نصيحة لوجه الله ....بلاش معرض الطارق اللى فى مول العرب

**omarhelalyehia** · 20-07-2014 02:17 PM

السادة الافاضل .....رجالة المنتدى الكرام ....ذهبت أنا و اخى منذ اكثر من شهر لشراء نيو لوجان كاش من معرض الطارق اللى فى مول العرب لأخى و تم دفع 19000 جنيه و الباقى 70000 عند الاستلام
و تم الاتفاق على الاستلام بعد اسبوع ....ثم تم التأجيل لاسوع اخر مع زيادة السعر 1000 جنيه .....ليه بقى اصلها موديل 2015 مش 2014 و رغم وضوح الاشتغالة لكننا دفعنا و قلنا مافيش مشكلة
المهم بعد عدة تأجيلات اتصلوا بينا امس و قالوا تعالوا استلموا العربية ...نروح عشان نستلم و معانا باقى الفلوس.... معاملة فى منتهى قلة الزوق و اللا مبالاة و العربية مش موجودة و يقولك روح شوفها فى الجراج فى ابو رواش و ماحدش راضى يرد علينا او يتكلم معانا و ناس بتشوح و بتتعامل بصوت عالى ....المهم انا قلت بلاش منها العربية و عايزين فلوسنا ....قالوا مافيش تعالى كمان يومين ....المهم اتصلت على الفرع الرئيسى باسكندرية ردت عليا الانسة اميرة ووعدت بحل المشكلة و احنا اهو فى الانتظار .....للاسف انا عارف ان سمعة الطارق اللى فى مول العرب سيئة بس اخويا راح و اتفق معاهم من غير ما اعرف......ان شاء الله حانشوف الموضوع حايوصل لفين و سنوافيكم بالجديد ويا مسهل الحال يا رب

**kantofanto** · 20-07-2014 02:26 PM

الف شكر ياباش على النصيحة و جزائك الله خيراً و جعله فى ميزان حسانتك.

**omarhelalyehia** · 20-07-2014 02:56 PM

السكرتيرة فى المركز الرئيسى ماعملتش حاجة .....بتقول انها بتدور على حد من ولاد صاحب المعرض عشان يحل المشكلة ......ان شاء الله ناخد فلوسنا ......و توبة نتعامل مع الطارق تانى

**mif** · 20-07-2014 02:59 PM

المفروض كنت عملت محضر بانه زود السعر عن الاتفاق المبرم و خد بالك ان حكومة محلب طلعت قرار من شهر او اكثر بان العميل يدفع اللى مكتوب فى عقد الاتفاق بدون اى زيادة .

**omarhelalyehia** · 20-07-2014 03:15 PM

محضر .....حضرتك لو شفت السيلز اللى موجودين و طريقة تعاملهم مع الناس و عدم خوفهم من صاحب العرض أو رئيسه فى العمل ....تعرف اد ايه الناس دى ماعندهاش فكرة فى التعامل مع البشر....ناخد بس فلوسنا و يكون خير ان شاء الله

**Amro_ON** · 20-07-2014 04:13 PM

شكرا جدا على التنببه...كان ممكن اروحله وصرفت نظر

**kokowasfy** · 20-07-2014 04:42 PM

شكرا للتنبية

**ramymechanics** · 20-07-2014 04:54 PM

انا بصراحة من شهر 9 اللى فات اشتريت منهم 3 عربيات ... فلوانس 2014 و لوجان 2014 شكل قديم و شانا بينى و بصراحة مواجهتش مشاكل فى التلات مرات والتعامل كان كويس

يمكن عشان حضرتك عربيتك فيها حجز و كدة فحصل معاك مشاكل ... ان شاء الله خير

**medo_31** · 20-07-2014 05:38 PM

شكرا جدا على التنبيه

**maghnom** · 20-07-2014 08:14 PM

تعاملت مع معرض الطارق من 3 سنوات في شراء كيا سيراتو، كان في فرع في مدينة نصر شارع احمد فخري قدام حديقة الطفل ودلوقتي اتقفل

كانت أسوأ تجربة لشراء سيارة في حياتي

كل المهازل و خلف الكلام والوعود والتسويف اللي ممكن تتخيلها حصلت معاهم

وفي الآخر استلمتها بعد 4 اسابيع من معاد الاستلام الاساسي (وراحوا جابوها من سمير ريان لأن اللون اللي اتفقت عليه مكنش موجود وكل يوم يقولولي جاية في الطريق طب هي في المينا طيب المركب واقفة في البحر وكلام اهبل من العينة دي.. وبعد ما استلمتها اكتشفت ان العربية اتحكت منهم وهم بيركنوها في المعرض بسبب تكديس العربيات وضيق منزل ساحة المعرض

العربية كنت متفق على انها خليجي، لقيت التكت بتاعها مكتوب عليه انها متصدرة لليمن والسيل المعدني اللي على الباب لا بيقول انها خليجي ولا مواصفات قياسية للسعودية ولا اي حاجة

المندوب قالي يا بيه ما هي هي طالما تصدير لاي دولة حر زي اليمن هتلاقيها مواصفات خليجي!!

استلمتها من الزهق والقهر وطول الانتظار لاسابيع بدون عربية (عارف اني غلطان)، اللي يفقع ان مندوب المبيعات قالي مبروك الحلاوة بقى عايز 100 جنيه للاوفس بوي!!

اتسحبت في الثقب الأسود بتاعهم و تعاقدت على خدمات صيانة كمان معاهم

راحوا مكملين عليا

لقيته في صيانة الالف واخدلي العربية على مركز صبحي سند مش توكيل كيا

وحدث ولا حرج، مش متخصص في الكيا وعربيات من كل شكل ونوع داخلة وخارجة، واللي عملوه كان تغيير زيت بدون فلتر وهي دي الصيانة والموتور صوته بقى عالي بعد تغيير الزيت بسبب استخدام زيت الله اعلم ايه بدل شيل الموصي به للكيا سيراتو من اللي مصنعها

اتصلت بخدمات معرض الطارق اشتكي قعدوا يقاوحوا معايا ومخدتش حق ولا باطل

قطعت علاقتي معاهم نهائيا بعدها، وبقيت اعمل صيانة العربية في التوكيل على حسابي - وبأسعار صيانة الخليجي وبمعاملة الخليجي وهي مش خليجي وفي نفس الوقت مش طايلة توكيل

بصراحة لو مش دول أسوأ معرض سيارات في مصر انا معرفش الأسوأ ممكن يبقى ايه