الموضوع: ايه الدول الكويسة واللى سهل الهجرة لها

سيدي الفاضل


اولا المسالة مش فلوس خالص لاننا بنتكلم هنا عن هجرة العمالة الماهرة ...... البلاد دي مش مستنية 100 و لا 200 الف مني و منك ...... المستثمر بيهاجر بملايين و دي قصة تانية


موضوع الهنود اللي فشلوا بعد الدراسة ...... مين قال ان الدراسة في اي بلد ضمان للهجرة ليها ؟؟؟؟ سيدي الفاضل انت اما بتاخد فيزا بلد بيبقى ليها شروط بمثابة عقد بينك و بين البلد دي ..... اقرا شروط فيزا الدراسة و تعالى نتكلم تاني ....... مفيش فيزا دراسة في العالم بتقول لك تعالى ادرس و هنخليك تعيش هنا للابد

زي ما فيه قصص فشل برضه فيه قصص نجاح بالعبيط و انت ماتعرفش اللي فشل ده فشل ليه ممكن عنده مشكلة او غلطة في ورقه الخ الخ الخ

ثانيا موضوع اللاجئين دي قصة تانية لان دي معاهدة دولية و حوار تاني انك ما ينفعش يجيلك واحد من بلد فيها حرب او اضطهاد الخ الخ الخ (طبعا انا عارف ان فيه لاجئين كتير بيبقوا مستهبلين) و تبعته تاني على بلده عشان يموت هناك ..... ما ينفعش نقيش ده بده

موضوع المصالح طبعا حقيقة و اي بلد بتفتح الهجرة ليها بالمصالح لان هو مصلحته هو اللي تهمه مش مصلحتي انا و لا مصلحتك انت .... البلاد دي كل اللي يهمها رخاءها و رفاهيتها


تاني : لو فتحها عالبحري لاي حد عايز ييجي هيتردم تاني يوم ........ زي كده البوتاجاز من غير منظم عالانبوبة !


و ما تصدقش اصحابك الاوروبيين اوي في الموضوع ده لان فيه ناس ما بتحبش المهاجرين و بتبالغ شويتين تلاتة

موضوع ان مفيش مساواة دي برضه انت بتقارن لاجئ بمهاجر ماهر ما ينفعش ..... ما ينفعش ابعت لاجئ على بلده ..... ارجع لاتفاقيات الامم المتحدة بخصوص اللجوء تاني

موضوع الدراسة و بعده هجرة مش مضمون طبعا لان زي ما قلنا انت بتتكلم في دراسة .......


مين قال لازم تدرس في نفس المجال؟ بس طبعا ما ينفعش تدرس ماجستير في مجال غير مجال بكالوريوسك ....


موضوع خبرة 20 سنة دي واسعة شويتين لاني اعرف ناس كتير هاجرت بلاد كتير من غير كده

مفيش حد بيترفض لو شروطه منطبقة و عدى الكشوف الطبية و الامنية....... فيه قواعد لو انطبقت عليك هتتقبل ......


من الاخر : زي ما انت مش مجبر تجوز بنتك لحد و ممكن ترفض واحد و تقبل واحد - من وجهة نظر الاولاني - اقل منه ...... مفيش بلد مجبرة تقبلك كمهاجر ...... الهجرة و التاشيرات امتياز و ليس حق لأي شخص

المشاركة الأصلية كتبت بواسطة zorg

منتظر الموضوع يازعيم
-------------

اوك يازعيم
------------------

بص انا بقى شايف ان الدول دى بتستهبل دى شروط واجراءات تعجيزية وفى بعض الاحيان بتبقى فيها نذالة
لو المسالة كانت مسالة فلوس فالواحد كان مستعد يبيع اللى وراه واللى قدامه عشان يروح انا كنت هبيع الشقة اللى انا قاعد فيها باقل من قيمتها عشان مسالة الهجرة دى بس الحمد الله مارتكبتش الخطأ الفظيع ده وربنا وقف البيعة من عنده يعنى الدول دى الواحد ممكن يصرف اللى وراه واللى قدامه ومفيش حاجة مضمونة وفعلا قريت قصص لهنود عن فشلهم فى الهجرة لكندا واستراليا بعد مادفعوا دم قلبهم فى الدراسة
ده اولا
ثانيا بحس بازدواجية كبيرة عند الدول دى يعنى تلاقيهم بياخدو اللاجئين الافارقة واللاجئين من بلاد الكوكو واوا بينما بيرفضوا انهم ياخدوا ناس طبيعية اه مش اغنية ولا مليونيرات بس على الاقل مستعدين يروحوا يصرفوا فلوسهم عشان يتعلموا ويشتغلوا ويدفعوا ضرايب - وفى نفس الوقت بحس ان الموضوع بيتم على حسب المصالح يعنى لعلمك السودانيين اللى من جنوب السودات اغلبيتهم بيجوا هنا مصر عشان يطلعوا لجوء على اوروبا بعد كده
كان السنة اللى فاتت اتعرفت على واحد من جنوب السودان فى احدى الدورات وكان جى من سويسرا معاه اقامة دائمة هناك و اهله معاهم الجنسية كلهم قالى ان مثلا السنة دى النرويج هتاخد وحدها 40 لاجىء من سودانيين الجنوب السنة دى يعنى تصور 40 لاجىء الدولة هتنفق عليهم
ده حتى قالى كمان فى وشى : السودانى اما بيروح اى مكان مابيرجعوه المصرى بيرجعوه ده كمان كان بيتكلم عن الطرق غير الشرعية حتى كان فى واحد سودانى تانى معانا قعد يقوله على الاجراءات اللى يطلع بيها فرنسا ويدخل هناك وياخد الاقامة بباسبور مش عارف ايه (كانوا بيتكلموا فى طرق غير شرعية انا مفهمتهاش) وقالوا اول ماتوصل هتتحبس كام يوم وبعد كده هتاخد اقامة وكلام من ده (يعنى كلام كبير وانا بصراحة كنت بتنصت) فى الاخر السودانى بصنى وقالى الطرق دى مش هتنفع معاك (على اساس انى مصرى)

المهم سيادتك بتقول لو الدولة فتحت هتتردم تانى يوم
سيادتك انا كنت بتكلم مع صديق هولندى قالى ان اصلا مهاجرين كتير بيروحو هناك يعيشوا فى الكنائس
واتكلمت مع واحد نرويجى قالى انهم بيكرهوا اللاجئين لانهم عالة على البلد وبياخدوا من الضرايب بتاعت الشعب
وسيادتك روح شوف السويد مناطق بكاملها اصبحت موبوئة بسبب اللاجئين حتى ممكن تدور على اليوتيوب على الفيديوهات بتاعت السويديين اللى بيطالبوا بمحاربة الكلام ده
طيب مادام كده يعنى هما بيسيبوا ناس كتير مستعدة تدفع فلوس وتروح تتعلم وتشتغل ويحطو لهم شروط تعجيزية الى اخره
يبقى فى الحالة دى فى عدم مساواة او بتتم وفقا لاهداف معينة
وخصوصا ان ناس كتير من اللى انا قابلتهم من جنوب السودان يمكن موالين لاسرائيل جامد جدا ده حتى شايفين اننا مش اصحاب الارض فى مصر ومش احنا اللى بنينا الاهرام اغلب شعب جنوب السودان اصلا تلاقى معاهم اكتر من جنسية او حتى هتلاقى حد من العيلة لازم يبقى معاه الجنسية وعايش برة
الحل الوحيد للهجرة للدول دى اما الواحد يبقى مليونير ويستثمر او يبقى عنده خبرة 20 سنة وفى مجال مطلوب هناك ويعرف يجيب عرض عمل قبل حتى مايطلع الى اخره
ده حتى الدراسة فيها صعوبات حتى لو هتطلع تتعلم عندهم وبعد كده تقدم على هجرة حاجات مستفزة جدا
زى لازم المجال اللى هتدرسه يبقى مرتبط بدراستك فى مصر طيب يعنى انا واحد دارس حقوق هروح ادرس حقوق هناك اعمل بيها ايه ابلها واشرب ميتها؟ انا عايز حاجة ادرسها واعرف الاقى شغل بيها
وغير كده الجزء اللى يستفز يقولك لازم تثبت انك هترجع تانى مصر ومش هتخلع اومال انا رايح ادرس عندكم عشان سواد عيونكم مانا عشان اخلع
وممكن حتى لو كل حاجة منطبقة ماتاخدش التاشيرة
وحتى لو اخدتها هل تضمنلى انى بعد مااصرف فلوسى فى دراسة هناك هتأتى بنتيجة؟
انا ساعات بقعد احسبها مع نفسى واقول اللى انا فيه فى مصر ده نعمة من عند ربنا جايز لو اتهورت وبيعت اللى ورايا وقدامى عشان اقامر بالفلوس فى حاجة مش مضمونة جايز ده يبقى كده بتبطر على نعمة ربنا وابقى مرضيتش باللى ربنا كتبهولى فساعاتها الله واعلم باللى هيحصل وساعتها هرجع مصر اشحت
وده يمكن قليل القليل القليل من القرف بتاعهم ده بدون الدخول فى المشاكل التانية