الموضوع: اتقلبت بالنيو صنى 2014 فى حادث بشع و توتال لوس ... افيدونى

بسم الله الرحمن الرحي

اولا كل سنة وانتوا طيبين جميعا وربنا يجعل ايامكوا كلها اعياد

اللى حصل انى عملت حادثة على طريق البحر الاحمر "طريق رايح جاى" فى ملف .
مكروباص كان جاى فى الاتجاه المقابل بسرعة عالية وهو بياخد الملف الله اعلم كان نايم ولا الملف مخدوش بسبب سرعته المهم جه فى وشى بالظبط على بعد امتار بسيطة منى كل اللى لحقت اعمله انى اخدت يمينى عالاخر فالحمد لله الخبطة مجتش وش فى وش ، جت فى جنب العربية عند الكاوتش الامامى كل اللى فاكره ان العربية بعدها لفت لفات كتير حوالين نفسها بسرعة جنونية وبعدين رجعت ورا بنفس السرعة ربنا وحده يعلم حالتى ساعتها وكنت بفكر فى ايه ، بعدها اتقلبت فى الصحرا اللى على جانب الطريق مع العلم ان مستوى الرمل تحت مستوى الطريق بحوالى متر ونص
كل اللى فاكره انى مكنتش عامل حاجة غير انى ماسك الدريكسيون بايدى الاتنين وشايل رجلى من الفرامل والبنزين ومغمض عينى منتظر مصيرى ، فتحت عينى لقيت العربية واقفة فى الصحراء على العجل عادى ولقيتنى صاحى والحمد لله اطمنت انى محصليش حاجة انا وصاحبى اللى كان راكب جمبى غير جروح سطحية بسبب الزجاج المتطاير

اللى حصل فى العربية كالاتى ، الصاج الخارجى من كل الجوانب بقى عامل زى الورقة المتكرمشة ، 4 ابواب متهالكة ، الفوانيس مش موجودة الا فانوس واحد وموجود من غير الازاز ، الاربع كاوتشات بقوا بالعرض من كتر ما العربية لفت " الكاوتش الامامى اللى ناحيتى فصل من المقصات ، الربع اللى ورا راح ، كل دا والموتور فى مكانه وشغال والمقصورة من جوة محصلهاش اى حاجة تقريبا "عشان كدا فضلنا عايشين الحمد لله" والاير باج ما فتحش

المهم مافاتش عالحادثة ربع ساعة وجه البوكس نزل منه ناس فكوا نمر العربية واخدوا منى الرخص والبطاقة وجابو ونش اخد العربية على المرور لغاية ما خلصنا اجراءات المحضر والنيابة والمهندس الفنى عمل حصر بتلفيات العربية وبعدها اخدنا عربيتنا ورخصنا وجبنا ونش شال العربية على اوتو ايجيبت ابو رواش
هناك طبعا قالولنا توتال لوس
المهم دلوقتى طبعا الواحد اولا واخيرا بيحمد ربنا انه عاش بعد الحادثة دى خصوصا ان مفيش حد شاف العربية غير وسألنا طلعتوا منها ازاى يعنى ربنا سترها مع الواحد اوى الحمد لله

السؤال : انا مأمن تبع مصر للتأمين تأمين شامل والعربية صنى اى اكس صالون 2014 سعرها فى بوليصة التأمين 109500 ، هيحسبولى نسبة كام ؟ ,,, عشان انا سمعت ان الموضوع تقديرى ومفيش قانون يحكم النسبة اللى باخدها من الفلوس ، فعايز الله يكرمكوا اى حد عنده خبرة فى موضوع التأمين دا يفيدنى ويقوللى ازاى اتعامل مع الجماعة بتوع التأمين دول بحيث اخد حقى كامل من غير ما يلفوا ويدوروا عليا ؟؟؟ مع العلم ان العربية تقسيط على بنك

اتمنى حد يفيدنى

انا اسف طولت عليكم

كل سنةوانتوا طيبين مرة تانية