استفسار عن تظبيط الفولكس بيتلز أسعاره و الاماكن

السلام عليكم ورحمة الله وبركاته

اخواني فى الله انا متابعة ليكم من سنة تقريبا كل ما يقال عن الفولكس البيتلز
وخاصة ردود الأخ الفاضل رحمه الله أبو هاشم
وأخونا العزيز أحمد حسن

انا جديدة فى عالم السواقة واخترت العربية دي وحبيتها بسببكم وبسبب تشجيعكم
بس عندي سؤال ياريت الاقي اجابة منكم كما عهدناكم دايما أخواني الافاضل

حابة اظبط الفولكس
تظبيط زي ده
يتكلف كام وهل ممكن يتظبط هنا وعند مين والتكلفة كاملة كام

لان للاسف جديدة فى عالم السواقة
ومعرفش اي ميكانيكي ولا اى احد وليس لدي اخوة شباب
ف اعتبركم والله على ما اقول شهيد اخواني فى الله

ف اتمني منكم المساعدة

دي الصور للعربية المتظبطة اللى حابة اعمل عربيتي زيها

لون العربية عايزه اغيرله للاسود واعمل نفس كل حاجه
فى العربية الاكسسوارات الفضي
اللى حاطيتها على الشبابيك والعربية من تحت والاكصدام
وعايزة اعرف اسعار الكاوتش الي بالصورة كمان

http://s02.arab.sh/i/00007/zkjcuzdtnxtc.jpg


اما التابلوه والعربية من جوا عايزاها زي كده مع الدريكسيون




http://s02.arab.sh/i/00007/mh5lrshzpapm.jpg

واخر حاجه

الكراسي

http://s02.arab.sh/i/00007/9bosqeqmjnpv.jpeg


ياريت الاسعار بالكامل
وهل يفضل اشتري فولكس حالة نظيفة ب 18000 واغيرلها كل ده

ولا اشتري حالة عادية ب 13000 واغيرلها كل ده

اخواني ارجو منكم المساعدة فى الاسعار و الاماكن والوقت هتاخد وقت قد ايه لتغيير كل ده

وجزاكم الله خير واعتذر منكم على الاطالة

متابع

انا مازلت منتظرة ردودكم اخواني
وليا استفسار اخر
هي البيتلز
بتحتاج كام نوع زيت

انا من خلال قرائتي عرفت انه افضل زيت لها هو زيت شل اكس 100
هل فى زيت ثاني للسيارة لان اسمع ان السيارات عامة لها اكثر من زيت
زيت ماتور و زيت فتيس

فهل البيتل لها زيت للفتيس ؟
وايه افضل الانواع

اولا بانسبة للصورة الاولي ده ماكيت بس مطابق للواقع برضو بالنسبة للتظبيط العربية هيكون تغيير اللون لو عادي هيكلف من 600 الي 800 والميتالك انا بفضلة جدا علشان درجة اللمعان هيبقى في حدود 900 ج ... بالنسبة للنيكل اللي على الشباك فدة بيبقي فالكوتش اللي علي فريم الزجاج ...النيكل اللي على العتب دة معنديش فكرة عنة ممكن الاعضاء يبقى عندهم خبرة اكتر مني ....اما بالنسبة للتبلوه فدا بيختلف من موديل للتاني يعني موديل ال1300و1302 مينفعش معاه غير قشرة جلد لان مفيهاش تابلو والزجاج مسطح لكن اللي فالصورة موديل 1303 دة اللي في تابلو والزجاج بومبيه وده ينفع يتظبط من عند اي سروجي محترم انا كنت بروح جسر السويس عند حديقة بدر هناك الصنايعية عندهم مهارة واديهم حلوة في الفرش ... بالنسبة للكراسي ابن عمي اشتري اتنين بس بتوعbmw الفئه الثالثة ب1200 ج بس ماشاء الله حلوين اوي وبرض ركبهم من عند نفس المنطئة اللى قولت عليها ... اما الكوتش فانا معرف حضرتك تقصدي اي كوتش اللي عليى الاكصدام ولا الببان ولا العجل ارجو التوضيح .... اما المكانيكية انا اعرف واحد في غمرة عند شارع احمد سعيد وواحد تاني في جسر السويس عند سنترال مصر الجديدة الاتنين حلوين بس لازم الواحد يحط عينة في نص راسة منهم لانهم بيحبو يشتغلو الناس هههه بس شغلهم محترم .... قطع الغيار الجديدة انا كنت باجيبها من التوفيقية ....بانسبة للوقت فهيبقى حسب الصنايعي بس كل دة مثلا مش اقل من شهر ..... بالنسبة للعربية اللي حضرتك عايزة تشتريها فدا حسب الحالة والموديل يعني الموديل اللي فالصورة بتاعت التابلو دي اسمها 1303 بتبقي غالبا موديل 1973 متوسط سعرها 16000ج يعني من 14 الف الى 20 الف حسب الحالة و الاساسيات بتاعتها....اما بانسبة للموديل اللي من غير تابلوه هيبقي متوسط سعرة 11الف يعني من 8 الي 15الف برضو حسب الحالة بس ساعة الشراء ياريت يبقى مع حضرتك حد بيفهم فالعربيات دي لان بيبقي فيها حجات معينة لازم يتبص عليها .... بانسبة لزيت الماتور انا بستخدم mobil delvac حلو بغيرة كل 1000 كيلو وفي التعاون البرتقالي بس انا جربتو حسيت ان صوت العربية في نحر وصوتة عالي فبطلتة ....بالنسبة لزيت الفتيس لما حضرتك لما تشتري العربية تزوديه عند اي بنزينة مش مهم الماركة بس المهم ان الفتيس يبقي في زيت ودة مش لية عدد كيلو بس لما ينقص او اويل سيل يبوظ من ناحية العجل لازم يتزود وطبعا معا ربط العفشة والتشحيم والغسيل انا كنت باعمل كدة بالمرة عند البنزينة اللي في جسر السويس ناحية حلمية الزتون ......... بس هي دي خبرتي عن العربية واكيد برضو الاعضاء القدام عندهم خبرة اكبر مني

اخي الفاضل أشكرك جدآ لردك و سعة صدرك
ووصفك التفصيلي
الحقيقة انا كنت ابتديت أيأس ان هلاقي رد على موضوعي
بشكر حضرتك جدآآآآآ

بالنسبة للعربية والله هو زي ما حضرتك قلت وتفضلت
انا فعلا خالي بيفهم بالعربيات فهو اللي هيشتريها معايا
وانا ان شاء الله هحاول انى اجيب الموديل 1303 عشان اقدر اغير فيها حاجات اكثر
بس بالنسبة لتغيير التابلوه لان ده مهم بالنسبة لي
هل فى تابلوه مناسب يركب معاها وسعره هيعمل كام تقريبا بالمصنعية
عشان يطلع زي اللى انا حاطة صورته
وهل اللى انا حطاه فى الصورة تابلوه عادي
واللون والجلد الى عليه شغل خارجي عليه
ولا هو ده تابلوه جاهز
وينفع اخد الصور معايا ويتنفذ زيها او قريب منها ولا الشغل ده بيتعمل برا بس .؟
وبالنسبة للكاوتش كنت اقصد الكاوتش العربية + الجنوط

وفي سؤال حضرتك
انا لو حبيت اغير الطقم كامل الكنبة + الكراسي هيكلفني كام
لان هحتاج الكنبه عشان الاطفال
وياريت لو مفيهاش ازعاج لو حضرتك
تقولي اسماء المحلات الموثوقة واماكنها
اللى عند حديقة بدر

ومعلش اخر سؤال
ايه الحاجات اللى لازم اعملها
اول ما اشتري العربية ان شاء الله
يعني حاجات تخليني فى الامان
اغيرلها ايه واعمل فيها ايه وفين بالظبط المكان

وجزاكم الله كل خير

لا شكر على واجب.....1303 موديل جميل جدا...... التابلو اللي فالصورة دا الاصلي بتاع العربية ممكن يتظبط من الخارج زي اي عربية لاكن انا من رأيي بلاش التغيير فالحجات دي لانها مش هتبقى عملية يعني بلاش اللعب في الحجات دي لانها مبتكملش كتير وتلاقيها شققت وباظت بسرعة لان اي صنيعي هنا في مصر مش هيوصل لتقفيل المصنع بتاع العربية لاكن فالفرش والارضية والسقف شغلهم بيبقى حلو ..... بالنسبة للمحل اللي روحتلو هو مكنش لية اسم بس كان في اول الطريق العمومي الورا الحديقة كان عمل شغل لابن عمي بس راجل تقفيلة حلو لوحضضرتك عايزة العنوان بالظبط هحاول اتصل بيه وهاقول لحضرتك علي طول بانسبة لاسعار الجنوط العادي كان رخيص يعني الطقم ميعديش 300ج الاشكال التانية من 1500 ل2500 ج بس دول قليلين فالسوق ممكن يكون عند الروماني اللي قدام قصر القبة انا معرفش غيرة بالنسبة للكوتش الفردة الواحدة هتبقيى في متوسط 300 ج حسب المقاس والماركة انا شخصيا مركب الكاوتش اسمة bridgestone من خلال تجربتي معاة دا افضل نوع للعربية بيفرق فالثبات وبيستحمل الطرق الصحراوية وبيعيش مدة اطول ......بانسبة لطقم الصالون الكنبة +الكرسيين استاندرد عند صلاح شاكر في مصر الجديدة لما سالتو من 3 سنين كانو عاملين 1500ج علما اتذكر يعني بس حضرتك لو غيرتي الكرسيين يبقى خلي الكنبة وتتظبط عند اي سروجي يعملها فرش وهتبقي زي الفل .......بانسبة لاسامي المحلات دا اللي اعرفة لوحضرتك عايزا اسم المحل السروجي هاكلم ابن عمي وهارد على حضرتك على طول ..... لما تشتري العربية اهم حاجة العفشة و الماتور دول اكتر حاجة مهمة لو حضرتك هاتشتري 1303 يبقى اهم حاجة العفشة الامامية لان مفيش منها جديد وبتبقى غالية يعني الاسكاترا والحوض والماتور اول حاجا تنقيط الزيت لانة سعات بيبقى من وش السلندر ودي بتحتاج تنزيل الماتور ولو بتاكل زيت او بطلع دخان ابيض وبرضو من عند الفايظ بتاع الزيت لو في دخان ابيض برضو تبقي محتاجة عمرة في الشي العادي لو العربية بتطلع صوت عالي او في رزع في الماتوريبقي الكرنك مكسور لو العربية مابتسحبش لاكن صوتها عالي يبقى الاسطوانة بتاعت الدبرياج بس دول اهم حاجة وبرضو من الحجات المهمة شكل العربية من برا يعني سعات العربية بتبقى عملت حادثة قبل كدة فبتلاقي شكلها مهما كانت معدولة لاكن بيبقي فيها ميل من ناحية عن التانية ..... الحاجات اللي تتغير دة في حالة ان العربية مفيهاش اي مشاكل في المشى لاكن للأمان برضو تغيير السير بتاع الدينمو لانة بيتقطع كتير وسلك الدبرياج و سلك البانزين وطقم الكهربة يعني ابلاتين وكوندينسر وبجيهات مع ظبط الكالربلاتير وبالنسبة للفرامل في علبة زيت فالشنطة من قدام اسمها زيت الباكم دي لازم تكون مليانة لو مش مليانة يبقى في تسريب فالفرامل اما اسامي الميكانيكية محمد الاسمر دا قدام سنترال مصر الجديدة شغلة حلو بس بياخد فلوس كتير وفي جنبة مديح انا مرحتلوش قبل كدة في صفوت في شارع رمسيس بين كوبري غمرة وشارع احمد سعيد دول فاهمين شغلهم بس معاملتهم صعبة شوية ...ارجو اني اكون افدت حضرتك واكيد برضو الاعضاء هنا عندهم خبرة اكبر مني ويقدرو يفيدو حضرتك اكتر مني

أنا عاجزة عن الشكر يا افندم والله كل الكلام قليل بحق حضرتك
بشكرك على سعة صدرك والتفصيل فى الرد فعلا كل الشكر والتقدير لحضرتك
بشكر تعاونك الواضح جدآآآآ وحضرتك افادتني كثير
وكنت لي خير ناصح وخير أخ كل الشكر اخي الفاضل

وكان عندي سؤال

معروض عليا بيتلز برازيلي موديل 1979 على 18000 جنيه
مرفوعه بقالها 30 سنة وفابريكيه من جوا ومن برا فى كل حاااااجه شكلها كأنها زيرو
بس لحد الان لم يتم عمل معاينة لها ان شاء الله المعاينة بعد العيد
في اى نصايح عن البيتل البرازيلي وهل هي سيئة .؟
مع العلم ان لحد الان مالقيتش الماني نظيفة

العفو.... بس العربية القدامك برازيلي يعني موديل 1300 اولا تمنها غالي اوي هي مبتعديش 12000 ج وتاني حاجة مفيهاش التابلو اللي فالصورة والشنطة من قدام ديقة والازاز الامامي والشبابيك اصغر في الحجم زي الالماني الي في اخر الخمسينات واول الستينات يعني من سنة 58 الي 65 الميزة فالموديل دة ان قطع غيارة كلها بتنزل جديدة وهاتلقيها فالتوفيقية بس بالتمن دة يجيب موديل 1303 مستريح اللي هو بتابلو والازاز اوسع والشنطة اكبر وهاتلاقيها موديل 72 و73 انا من رأيي بلاش وانشاء الله تلاقي حاجة افضل ولو حضرتك عاوزة موديل 1300 يبقي الالماني افضل وموديلاتها من 66 الى سنة 75.... في موديل 1302 دة في كل مميزات 1303 بس من غير تابلو والزجاج مسطح سنة التصنيع زي ال1303

انا مع حضرتك فى كل اللى بتقوله

بس احنا بقالنا شهر بندور
مفيش الماني 1303 او حتي 1302 حالة نظيفة كله متعدل من جوا
ومن برا الحالة سيئئئئة جدآآآآآآآ
رغم ان والله حضرتك حاطه للعربية رينج لحد 20 الف
بس مش لاقيه حالة نظيفة أبدااا
لا على النت ولا عند معارف خالي

دي مواصفتها

ياره برازيلي موديل ١٩٧٩ زيرو لم تستخدم الاشهور قليله جداا سقف فابريكه لم يرش من قبل ومن الداخل كلها فابريكه لم ترش
ارضيات وفرش الفابريكه بحاله الزيرو مرفوعه ٣٠ سنه موتور ١٣٠٠ سي سي ناعم جداا جداا وعفشه ناعمه جداا جداا
السياره بحاله الزيرو تماما


http://s02.arab.sh/i/00007/gups0bh0yd07.jpeg

http://s02.arab.sh/i/00007/umsrrqob1ch0.jpeg

http://s02.arab.sh/i/00007/ruftsbut1ldm.jpeg

دي صورها

خللي بالك من حاجه مهمه جدا : مرفوعة ٣٠ سنه معناها انها زمانها محتاجه عمره دلوقتي حتي لو ما كنش كاوتشها لمس الارض يا فندم. قطع الغيار ليها عمر افتراضي و ده بيبقي بعدد السنوات من وقت تاريخ الصنع بالاضافه الي عدد الكيلومترات المقطوعه. قد يختلف العمر الافتراضي طبعا من قطعه غيار للتانيه انما في الاخر احنا برضه بنتكلم في ٣٠ سنه و مفيش حاجه مصممه انها تشتغل حتي نهايه الكون.

انا حبيت انبهك للموضوع ده لان كتير من البائعين بيستغلوه علشان يبيعوا بسعر غالي و بعد كده اللي بيشتري يفاجأ انه محتاج يعمل عمره و العربيه لسه بكياسها و بشحم الفابريكه.

لو عايزه نصيحتي خليكي في موديل 1303 تحديدا و مش اي حاجه تانيه. الموديل ده من اجمل الموديلات و هو فيه تابلوه بارز زي اللي حضرتك حاطه صورته و كمان الكابينه اوسع و الكراسي برضه شبه الكراسي اللي في الصوره و البربريز الامامي بومبيه و كبير و كمان فيه نسخ محدوده منها فيها الزجاج الجانبي الخلفي بيتفتح زي الهوايه كده من ناحيه. ألوانها كمان بتاعه الفابريكه جميله قوي كان من اشهرها اللبني و الاصفر و البرتقالي و لو لقيتي منها حاله كويسه مش هتحتاجي تعملي فيها اي تعديلات من وجهه نظري. هتبقي محتاجه لحد معاكي بيفهم كويس في البيتلز علشان يطمن ان مفيهاش بارومه و ان الرقبه سليمه و انها ما بتسخنش و ان الكربيراتير كويس و حاله الموتور بصفه عامه لان هي ليها حاجات مخصوصه بيها لازم يتكشف عليها مش زي اي عربيه عاديه و كذلك ليها ميكانيكيه مخصوصين مش اي حد يصلحها يعني فلازم تبقي عارفه الموضوع ده كويس. لو اللي بيكشف عليها لقي الحاله بتاعتها فعلا نضيفه يبقي توكلي علي الله و اشتريها لان توضيبها متعب و ممكن في الاخر يطلع شكلها مش حلو

http://nileup.com/up/uploads/nilemotors_14067233641.jpg

دي صوره لل 1303 و غير الزجاج البومبيه و التابلوه البارز الجنط بتاعها كمان مختلف و الاخرام اللي فيه مدوره و اكبر من جنوط ال 1302 و كمان شكل الاكصدامات مختلف و فانوس الاشاره اكبر و العربيه بشكل عام اكبر في الحجم

انا يا افندم متشكرة جدآ لحضرتك ولتفاعلك فى الموضوع جزاك الله خير
وانا والدي اشتري من قريب له موثوق فيه عربية فولكس موديل 79 بس معرفش الحقيقة هي موديل 1303 ولا غيرها