الموضوع: سؤال كيف نتلافى احتراق السيارة لا قدر الله ؟

المشاركة الأصلية كتبت بواسطة kefafy

السلام عليكم ورحمه الله وبركاته
ده سؤال موجه الى خبرائنا اعانهم الله
امبارح كان ليا صديق كان لسة مخلص عمرة للعربية بتاعتة
ووداها للسروجى شدها شده تمام
وبعد مخدها من السروجى
ربنا يحفظنا جميعا ويكفينا شر الغافلة
وهو بيركن عربيتة لقا دخان من التابلوة طالع
نزل جرى من العربية
وقام بفصل طرفى البطارية
ولما اخبرنى بان العيب من الضفيرة وبعدها ودها للكهربائى
قلت نستفسر من خبرائنا ازاى الواحد يتلافى القفلة بتاعة الضفيرا دى
وازاى نتلافى ونعمل عملية صيانة وقائية من الاسباب المسببة للحريق
وده طبعا عشان تعم الفائدة لكل اخواتنا بالمنتدى الكريم
عربية صديقى ده كانت هوندا سيفيك موديل 84
وجزاكم الله خيرا

للاسف فيه فكره خاطئه ان الفيوزات لوحدها كفيلة بمنع الحرائق داخل السيارة

سبب الاشتعال واحد من اثنين لا ثالث لهما
الاول : مرور تيار اكبر من قدرة تحمل السلك و بالتالى يولد حراره تؤدى الى اشتعال العزل

الثانى:حدوث تشقق فى عزل السلك يؤدى الى مرور تيار بين السلك وجسم السيارة مما يؤدى الى تسخين العازل و الاشتعال

عندما يشتعل العازل تتحول الحريقه من حريقه كهربائية الى حريقة كيميائيه و لا يفيد عندها فصل البطاريه

طيب ازاى نمنع الحرائق ... سهل جدا ...
1- استخدام اسلاك خاصة بالسيارات و ليس الاسلاك العادية اللى بنستعملها فى البيوت علشان بتفرق فى درجة استحمال الحرارة العاليه و كذلك العازل مقاوم لتاثير الزيوت و بخار البنزين و لا يتشقق مع الحرارة .. وكذلك العازل مصنوع من مادة ذاتية الاطفاء

2- استخدام مقطع سلك مناسب للحمل المركب علية حسب الجداول الخاصة باسلاك السيارات و ليست الجداول الخاصة بالبيوت

3- استخدام فيوز (اصغر و ليس اكبر) من السلك ... فيه ناس لما الفيوز بيضرب بتعمل حاجه غلط انها تحط فيوز اكبر او تعمل تشعيرة و تنسى السلك اللى ممدود ... الهدف من الفيوز انه يضرب قبل ما السلك يسيح مش العكس

4- عند مرور السلك بجوار معدن سخن (مثلا سلك حساس الشكمان او الموتور) يتم امراره داخل مكرونه مخصوصة

5- الفيوز موجود فقط لحماية السلك (الموجب) اما سلك الارضى لا توجد عليه حماية ... مش معنى انه ارضى انه ما يتحميش ... السلك الارضى لو عدا فيه تيار كبير برضة حيسخن و حيسيح و حيشتعل

6- تغطية قواطيش البطاريه و خصوصا لو كانت قريبه من صاج الكبوت

7- تنظيف غطيان البطارية السائلة بتاعة تزويد الميه بواسطة ابره لتجنب الانفجار فى حالة حدوث شورت داخلى داخل البطارية

8- يمنع عمل وصلات فى سلك الضفيرة ... كل حمل يجب ان يكون له السلك الخاص به و الفيوز المناسب

9- يمنع استخدام سلك ارضى اقل من الاحمال المركبة

10- يمنع استخدام شكرتون غير خاص بالسيارات .. برضه علشان ما ينشفش

اتمنى للجميع السلامه و اعذرونى ان كنت نست حاجة

المشاركة الأصلية كتبت بواسطة kefafy

جزاك الله خيرا وبارك الله لك فى علمك
ومش عارف اشكر حضرتك ازاى
بس انا كشخص مفهمش فى المكيانيكة او كهربة السيارة
ازاى افرق مبين ان السلوك الموصلة بالسيارة بتاعتى سلك مجهز للتركيب فى السيارة وليس سلك عادى زى الى فى البيت
سواء شكلة مثلا بيبقا ازاى هل العزل بتاعه بلاستيك عادى ولا زى سلك المكرونة مثلا الحرارى
؟
ولو اكتشفت انه سلك عادى اعمل ايه ؟ هل اشترى مثلا سلك مجهز جديد ولا لازم اشترى ضفيرة كاملة جديدة ؟
وجزاكم الله خيرا
وشكرا لحضرتك

جزاك الله خيرا اخى الكريم

بالنسبة للاسلاك فكل اللى فى السوق لا يصلح تماما لكهربة السيارة (الاسلاك اللى فى السوق معزولة PVC و دى ما ينفعش تشتغل فى درجة حرارة اعلى من 95 درجة مئويه ... يعنى ينفع بس تستخدمها فى توصيل اسلاك التابلوة او النور الخلفى لاكن ما ينفعش تركيبها داخل حوض الموتور ) ان ليا واحد صاحبى بيشتغل فى شركة ليوني اللى بتعمل ضفاير العربيات اللى بتتجمع فى مصر حاسأله ازا الاسلاك دى بتتباع فى التوفيقية واللا فين بالظبط

بالنسببة للسلك ... حضرتك تاخد عينة و تولع فيها بالكبريت لمدة 20 ثانية لحد ما الاشتعال يبقى مؤكد و تشوف حينطفي لوحده واللا لا
تحياتى