموتوسيكل وقلناله العربية بتاعتنا دى حاجة بسيطة

وصلنا للسمكرى ، الراجل بعد فترة قالنا العربية دى مركبة نص يعنى عربية نصين
واللى مركبة محترف جدا وورانا أماكن اللحام

الراجل مقدرش ينكر طبعا وقعد يقول الحاجة اللى راكبة استيراد وانضف من اللى هنا

صاحبى قالى انه كان شاكك فى اللون وكان من بعيد بيبان ان النص اللى قدام باهت حاجة بسيطة جدا عن النص اللى ورا زى مايكون اتعرض للشمس أكتر

الحمد لله ربنا سترها معايا فى اليوم ده ومشربتش المقلب

أسف للإطالة

والسلام عليكم ورحمة الله

أخوكم عمرو

**elmadawy** · 25-10-2008 08:13 PM

ايه يا جماعه مفيش ولا واحد اتعرض لعمليه نصب والله ديه حاجه جميله يظهر ان مصر مافيهاش عمليات نصب حاليا وشكرا

**calipha3** · 27-10-2008 04:53 PM

مصر بخير :angelsad2:

**askoda** · 27-10-2008 05:10 PM

la2 fi keteeeer
bas shwya keda welnaas hatefteker

asl kol wa7ed by7awel yensa enno etnasab 3alih fi yom mn elayaam

:)

**tarekx** · 29-10-2008 06:28 PM

اوعي تفكر تودي عربيتك لاي شركه توريدات او تأجر لاي شخص منغير سواق لانهم سرقوا عربيات كتير اوي وكانوا عاملين مكاتب وهميه وانا اعرف ناس كتير اوي ودوا عربيتهم شركات يأجروها واتنصب عليهم والشركه قفلت وباعت العربيات
انا ببلغ لله اوعي تفكر تأجر عربيتك منغير سواق حتي ول اداك كل الضمانات لانه هيهرب

**tarekx** · 29-10-2008 06:30 PM

المشاركة الأصلية كتبت بواسطة calipha3

مصر بخير :angelsad2:

انا عربيتي هيونداي النتر سودا مسروقه بقالها شهرين ملاكي غربيه 17012
وبدور عليها والبلد كالها نصيبين يا مان اكيد انت ما عندكش عربيه علشان كده بتقول ـــــــــــــــــــــــــ ـــــ

**calipha3** · 28-11-2008 01:40 PM

المشاركة الأصلية كتبت بواسطة tarekx

انا عربيتي هيونداي النتر سودا مسروقه بقالها شهرين ملاكي غربيه 17012
وبدور عليها والبلد كالها نصيبين يا مان اكيد انت ما عندكش عربيه علشان كده بتقول ـــــــــــــــــــــــــ ـــــ

ياعم انا بهزر !!

**ayman 2010** · 29-11-2008 07:28 PM

كل الناس اللى ساكنين فى طنطا واجوارها انتبههههههههههههههههههههو
من مكتب تأجير وبيع سيارات بميدان اسكندرية واسمة اسلام كار شغل كلة نصب فى نصب
ويتفق مع الصنيعية كلهم وبيدبسو الزبون فى العربية ولما يرجع يدفعوة ب 2000-3000
حسبنا لله ونعم الوكيل