ده انت اللي منور المنتدي كله ياباشمهندس بمعلوماتك ونصائحك المفيدة وربنا عنا كل الخير - بس يعني ايه فتحة سقف مع خاصية الامالة ومصطلح antipinch ولك تحياتي
فتحة السقف تقدر تميلها من الخلف لأعلى علشان تدخلك هوا لطيف بدون اتربة او ضوضاء....هى دى خاصية الإمالة
خاصية ال antipinch و دى مش بس موجودة فى فتحة السقف لأ دى كمان فى الأربع زجاج كهربا الجانبى و هى ببساطة لأن فتحة السقف و الاربعة زجاج كهربا بيقفلوا من لمسة واحدة فممكن قوى طفل او حد يكون مش واخد باله يقوم الزجاج يقفل عليه.....هنا خاصية ال antipinch بتخلى الازاز او فتحة السقف يرجع تانى يفتح اول ما يصطدم بعائق و ذلك للأمان الفائق
طبعاً بعد ما بيرجع يفتح حاجة بسيطة بيرجع يقفل تانى لوحده بعد زوال العائق
تحياتى
كنت محتار بين شارك 2015 و فلوانس 2015؟
وفعلا الفلوانس سحبها بطئ؟ واقصى سرعة ليها كام؟
مع العلم انا مش هجيبها ليا لوحدي كشاب بل لاسرة
و ايه الاحسن من حيث الشكل و الفخامة و ارتفاعها عن الارض و وسعها من الداخل بالذات الكنبة الخلفية لان لدي اخين ؟؟
حلوة خمسيناتى دى يافندم - انا خمسيناتى بس بحب الجرى العاقل - ومعاى الجميلة فلوانس e3s موديل 2013 الشكل والفتيس القديم - ومن شدة حبى فى العربية عايز اغير للفيس ليفت عشان حاجتين الفتيس الاكسترونيك سى فى تى بيقولو موفر فى البنزين - لان واضح اننا هنشوف ايام سودة فى اسعار البنزين - وعشان مش عجبانى النتشة اللى فى الفتيس القديم على الغيار التانى - سؤالى لمعاليك قد ايه بيوفر بنزين تقريبا - وقد ايه بيخنق فى السحب - شكرا جنابك
انا حضرتك مش خمسيناتى و لا حاجه و معايا الفيس ليفت e3r :)
اولا اى فتيس اوتوماتيك الضغط عليه فى السحب مع بداية السير مش صح و بيقصف عمر الفتيس و بيقلل كفاءته , عايز عربيه تنط بك اول ما الاشاره تفتح اركب مانيوال على طول من غير تفكير .
كنت فى المانيا و ركبت المرسيدس موديل السنه و كانت مانيوال فول اوبشن , الجماعه الالمان بيحبوا السحب الشديد و خصوصا اول ما الاشارات تفتح و ما تلاقيش حد فيهم بيدور على الاوتوماتيك , كله مانيوال , مش عارف ليه الناس بتفكر هنا فى قوة السحب و تكون اوتوماتيك .
ثانيا ال cvt و خصوصا اللى المطور اللى نازل فى الفيس ليفت xtronic سحبه مع الطلعه كويس جدا و بعد سرعة ال 40 شوف حد هايعرف يوصل لك و لا لأ و عن تجربه , بس العربيه حجمها كبير و صالونها و التابلوه كبير مش بتاعة غرز و حرام يتعمل فيها غرز و حرق .
ثالثا الفتيس ده احسن تكنولوجيا دلوقتى موفره للبنزين 5.5 لتر لل 100 كم و ده على الطريق السريع و طبعا فيه عوامل تانيه مؤثره زى الهوا و سرعته و اتجاهه لكن فى المجمل استهلاك ممتاز و مافيش نتش او نقلات , سلاسه متناهيه فى القياده .
اتمنى اكون افدتك , تحياتى
لو سمحتو يا جماعه هل لسه مشكله الماتور في اكل الزيت لسه موجوده ؟؟؟وهل حد سمع عنها تاني في مودلات ٢٠١٥ يا ريت الي يعرف بس يقول عشان فيه ناس لسه بتقول انها لسه موجوده
الحمد لله السياره معايا من 5 شهور بدون مشاكل وعامله تقريبا 2000 بزيت الفابريكه والفتيس رائع مفيش احساس بالنقلات نهائي وموفر جدا جدا في البنزين وتسارع بعد ثانيتين من الطلعه رائع خصوصا الواحد لا بيحب الجري ولا الحرق حفاظا علي السياره -طبع بقي- وحفاظا علي النفس ربنا يسترها معانا كلنا
متجبهاش عربيه بتاكل زيت والتوكيل مش عارف السبب
وقطع غيار مش موجوده
مش اعتماديه
عربيتي فلونس ٢٠١٥ مكملتش ٤٠٠٠ كيلو زودت زيت ٣ مرات
يا جماعة انا عندي فلولنس 2015 عاملة 3000 كيلو بس في طقطقة في الابواب، و صوت غريب عند الرجوع للخلف، و الشنطة بتقفل بالرزع، و دواسة الفرامل زي متكون ملخلخة شوية، هل ده طبيعي؟؟ و هل في صيانة ال 5000 كل ده هيتصلح في الضمان؟ شكراا