الحقوني ؟؟؟؟خرجت لقيت ما فيش دبرياج والزيت فضي كله. أعمل إيه؟

إمبارح كنت باغسل العربية في المغسلة لأن الدنيا كانت مطرت عندنا في المنصورة ورحت بعدها بيومين المحلة مشيت في شارع الجلاء ده إللي فيه نادي البلدية وكان عبارة عن بركة طين .
كنت ماشي بالعربية عادي وركنت الساعة واحدة بالليل وطلعت نمت . النهاردة الضهر نزلت أدور وأنا من عادتي إني أدوس دبرياج وأشوف الفتييس ممور ولا لأ قبل ما ادور العربية. بدوس دبرياج لقيته خفيف زي المية ، فتحت الكبوت وببص في القربة لقيتها فاضية ، أعمل إيه دلوقت ؟؟ مش عارف أمشي بالعربية من غير دبرياج إزاي ، وهل ممكن إن أنا أصلح العطل بنفسي ولا إيه؟
رجاء المساعدة ؟ وأنا معاكم أونلاين

هى العربيه نظام الدبرياج بتاعها باكم؟ لو باكم يبقى اكشف على الماستر العلوى و السفلى هتلاقى العلوى تحت الدواسه شوف فيه زيت و السفلى راكب من بره عند الفتيس لو مفيش تسريب يبقى بص من عند علبة الزيت شوف فيه اثر للزيت ولا لأ و للأسف لازم ميكانيكى يعملها علشان ياخد هوا من المساتر و لازم يكون عنده مكنه ضخ

جربت دلوقت أمشي بالعربية من غير دبرياج ، افتكرت كلام سواق تاكسي مرة قالي إنه بيمشي من غير ما يدوس دبرياج وإنه بيعرف الوقت المناسب علشان ينقل النقلة الأعلى من غير ما التروس تحك ببعضها ، طبعا أنا مكنتش ناوي أعمل كده أبدا لكن فيه أخ كريم هنا في المنتدى أشكرة جدا كان نصح أحد الإخوه كان دبريجه عطلان برده إنه يدي العربية التاني ويدور ويسيبها تتنطط وبعدين يمشي عادي لغاية العفشجي ، وعملت كده فعلا وطبعا كنت ماشي هادي جدا على الثاني وكل ما أفرمل للضرورة القصوى طبعا ، العربية تبطل وأدورها تاني بنفس الطريقة ، يا رب ما يكونش ده وحش على العربية ، وطبعا رحت ما لقيتش العفشجي كان مشي خلاص فبكره إن شاء الله هاروح للعفشجي الصبح بدري والشوارع فاضية ، هو بييجي الساعة تسعة الصبح بس أنا هاروحله بدري شوية علشان الشوارع تكون فاضية . وادعولي ربنا يستر . بس يا ترى المشكلة دي سببها إيه ؟؟؟ حد يعرف ؟؟؟

الحمد لله طلع الموضوع بسيط جدا ، كان فيه جلدتين صغيرين كده دايبين ، موجودين في بتاع كده نسيت أسأل العفشجي عن اسمه عبارة عن صباع حديد بيلمع وفي آخره سوسته ، وانتهت المشكلة بتغيير جلدتين ، الجلدة بجنية ونص وخمسه جنيه مصنعية وثلاثة جنيه دخان وعلبة زيت باكم لسه معايا ثلثينها .