عندي مشاكل في العربية مش عارف سببها

**محمد فؤاد تركي** · 29-07-2014 01:09 AM

كشفت عليها فعلا بالكمبيوتر والحمد لله مكنش فيه حاجة ده حتي الصنيعي قال احنا بنعمل Reset للكمبيوتر وأكتف مرة أخري عشان يتعامل مع الحساسات كويس لكن مازالت العربية بتبطل في السلانسية
عموما في ميكانيكي قالي الرشاشات عاوز يتكشف عليها هل الكلام ده صح أما بخصوص الفلاش فبلاش منه خالص طالما هيضر الماتور

**mhemoo_sale** · 29-07-2014 01:47 AM

اية هيا مشاكل الفلاش دا عشان انا برضو عندي صوت في المكنة من جوه تك تك تك تك تك كده برحت الميكانيكي قالي عايز طقم بلوف ب 500 جنية

**posily** · 29-07-2014 03:43 AM

المشكله دي كانت عندي
عمود كامه + صبابات

**محمد فؤاد تركي** · 29-07-2014 10:13 AM

العربية عذبتني لغاية لما دارت النهاردة الصبح وهي بارده
العربية تشتغل 5 أو 10 ثواني وتبطل وارجع ادور تاني تشتغل 5 أو 10 ثواني وتبطل فضلت كده 6 أو 7 مرات لغاية لما ابتدت تسخن شوية وبعدين مبتطلتش تاني ... انا في مصيف والنهاردة تاني يوم العيد دلوئتي وخايف لتعمل حاجة معايا والمشكلة دي دايما بتحصل لما تكون العربية باردة وانا مش عارف اعمل ايه ؟؟؟

**ابو ايهم** · 29-07-2014 12:23 PM

المشاركة الأصلية كتبت بواسطة محمد فؤاد تركي

العربية عذبتني لغاية لما دارت النهاردة الصبح وهي بارده
العربية تشتغل 5 أو 10 ثواني وتبطل وارجع ادور تاني تشتغل 5 أو 10 ثواني وتبطل فضلت كده 6 أو 7 مرات لغاية لما ابتدت تسخن شوية وبعدين مبتطلتش تاني ... انا في مصيف والنهاردة تاني يوم العيد دلوئتي وخايف لتعمل حاجة معايا والمشكلة دي دايما بتحصل لما تكون العربية باردة وانا مش عارف اعمل ايه ؟؟؟

اخي محمد
كل عام وانت بخير اولا

حسب خبرتي المتواضعة المشكلة اللي عندك هي مشكلة حساسات وتنظيم كمية الوقود مع الهواء
لذلك هنالك ثلاثة اشياء يجب تشييكها :

1- حساس الايدل ... يجب تنظيفة
2- حساس o2s (حساس الشكمان) يجب تبديلة
3- حساس درجة حرارة المحرك وحساس درجة حرارة الهواء الداخل للمحرك

**محمد فؤاد تركي** · 29-07-2014 06:55 PM

بارك الله فيك يا أخي
أنا رحت النهاردة لميكانيكي وقالي العيب بنسبة 90% من الكويل بيهرب كهرباء والكويل ده اللي بيركب فيه الــ أربع سلوك بتوع البوجيهات قالي هتغيرة بواحد تاني وهتغير كمان كابل البوجيهات ومش هتحصل معاك المشكلة دي بس انا خايف اشتري كويل جديد وكابل جديد وبردو المشكلة تفضل موجوده
ايه رأيكم يا شباب

**محمد فؤاد تركي** · 02-08-2014 01:32 PM

2- المشكلة التانية :-
العربية بتبطل في السلانسية يعني لو العربية ركنت مثلا في الجراج لمدة يوم وجيت ادورها الصبح وهي باردة تدور ولكن بعد شوية صوت الموتور يوطي وبعدين تبطل ممكن تعمل معايا كده كذا مرة لغاية لما تدور وامشي بيها ومتعملهاش تاني وتقريبا الموضوع ده بيحصل لما تكون العربية باردة وبعدين اشغلها لكن بعد تدور وتمشي العملية بتبقي كويسة بس لما بقف في اشارة ساعات بتبطل

3- المشكلة الثالثة :-
بلاحظ ان صوت العادم اللي خارج من العربية مش ماشي علي نغمة واحدة من الخلف
يعني ممكن ينتش شوية ويرجع يتعدل تاني وده بيبقي وانا واقف بردو علي السلانسية بس

4- المشكلة الرابعة :-
لما بشغل التكييف وبردو العربية واقفة علي السلانسية بسمع صوت تنتيش ظاهر جوه الكابينة لكن لما بمشي مش بسمع التنتيش ده ولما بقف تاني والتكييف شغال بسمع التنتيش ده

الحمد لله تم حل المشكلة الثانية والثالثة والرابعة مرة واحدة بتغيير سلك البوجيهات وشراء واحد جديد وركبته بنفسي

1- المشكلة الاولي :-
فيه صوت تكتكة في منقطة الهيد بتاع الماتور من فوق والتكتكة دي مزعجة جداً
رحت لميكانيكي وقالي دي حاجة اسمها كستوبونات لازم تتغير ورحت لميكانيكي تاني قالي عمود الكامة عاوز يتغير وده هيبقي سعرة 800 جنيه وانا مش عارف السبب من الكستبونات أو عمود الكامة

المشكلة الاولي سببها عمود الكامة أو الكستوبونات ودي عاوزه ميكانيكي شاطر يظبط الفيلم وان شاء الله هعملها لما أوفر لها مبلغ كويس عشان احتمال تتكلف 1000 أو 1500

**محمد فؤاد تركي** · 10-08-2014 06:17 AM

1- المشكلة الاولي :-
فيه صوت تكتكة في منقطة الهيد بتاع الماتور من فوق والتكتكة دي مزعجة جداً
رحت لميكانيكي وقالي دي حاجة اسمها كستوبونات لازم تتغير ورحت لميكانيكي تاني قالي عمود الكامة عاوز يتغير وده هيبقي سعرة 800 جنيه وانا مش عارف السبب من الكستبونات أو عمود الكامة

الحمد لله
المشكلة الاولي والاخيرة اتحلت
رحت امبارح للمركز الكوري في بنها عندنا المهندس بهاء النجار
والمشكلة كان فيه تآكل في عمود الكامة وتآكل في الكراسي اللي تحتيه
المهم
غيرنا عمود الكامة بالمبيت بتاعة استيراد + طقم كراسي جديد وكان فيه بلف واحد بس بايظ غيرناه والحمد لله
صوت التكتكة اختفي تماماً وبقي صوتها ناعم زي الاول
التكلفة 1100 جنيه