حد عنده خدمة Shop & Ship من Aramex و إستخدمها قريب؟

**hunted22** · 25-07-2014 06:51 AM

السلام عليكم

كل سنة وانتو طيبين

ياجماعة حد مشترك فى شوب اند شيب واستخدمها قريب؟ انا عندى من زمان بس بقالى سنين مستخدمتهاش وسمعت انهم بقوا بياخدوا فلوس كتير فى كلام فاضى زى رسوم واستخلاص جمركى. وكمان ان الجمارك بتبقى اضعاف الطبيعى يعنى سمعت واحد بيقول موبايل تمنه 2000 جنيه هنا دفعوه عليه جمارك 480 (مع ان المفروض 200) و مصاريف زياده لأرامكس 300 جنيه (رسوم واستخلاص جمركى)

ياريت لو حد عنده الخدمه واشترى بيها قريب يقول هل التقدير الجمركى بيبقى حقيقى ولا لا. و دفع كام فلوس اضافيه لأرامكس غير الجمرك ومصاريف الشحن.

وشكرا مقدما

**Dr_Mido** · 25-07-2014 09:58 AM

اه انا جبت موبايل من فتره بتاع شهر كده
اراميكس مبتقدرش رسوم الجمرك السروم اما بتتقدر لو معاه فاتوره او حسب مزاج موسظف الجمرك وفي من ضمن رسوم اراميكس ١٥٠ جنيه تكلفه عرض التليفون علي الاتصالات و هما عمولتهم تقريبا بتبقي ١٥٠ تانيه و الشحن سعره انت عارفه

**mohamed_hamdi** · 25-07-2014 11:43 AM

احسن و اسرع وسبلة للشراء من النت و حتى الاستلام في مكتب ارامكس القريب منك في مصر بلا جدال لان فكرة وجود صندوق بريد او عنوان رمزي ليك في اكتر من ٧-٨ دول رئيسية في العالم بيفتح مجالات كتير للشراء دون التقيد بأوروبا او امريكا فقط. البديل هو البريد السريع المصري و هتاخدلك حوالي شهر على الاقل لحين وصول الشحنة و اسبوعين كمان لغاية السيد مندوب البريد مايتفضل بالذهاب للمطار للتخليص. انا قولت اجربهم في حاجة بسيطة من امريكا و اتشحنت من البائع من يوم ١٤-٦ و قسما بالله لغاية النهاردة محجوزة في المطار و البريد المصري طلبوا مني صورة البطاقة من ٢١-٦ للافراج عنها و حتى اليوم لا حس و لا خبر.
الرسوم الجمركية مافيش دخل لارامكس بيها لانها محددة حسب تصنيف الشحنة الخاصة بيك و ممكن تعرف التصنيفات دي من موقع ادفعلي اما رسوم التخليص فده حقهم مقابل جلوسك في البيت ووصول الشحنة لغاية اقرب مكتب ارامكس بدون انتظار شهر و نص و هما قللوا فعلا رسوم التخليص الجمركي للنص بقالهم فترة.

**hunted22** · 25-07-2014 06:09 PM

شكرا على الردود
يعنى هم حاليا بياخدوا 300جنيه بخلاف مصاريف الشحن والجمرك؟

**mk3** · 25-07-2014 06:42 PM

هى غاليه عموما اما الفلوس تفصيلها ايه فلا تكترث لانها لها 100 صرفه اولهم ان فاتوره الجمرك مش رسمية !
دلوقتى هما عاملين عرض لاخر 7 لدوله مصر فتح صندوق بريدى جديد ب 10 دولار فقط بدل 45

**hunted22** · 25-07-2014 06:45 PM

انا عندى بالفعل صندوق بس مابستخدموش لأن سمعت ان مصاريفهم بتخلى السعر الضعف. فكنت عايز اتأكد من اصحاب الخبرة

**kantofanto** · 25-07-2014 06:53 PM

المشاركة الأصلية كتبت بواسطة mk3

هى غاليه عموما اما الفلوس تفصيلها ايه فلا تكترث لانها لها 100 صرفه اولهم ان فاتوره الجمرك مش رسمية !
دلوقتى هما عاملين عرض لاخر 7 لدوله مصر فتح صندوق بريدى جديد ب 10 دولار فقط بدل 45

ممكن لينك العرض و التفاصيل عنه لو سمحت.