اللادا عربية جامدة ولكن ؟

**mido9h** · 18-10-2008 04:04 PM

عن تجربة شخصية انا عندي لادا 2105 موديل 96 كانت جايبها زيرو بصراحة اول 5 سنين مصلحتش فيها حاجة خالص بعد 5 سنين زيها زي اي عربية تانية المشاكل تبتدي تظهر بس مشاكل اللادا معروفة الي حدا ما والمشكلة الرئيسية هي العفشة بس في حاجة بجد انا اكتشفتها كل لما اصلح حاجة فيها تبوظ حاجة تانية لما افضل سايبها بالمشاكل الي فيها كدة تفضل شغالة وماشة مش عارف ده في اللادا كلها ولا بحسه في عربيتى انا بس بحس انها بتعند معاك تقولك انتي صلحتني انت جامد كده يعني طب والله لبوظلك فيا حاجة تانية وعلي فكرة بجد الموتور بتاعها جامد جدا هو 1200 سي سي العداد 160 انا قفلت العداد اكتر من مرة ببقي حاسس ان الموتور هيطلع من مكانه علي فكرة انت مش محتاج تروح الجيم لان الدركسيون بتعها هيطلعلك باي وتراي اجمد من اي تمرينة دراع ممكن تتمرنها في حياتك واجمد احساس بقي لما تنزل منها وتركب اي عربية تانية من العربيات التافهة الي طالعة جديد دي زي الانسر مثلا او النترا او i30 بجد بحس ان السواقة سهلة قوي مش زي الي انا متعود عليه بحس وانا داخل العربية كاني داخل خناقة بالظبط وهضرب هضرب هي العربية مافيهاش اي اوبشن خالص وانت بجد مش محتاج فيها غير كاسيت وسماعات كويسين تعلي الكاسيت علي الاخر علشان متسمعش اي صوت يطلع من العربية استعبط بمعني اصح لانك لو مشيت ورا كل صوت تسمعة هتفلس انا صارف علي العربية اكتر من عشرة الالاف جنيه اخر 3 شهور مابين عفشة وكارونة وكاوتش ومكانيكا وبرده بسمع فيها اصوات غريبة الظاهر مفيش مكانيكي محترم ولا قطعة غيار اصلية مع العلم انا كل قطع الغيار الي بجبها جديدة مش استيراد واجمد حاجة بقي ممكن تكتسبها منها هي الخبرة انا ممكن ابقي واقف مع الميكانيكي واشخص حالة العربية وابقي عارف هي فيها ايه بالظبط كل الي ببقي محتاج الميكانيكي فيه يفك ويركب بس يعني خبرة ميكانيكية جامدة جدة .

ولو حد عايز يسالني علي اي صوت في العربية انا بقيت خبير اصوات :)

وبالتوفيق

**mohamed2002** · 18-10-2008 09:16 PM

القسم منور بتقييمك لل 2105 لكن ازاي موديل 96؟
المفروض اخرها 95 ؟ولا اية؟
اللي معاك تقفيل روسي ولا تركي وكنت جايبها بكام زيرو :)؟
في كام زرار في التابلوة مش عارف لهم وظيفة
هما اتنين علي يمين الدركسيون تحت واحد بتاع نور التاابلوة والتاني مش عارفه

**ahmedsamir79** · 19-10-2008 04:12 AM

0فعلا حسب ما أنا عارف إن أخر موديل سنة 95

**H.ibrahim** · 19-10-2008 11:51 AM

ربنا يبارك لك فى عربيتك يا استاذنا واحب اسالك عن الكروونة لما يكون فيها وونة بصوت عالى هل لها اى خطورة غير الصداع الرهيب اللى بتسببه و كمان حلها ممكن يكون ايه غير كروونة جديدة (اقصد تصليح طبعا والتكلفة كام ) مع العلم انى متابع الزيت بتاعها و ان الزيت مش بينقص تماما و انا كنت غيرت الزيت من شهرين فى بنزينة الامارات و من ساعتها وانا حاسس ان صوت الكروونة عالى جدا يوم بعد يوم .
واشكرك على مجهودك معنا للرقى بمنتدى الادا خاصة ونايل موتورز عامة :err::err::k9:

**galallada2105** · 20-10-2008 02:15 AM

معايا لادا 2105 روسى مو 92 وكان والدى رحمه الله متابعها من اول يوم كصيانة سواء فى ضبط او تغيير اى جزء مع الوقت فى الاول سيور طقم كهرباء فلاتر وطبعاً تغيير الزيت فى ميعاده ومع الوقت بدأت حاجات تظهر الكاربيراتير عايز يتنظف و يضبط وضبط كهرباء واحيانا على فترات طويلة جداً ضبط تكيهات ومع الوقت والمتابعة العربية مغيرتش فيها غير طقم شنبر (المانى) فى 2005والحمدالله والعفشة كان بيكشف عليها كل شهرين لان مشاويرنا بيها مش كتيرة ( على فكرة انا من محافظة السويس ) وتتربط العفشة ولو فى حاجة عايزة تتشحم نعملها وفضلت حاجتها فيها 7 سنوات بحالتها بعد كده غيرناها بـ (جلد وجلب وبيض وشدادات المانى ) ومساعدين المانى ويايات ايطالى بتاعت الفيات مقولكش بقت مريحة معانا اد ايه وطبعاً غيرت طقم كاوتشات بريدجستون يابانى وركبت جنوط ايطالى وانا من 2001 ماسك صيانتها وبقيت افهم فيها مع الوقت (وبجيب دائماً قطع غيار غير الروسى والمصرى)ودواخل العربية فابريقة بمعنى الكلمة وبالنسبة للسحب طبعاً فوق الـ 100 كم وابور الطحين يشتغل وده طبعاً عشان سير الكاتينة الصلب اساس صوتها العالى و جبت بيها 145 كم ومرضيتش اكمل مع انها تجيب اكثر بس عشان ثباتها ضعيف فى السرعات العالية وبالنسبة للكرونة كانت عندى بتجيب زيت على الكاوتش اليمين وغيرت الاكس بالكامل بواحد استعمال خارج يمكن المشكلة من المنطقة الواصلة بين الكرونة وعمود الكردان او اتاكد من منسوب الزيت تانى واهم حاجة لما تزود الكرونة او الفتيس زود باتقل زيت عندهم فى المحطة (ارجو يا جماعة ناخذ بالنا من الصيانة الدوريةوبلاش نعامل العربية دى كما لو انها دبابة حتى الدبابة لو معملتلهاش صيانة تخرب) واسف على الاطالة وشكرى للجميع .

**H.ibrahim** · 20-10-2008 08:13 PM

اشكر اخى galallada2105 على المشاركة و فى انتظار باقى اراء جروب الادا و خبرتهم فى المشكلات التى تواجهنا مع السيارات - وفعلا كلامك مظبوط بخصوص الصيانة الدورية للسيارة مهما كانت قوة تحملها و جودة الصنع ولكن المشكلة الحقيقية الظاهرة فى جميع السيارات هى عدم جودة قطع الغيار رغم تنوعها بل وصل الامر الى ان قطع غيار الاستيراد افضل من قطع الغيار الجديدة وهذا عن تجربة شخصية:k20: سوف اتكلم عنها لاحقا فى موضوع اخر .

**mido9h** · 21-10-2008 01:37 AM

شكرا يا محمد القسم منور بالناس الي فيه يا باشا
علي فكرة انت عندك حق هي موديل 95 تقفيل روسي بس يمكن علشان انا مستلمها 96 فبيجي في بالي علي طول انها 96 .
علي العموم انا فعلا مش عارف سعرها لاني والدي استلمها من المخابرات بس استلمها زيرو .
بالنسبة لزراير التابلوه هما 4 اتنين علي اليمين الي فوق بتاع المروحة والي تحت ده بتاع الزجاج الخلفي للسيارة يعني انت عارف في روسيا درجة البرودة عاملة ازاي الزرار ده فايدته انه بيذيب التلج الي بيتراكم علي الزجاج الخلفي للسيارة عن طريق الخطوط الموجودة علي نفس الزجاج هي ديه الي بتوصل الحرارة .
بس ده طبعا مالوش اي فايدة في مصر نظرا لاختلاف طبيعة الجو انا عن نفس لاغيه ومخليه لكشفات الشبورة الي انا مركبها تحت الاكصدام .
اما بالنسبة للاتنين الي علي الشمال بالتاكيد انت عارفهم الي فوق بتاع نور الفوانيس والي تحت بتاع نور الشبورة الخلفي بيزور انارة الفانوس الخلفي في حالة وجود شبورة .
يا رب اكون عرفت اوضح

**mido9h** · 21-10-2008 02:37 AM

شكرا يا استاذ h.ibrahem
انا لما حصل معايا موضوع الكارونة ده كنت مسافر الساحل وقبل ما اوصل الساحل بحوالي 40 كيلو سمعت الصوت بتاع ونة الكارونة ,
طبعا الصوت بيبتدى ضعيف وبيزيد شوية بشوية لحد ما يوصل للصداع علي حد تعبيرك وعلي ما اتذكر كان اول لما بدأ عندي الصوت ده كان بيظهر علي سرعة 80 او لما اشيل رجلي من علي دواسة البنزين بعد كده بقي علي كل السرعات.

المهم نزلت الكيلو 21 وسالت عن ميكانيكي كويس هناك قعد يخترع كده شوية ويقولي ده عمود الكردان مش مربوط انا ربطهولك اطلع جرب الاقي الصوت زي ما هو طبعا وادفع كالعادة للباشا الميكانيكي , مش تكرم سياته ونزل تحت العربية
المهم قالي ده موضوع كارونة ولازم تتغير سالته طيب ينفع اصلحها قالي لا هي مش بتتصلح بتتغير علي طول سالته طب اجيبها جديد ولا اعمل ايه , قالي يا بيه ديه تجيبها استيراد من عزبة شلبي .

طبعا اتفاجأت ان عزبة شلبي الي عندنا في القاهرة دي متسيطة اوي كده حتي في اسكندرية .

وسالته عن خطورة اني اسافر بيها لحد القاهرة قاللي مافيش اي خطورة .
ولما سألت في عزبة شلبي علي الكارونة الاستيراد قالولي ان سعرها بيتراوح ما بين 700 وال 800 جنيه وبتبقي علي التجربة يعني اشتغلت ومعملتش صوت معاك اشطة ولو عملت صوت رجعها,
طبعا قولت انا مضمنش ادفع 700 او 800 جنيه وبعد شهر ولا حاجة تعمل صوت تاني ,ماانا مش عارف هيه خارجة من عربية مشيت قد ايه ولا حالتها ازاي .
المهم نزلت جبتها جديدة روسي بالزيت بتعها كمان من التوفيقية ب 1300 جنيه وبعد شهرين بالظبط رجع الصوت تاني بس يعني خفيف شوية ومش بيزيد , وزي ما قولتلك قبل كده بقيت اعلي الكاسيت علشان ماسمعش اي حاجة بس للامانة بيتهيألي العيب في الميكانيكي , يعني شوف ميكانيكي كويس تكون بتثق فيه يركبها لك .
والراجل الي انا جبتها منه في التوفيقية هتلاقيه في الشارع الي فيه الناس بتوع قطع الغيار بعد ما تخرج من الشارع الي الناس فارشين فيه الاكسسوارات علي الارض , اسأل علي بتاع قطع غيار اللادا بس , ان اسف مش فاكر اسمه بالظبط بس هو معروف .
ومنصحكش تمشي بيها كده مش علشان حاجة بس علشان الفضيحة , لاني كونت مصدع الشارع كله وكانت الناس الي راكبة عربيات تافهة جديدة , الي مالهاش صوت ده اكيد انت عارفها , كانوا بيبصولي ويحتقروني كأني سواق ميكروباص :k30: .
ياريت ماكونش صدعتك اكتر من صداع الكارونة

**H.ibrahim** · 21-10-2008 12:24 PM

شكرا اخى العزيز mido9h على مساهمتك فى حل المشكلة وفى انتظار باقى اراء اعضاء المنتدى لحل هذه المشكلة دون ان يقوم الميكانيكى بعمل اى شغل نصب على .:k32::k32: