ايه الدول الكويسة واللى سهل الهجرة لها

**zorg** · 26-07-2014 05:45 PM

انا عضو جديد معاكم
صراحة اللى خلانى اسجل هنا فى المنتدى هو القسم الاجتماعى فيه مواضيع حلوة
عموما كنت عايز اتناقش فى الدول الكويسة للهجرة واللى سهل الهجرة لها
واهم حاجة تكون الناس عندها اخلاق مش همج - الرعاية الصحية ودى اهم حاجة اللى الواحد شايل هم لو تعب هيعمل ايه فى مصر - تكاليف المعيشة المنخفضة وسهولة ايجاد عمل او انشاء بيزنس بتكاليف بسيطة -وتكون صالحة لو حد معاه بنات وكده
بس بعيدا عن الدول الاوروبية وكندا واستراليا والدول دى لانى بحثت فيها لمدة سنتين ومن الاخر شروطهم تعجيزية ومش بمزاجك ولو قدرت حتى تعمل كل حاجة حلنى بقى فى الاجراءات فبصراحة كرهت الدول دى جدا وحسيت انهم بيعاملونا كالكلاب بس هقول ايه احنا اللى مرخصين نفسنا
انا حبيت اتناقش لو حد عنده خلفية جايز يبقى فى حاجة على الخريطة الواحد مشفهاش ولا حاجة :)
ولو حد برضه عنده خلفية عن ماليزيا وراح هناك يقولنا رايه ايه

**MaZaGAngeE** · 26-07-2014 06:04 PM

متابع عشان عايز اهج من هنا

**al_manara** · 26-07-2014 08:51 PM

اهلا بك عضو جديد .

اظن مفيش بلد كويسة سهل الهجرة ليها .

احنا اخرنا الصومال وماشابة .

ربنا يرحمنا

**Secret-Man** · 27-07-2014 12:05 AM

قبل ماتفكر فى البلد فكر فى نفسك انت رايح تعمل ايه وناوى على ايه ومهاراتك او وظيفتك ايه علشان تعرف تاكل عيش وتعيش كويس والا هتبقى جحيم اكتر من مصر لانهم مش واقفين فى المطار يدوك فلوس

**Bassem Youssef** · 27-07-2014 12:13 AM

حضرتك ممكن تفكر في دار السلام بتنزانيا

ان شاء الله عما قريب هعمل موضوع منفصل بكل المعلومات اللي عندي

**mcomics** · 27-07-2014 12:35 AM

متهيالي آزاربيجان، السياحة هناك شغلها كويس على حد علمي، و الفيزا سهلة للمصريين، ده غير تكاليف اسفر والاقامة اكيد معقولين مقارنة ببلاد تانية…. لو عرفت اي معلومات زيادة عنها اكيد هقولك ان شاء الله

**أحمد كمال** · 27-07-2014 04:32 AM

من الاخر ... سؤالك عامل زي اللي بيقول انا عايز عربية نضيفة و سريعة و صيانتها رخيصة و زيرو و واسعة و ب 30 الف بس

بلد نضيفة = الهجرة ليها مش هتبقى سهلة (و الا هتتردم مهاجرين تاني يوم و مس هتفضل نضيفة)

و لاجل الورد ينسقي العليق ..... عايز تهاجر بلد نضيفة استحمل سآلة اجراءاتهم و الاوراق و الفلوس و غيره ......

**zorg** · 27-07-2014 05:27 AM

حضرتك ممكن تفكر في دار السلام بتنزانيا

ان شاء الله عما قريب هعمل موضوع منفصل بكل المعلومات اللي عندي

منتظر الموضوع يازعيم
-------------

متهيالي آزاربيجان، السياحة هناك شغلها كويس على حد علمي، و الفيزا سهلة للمصريين، ده غير تكاليف اسفر والاقامة اكيد معقولين مقارنة ببلاد تانية…. لو عرفت اي معلومات زيادة عنها اكيد هقولك ان شاء الله

اوك يازعيم
------------------

من الاخر ... سؤالك عامل زي اللي بيقول انا عايز عربية نضيفة و سريعة و صيانتها رخيصة و زيرو و واسعة و ب 30 الف بس

بلد نضيفة = الهجرة ليها مش هتبقى سهلة (و الا هتتردم مهاجرين تاني يوم و مس هتفضل نضيفة)

و لاجل الورد ينسقي العليق ..... عايز تهاجر بلد نضيفة استحمل سآلة اجراءاتهم و الاوراق و الفلوس و غيره ......

بص انا بقى شايف ان الدول دى بتستهبل دى شروط واجراءات تعجيزية وفى بعض الاحيان بتبقى فيها نذالة
لو المسالة كانت مسالة فلوس فالواحد كان مستعد يبيع اللى وراه واللى قدامه عشان يروح انا كنت هبيع الشقة اللى انا قاعد فيها باقل من قيمتها عشان مسالة الهجرة دى بس الحمد الله مارتكبتش الخطأ الفظيع ده وربنا وقف البيعة من عنده يعنى الدول دى الواحد ممكن يصرف اللى وراه واللى قدامه ومفيش حاجة مضمونة وفعلا قريت قصص لهنود عن فشلهم فى الهجرة لكندا واستراليا بعد مادفعوا دم قلبهم فى الدراسة
ده اولا
ثانيا بحس بازدواجية كبيرة عند الدول دى يعنى تلاقيهم بياخدو اللاجئين الافارقة واللاجئين من بلاد الكوكو واوا بينما بيرفضوا انهم ياخدوا ناس طبيعية اه مش اغنية ولا مليونيرات بس على الاقل مستعدين يروحوا يصرفوا فلوسهم عشان يتعلموا ويشتغلوا ويدفعوا ضرايب - وفى نفس الوقت بحس ان الموضوع بيتم على حسب المصالح يعنى لعلمك السودانيين اللى من جنوب السودات اغلبيتهم بيجوا هنا مصر عشان يطلعوا لجوء على اوروبا بعد كده
كان السنة اللى فاتت اتعرفت على واحد من جنوب السودان فى احدى الدورات وكان جى من سويسرا معاه اقامة دائمة هناك و اهله معاهم الجنسية كلهم قالى ان مثلا السنة دى النرويج هتاخد وحدها 40 لاجىء من سودانيين الجنوب السنة دى يعنى تصور 40 لاجىء الدولة هتنفق عليهم
ده حتى قالى كمان فى وشى : السودانى اما بيروح اى مكان مابيرجعوه المصرى بيرجعوه ده كمان كان بيتكلم عن الطرق غير الشرعية حتى كان فى واحد سودانى تانى معانا قعد يقوله على الاجراءات اللى يطلع بيها فرنسا ويدخل هناك وياخد الاقامة بباسبور مش عارف ايه (كانوا بيتكلموا فى طرق غير شرعية انا مفهمتهاش) وقالوا اول ماتوصل هتتحبس كام يوم وبعد كده هتاخد اقامة وكلام من ده (يعنى كلام كبير وانا بصراحة كنت بتنصت) فى الاخر السودانى بصنى وقالى الطرق دى مش هتنفع معاك (على اساس انى مصرى)

المهم سيادتك بتقول لو الدولة فتحت هتتردم تانى يوم
سيادتك انا كنت بتكلم مع صديق هولندى قالى ان اصلا مهاجرين كتير بيروحو هناك يعيشوا فى الكنائس
واتكلمت مع واحد نرويجى قالى انهم بيكرهوا اللاجئين لانهم عالة على البلد وبياخدوا من الضرايب بتاعت الشعب
وسيادتك روح شوف السويد مناطق بكاملها اصبحت موبوئة بسبب اللاجئين حتى ممكن تدور على اليوتيوب على الفيديوهات بتاعت السويديين اللى بيطالبوا بمحاربة الكلام ده
طيب مادام كده يعنى هما بيسيبوا ناس كتير مستعدة تدفع فلوس وتروح تتعلم وتشتغل ويحطو لهم شروط تعجيزية الى اخره
يبقى فى الحالة دى فى عدم مساواة او بتتم وفقا لاهداف معينة
وخصوصا ان ناس كتير من اللى انا قابلتهم من جنوب السودان يمكن موالين لاسرائيل جامد جدا ده حتى شايفين اننا مش اصحاب الارض فى مصر ومش احنا اللى بنينا الاهرام اغلب شعب جنوب السودان اصلا تلاقى معاهم اكتر من جنسية او حتى هتلاقى حد من العيلة لازم يبقى معاه الجنسية وعايش برة
الحل الوحيد للهجرة للدول دى اما الواحد يبقى مليونير ويستثمر او يبقى عنده خبرة 20 سنة وفى مجال مطلوب هناك ويعرف يجيب عرض عمل قبل حتى مايطلع الى اخره
ده حتى الدراسة فيها صعوبات حتى لو هتطلع تتعلم عندهم وبعد كده تقدم على هجرة حاجات مستفزة جدا
زى لازم المجال اللى هتدرسه يبقى مرتبط بدراستك فى مصر طيب يعنى انا واحد دارس حقوق هروح ادرس حقوق هناك اعمل بيها ايه ابلها واشرب ميتها؟ انا عايز حاجة ادرسها واعرف الاقى شغل بيها
وغير كده الجزء اللى يستفز يقولك لازم تثبت انك هترجع تانى مصر ومش هتخلع اومال انا رايح ادرس عندكم عشان سواد عيونكم مانا عشان اخلع
وممكن حتى لو كل حاجة منطبقة ماتاخدش التاشيرة
وحتى لو اخدتها هل تضمنلى انى بعد مااصرف فلوسى فى دراسة هناك هتأتى بنتيجة؟
انا ساعات بقعد احسبها مع نفسى واقول اللى انا فيه فى مصر ده نعمة من عند ربنا جايز لو اتهورت وبيعت اللى ورايا وقدامى عشان اقامر بالفلوس فى حاجة مش مضمونة جايز ده يبقى كده بتبطر على نعمة ربنا وابقى مرضيتش باللى ربنا كتبهولى فساعاتها الله واعلم باللى هيحصل وساعتها هرجع مصر اشحت
وده يمكن قليل القليل القليل من القرف بتاعهم ده بدون الدخول فى المشاكل التانية

**Ahmed_Rahem** · 27-07-2014 09:46 AM

كنت لسة قارى موضوع فى منتدى تانى والخلاصة، الهجرة محتاجة 3 عناصر رئيسية
1- الورق - إقامة شرعية حسب قوانين البلد الى انت مهاجر ليها، وتستحمل إجراءاتهم أياً كانت.
2- اللغة - من غير لغة البلد انت عالة وملكش عوزة ومش هتعرف تتعامل.
3- مهنة او صنعة - لو انت شخص مهنى (مهندس، دكتور، محاسب، محامى) قوى نفسك فى مجالك وخد شهادات مهنية دولية - سيبك من الشهادات المحلية. او لو انت واحد حرفى (نقاش، لحام) قوى نفسك فى المهنة وكون محترف فيها.

بالعناصر دى أى مكان هتروحة هتعرف تشتغل، معاك لغة عتعرف تتعامل ومتكونش تحت رحمة حد، معاك ورق قانونى، اى مكان هيرحب بيك ومش هتطر تشتغل فى بير السلم ودايماً خايف، معاك مهنة او صنعة ومتمكن منها، هتلاقى شغل فيها وهتعرف تعيش.
دة مش احباط بس غير كدة هتكون مغامرة غير مأمونة العواقب، هتلاقى استغلال فى شغل اى كلام وهتكون معزول عن باقى الناس وهتعيش وحيد وممكن إكتئاب.

الحسبة الصح تبتدى الاول بشهادتك - خد شهادات مهنية دولية او على الاقل معترف بيها برة، وكل واحد فى مجالة اكيد فية شهادات كتير، قوى لغتك للدولة الى انت رايحها - او مختارها - ابداء إجراءاتها واستحمل، اى اجراءات هجرة انت بتتكلم فى فترة مش هتقل عن سنة - دة لو انت محظوظ، من غير وقت التحضير من شهادات ولغات يعنى الهجرة الفعلية مشروع عايز على الاقل تحضير سنة واجراءات سنتين - دة على فرض ان كل حاجة مشيت تمام.

من معارفى فية الى هاجر واغلبة بيتأقلم بس كلهم معاهم الثلاث نقاط الى فوق دول، وعلشان كدة المقارنة مع الهجرة غير الشرعية مقدرش احكم عليها.

والسلام ختام

الموضوع: ايه الدول الكويسة واللى سهل الهجرة لها

LinkBack

أدوات الموضوع

عرض

-

-

-

-

-

المواضيع المتشابهه

الى كل من يريد الهجرة ... الهجرة جاتلك !!!

تعرفوا المطاعم الكويسة فى المنصورة

مساجد كتب الكتاب الكويسة فى مصر

افتحوا الأنوار غدا و لا تشاركوا فى مؤامرة الدول الصناعية على الدول المنتجة للبترول

ايه انواع فلاتر المياه الكويسة

الكلمات الدلالية لهذا الموضوع

المفضلات

المفضلات

ضوابط المشاركة