اريد شراء ارض في التجمع الخامس, ايه رأيكو؟؟؟

hh · 19-10-2008 01:37 PM

يا ريت الناس اللي تعرف التجمع كويس, انا بافكر اشتري ارض في منطقة المستثمرين الشمالية ,في الجزء القريب من شارع ال90. يا ترى المنطقة دي كويسة و لا لأ و متوسط سعر المتر تقريبا؟؟ هي حتكون عشان بناء شقق ليا و لاخواتي و ممكن جزء نبيعه. تفتكروا المنطقة استثمار كويس ولا بلاش؟

**mohamed** · 19-10-2008 01:54 PM

اكيد طبعا يا باشا فكرة رائعة احنا بانيين هناك خلف شركة الغاز كده , ربنا يوفقك
احنا شاريين من فترة طويلة ومعرفش السعر وصل كام لو عايزنى اسالك انا تحت امرك

hh · 19-10-2008 02:53 PM

أخي محمد. اشكرك بشدة علي سرعة الرد. يا ريت لو حضرتك تقدر تسأل على الاسعار هناك اكون شاكرة ليك. طيب حضرتك المنطقة اللي انا بأقول عليها دي حلوة و لا لأ؟ و قريبة و لا بعيدة عن العمران؟

hh · 19-10-2008 04:21 PM

فين الردود يا شباب؟؟؟؟؟؟

**hussein** · 19-10-2008 08:45 PM

المنطقة كويسه طبعا
انت قصدكهتشترى فى عمارات الفدا بتاعت القوات المسلحة ولا فيين بالظبط

**شريف** · 19-10-2008 09:54 PM

بص يا باشا هى كويسة لعدة اسباب
1-المنطقة دى فيها مهلة كويسة لانها من اخر المناطق اللى اتسلمت
2-المنطقة دى عمارات مش فلل على مااعتقد و بكدة هتكسب اربعة ادوار + البدروم طبعا
3-سعرها هيكون حنين من مناطق اخرى اقرب للدائرى مهلتها انتهت او اوشكت على الانتهاء
4-قريبة من المصراوية و جامعة المستقبل و بعديها الجامعة الامريكية من الجنوب و الرحاب من الشمال

عيبها
1-المنطقة بعيدة عن الدائرى وبعديها منطقة لسة صحراء ملك المقاولون العرب
2-متتوقعش انك هتقدر تسكن هناك قبل الخمس سنين على الاقل

ممكن تشوف الاحداثيات دى من على جوجل ايرث

30° 1'45.41"n
31°28'45.24"e

hh · 20-10-2008 01:06 PM

اشكركم جميعا على الردود. استاذ حسين انا عايزة اشتري ارض مش شقة.

سؤال تاني, المفروض ان الورق بتاع الارض دي تبع جهاز المدينة. يا ترى فين جهاز المدينة ده عشان الواحد يروح يسأل و يتأكد من الاوراق؟

**hussein** · 20-10-2008 05:03 PM

انا عارف ان حضرتك عايز تشترى ارض
انا قصدى فى اراضى العمارات ولا الفيلات لأن المنطقة اللى حضرتك بتشرحها دى اسمها عمارات الفدا (وطبعا فيها اراضى كتير لسة متبنتش)
جهاز المدينة : لو حضرتك جاى من شارع ذاكر حسين وداخل الدائرى هتاخد يمينك كأنك رايح كارفور هتعدى من اول نفق و بعدين هتلاقى نفق على يمينك هتزلو و تاخد شمالك فيه لحد اما تتطلع منه تسيب اول ميدان يقابلك (ميدان صغير اوى) و تانى ميدان هتلاقى الجهاز قدامك
واى خدمه تحتاجها انا كل شغلى فى التجمع ابعتلى و ان شاء الله اساعدك

hh · 20-10-2008 05:29 PM

المشاركة الأصلية كتبت بواسطة hussein

انا عارف ان حضرتك عايز تشترى ارض
انا قصدى فى اراضى العمارات ولا الفيلات لأن المنطقة اللى حضرتك بتشرحها دى اسمها عمارات الفدا (وطبعا فيها اراضى كتير لسة متبنتش)
جهاز المدينة : لو حضرتك جاى من شارع ذاكر حسين وداخل الدائرى هتاخد يمينك كأنك رايح كارفور هتعدى من اول نفق و بعدين هتلاقى نفق على يمينك هتزلو و تاخد شمالك فيه لحد اما تتطلع منه تسيب اول ميدان يقابلك (ميدان صغير اوى) و تانى ميدان هتلاقى الجهاز قدامك
واى خدمه تحتاجها انا كل شغلى فى التجمع ابعتلى و ان شاء الله اساعدك

شكرا للتوضيح. انا معرفش بالضبط, هو الموضوع ده عن طريق سمسار و حسب وصفه المنطقة عند شارع التسعين قريب من الجامعة الامريكية. المفروض ان في اشخاص عارضين اراضي شارينها تبع جهاز المدينة و بيبعوها و هو وسيط. يا ريت لو حضرتك عندك فكرة عن الاسعار في المنطقة دي, و هل لسة فيه اراضي بتتباع عن طريق جهاز المدينة مباشرة؟ هو بيقول مفيش مهلة بناء بس انا متوقعة ان الكلام ده مش صح.

**hussein** · 20-10-2008 05:59 PM

فى كلام عن نزول اراضى قرعة قريب اوى وهيكون فيه فى التجمع و معظم المدن الجديدة
الاسعار طبعا مختلفة على حسب الموقع و على حسب طبيعة المبنى(عمارة او فيلا)
منطقة المستثمرين دى مخصصة للمستثمرين فمعظمهم بيعملوها منتجعات وقليل اوى لو لقيتى حد بيبع اراضى فيها
الاسعار عموما بتبدأمن 2000(بس فى الغالب الاراضى اللى بالسعر دا بتكون فيها عيب زى مثلا انها تكون قريبه من محطة صرف صحى )
وبتوصل ل 3500 مثلا لو فيلات و 4000 لو عمارات
اراضى الفيلات نفسها بيتبنى عليها وبتتقسم شقق عادى جدا اهم حاجة متزيدش عن ارضى و دورين
واسف انى كلمتك على انك رجل لانى لسه عارف انك البشمهندسه هبه :)