مع مراعاة الحالة المادية متحير بين صنى 2015 وميتسوبيشى اتتراج

السلام عليكم
والدى ناوى يشترى سيارة وطبعا اكيد هركبها معاه ومشاويرى حطلها بنزين على حسابى ...
فمتحير اجيب نيسان صنى 2015 وهيه 1500cc والا اجيب ميسوبيشى اتتراج 1200cc علشان اوفر فى اللى هدفعه بنزين لان مرتبى الشهرى محدود ومش حمل بنزين 92
وناس كتير نصحونى بالنيسان وقالولى مش هتفرق قوى علشان السحب واللى هتوفره فى الاتتراج من بنزين هتصرفه على الماتور فى المستقبل وقالولى ان السحب بتاع الاتراج هيقل اكتر مع مرور الزمن والعربية الاتراج لا تستحق السعر ده والتوفير فى الينزين يستحق شراء سيارة 1200 بسعر 110 الف......
فياريت تفيدونى عايز الاوفر ومقدار التوفير فى كل تفويلة اد ايه .....
وهل ياترى الماتور هيستهلك بدرى فى الاتراج لانه اقل فى السى سى
وياريت حد يفهمنى الشد على الطريق هيفرق ازاى معايا لانى معايا موتوسيكل وبحس ان سحبه ضعيف ومتفرقش معايا اوى لأنى مش داخل سباق وفى العربيات الصراحة مجربتهاش ومحستش بيها فلو بتفرق يا ربت حد يفهمنى

اظن الصني افضل في كل شي
بالرغم من عيوبها

الصنى افضل طبعا واستهلاكها للبنزين قليل

لا دية و لا دية

نيسان صنى 2015 افضل بالطبع

ولا دي ولا دي .. ارشحلك سوزوكي سويفت الجديدة هاتشباك هتكتسح الفئة دي لانها 1200 سي سي فيها كماليات وامان وشكل كويس ونعومة + انها ارخص من الاتراج والصني وكمان 4 سلندر مش 3 زي الاتراج .. على الاقل فيها فرامل كويسة مش زي الصني

اقتباس:

---

المشاركة الأصلية كتبت بواسطة eng f3lix

ولا دي ولا دي .. ارشحلك سوزوكي سويفت الجديدة هاتشباك هتكتسح الفئة دي لانها 1200 سي سي فيها كماليات وامان وشكل كويس ونعومة + انها ارخص من الاتراج والصني وكمان 4 سلندر مش 3 زي الاتراج .. على الاقل فيها فرامل كويسة مش زي الصني

---

لا حول ولا قوة الا بالله العلي العظيم
يا اخي انت ازاي ترشح عربيه لسه مانزلتش السوق و لسه مابنتش عيوبها ؟؟!!!
هو انت عايز تنصح الرجل ولا تجرب العربيه فيه ؟!!

اقتباس:

---

المشاركة الأصلية كتبت بواسطة ashrafwolf

لا حول ولا قوة الا بالله العلي العظيم
يا اخي انت ازاي ترشح عربيه لسه مانزلتش السوق و لسه مابنتش عيوبها ؟؟!!!
هو انت عايز تنصح الرجل ولا تجرب العربيه فيه ؟!!

---

العربية موجودة وبتتباع .. وانا كان معايا موديل 2007 منها قبل كدة وعارف انها عربية كويسة واكيد مش هنصحه بعربية اي كلام

لو حضرتك متعرفش انها نزلت انصحك تلف عالمعارض وتتفرج عليها

بص ياباشا الاتراج موتور بتكنولوجيا مايفيك يعني مش اي كلام وفعلا موفر في البنزين وهيعيش ماتخفش بس المشكله هل الاتراج نفسها كعربيه هتنتشر زي الصني ولا هيكون مصيرها زي اللي قبلها وتلبسها ومتلاقيلهاش قطع غيار بعد كده فمن رايي اسال علي الصني 2015 ولعرف هيا لسه فيها مشاكل الفرامل ولا لا وتوكل علي الله واعمل حسابك من دلوقتي دي عربيه مدينه مش بتاعت جري علي الطرق وسفر بس هيا لو استعمالك ليها هيبقي هادي يعني اخرك 100كم/س هتبقي ممتازه وكمان هيا عربيه واسعه وعائليه عن الاتراج وربنا يكرمك للاصلح

مبدئيا تكنولوجيا الميفك دية مش حاجة جديدة ولا حاجة دي دلواتى بقت حاجة عادية جدا و نازلة في المواتير بس باسماء مختلفة في الهوندا مثلا v tec
المايفك دة بيشتغل بعد 4000 لفة ار بي ام و لما بيشتغل بياثر على عمر الموتور و بيزود في استهلاك البنزين جدا و بعدين هو اصلا الموتور 1200 سي سي يعنى اساسا ضعيف!!

اما الصني الجديدة دي مع احترامي الشديد لملاكها عربية فاشلة جدا لاسباب و مشاكل كتير اوي ممكن حضرتك تتصفح مشاكلها الكتير في المنتدي و على فكرة الكلام دة انا متاكد منة لان مراتى مهندسة في نيسان ايجيبت
عربية هندي تقفيل مصرى!!!!

نصيحتي لصاحب الموضوع لو تقدر تجيب لانسر بومة زيرو افضل 100 مرة و لو مامكنش شوف اوبترا او اي حاجة كورى متجربة

اما لو ممكن تجيب مستعمل طبعا في تويوتا و هوندا عربيات تركب و تحط بنزين و تنساها

اقتباس:

---

المشاركة الأصلية كتبت بواسطة eng f3lix

العربية موجودة وبتتباع .. وانا كان معايا موديل 2007 منها قبل كدة وعارف انها عربية كويسة واكيد مش هنصحه بعربية اي كلام

لو حضرتك متعرفش انها نزلت انصحك تلف عالمعارض وتتفرج عليها

---

السوزوكي ال2007 الياباني ال1600 لا غبار عليها اذا قدرت تستحمل ديق الكنبه الخلفيه و عدم توافر قطع الغيار
اما السوزوكي ال2015 ال 1200 التقفيل الهندي فقدامها علامة استفهام كبيره

خليك في اللوجان نمبر1 ... وسيبك من اي مشاكل ،، النيسان عندك عالاقل مشكلة الاتزان والفرامل ،، مع اللوجان ان شاء الله هتبقي في أمان توكيل ،، اوبشن كتير ،، عربيه محترمه واسعه وعاليه بلس انها موفره اللتر بيعمل 12 كيلو جوا البلد وعال طوالي بيوصل ل 16 كيلو ،، وربنا يوفقك لحسن الاختيار

لو حضرتك عايز عربية اقتصادية وموفرة جدا في البنزين ومانيوال ارشح لك اللوجان الجديدة

العربية نفس المحرك اللي في عربيتي موديل 2010 بتعمل على الطوالي 6 لتر في ال 100 كيلو يعني الصفيحة فوق 300 كيلو
في المدينة بتعمل 8 لتر-8.5 لتر في ال 100 كيلو بتشغيل التكييف والزحام

العربية دي اكتر من موفرة وارخص من الاتراج والصني المانيوال
نفس قطع غيار الموديل القديم في العفشة والماتور
شكل جديد
فيها سماعات بلوتوث مع الموبايل, واخر موديل فيها gps
فيها abs