الموضوع: تعليقاتكوا بخصوص تكييف ايمى بعد شهوووور الحر الى فاتت

أنا واحد من ممتلكي الأيمجراند صحيح بس الكدب خيبة ماقدرش أحكم أو أقيم بصورة عقلانية

لأنني ببساطة طول عمري باركب كنب أبتداءا من السيات 133 مروراً بأل127 وأخيرا أل 128....وطبعاً أيام الحر الشديد كنت بقضيها أزازة مية متلجة وأدلقها علي دماغي بعد ماطلعها من الشباك...أو أجيب كرتونة تخينة شوية وأقعد أهوي بيها لحد ما دراعي يقف!!!! وأخر أفتكاسة أني نزلت التوفيقية وأشتريت المروحة أم 65 وخرمتلها في التابلوه وأهي الشهادة لله جابت طراوة شوية

عشان كدا بالنسبالي الجيلي وتكيف الجيلي وخفة دم الجيلي وكل مايمت بصلة للجيلي حاجة ماحصلتش وسبحان من سخر لنا هذا.....(بي أم) ياخواتي الفئة العاشرة؟؟؟؟

المشاركة الأصلية كتبت بواسطة midooo_119

بس تقدر تقولنا فالصيف و الحر التكييف بيسقع و لا لأ زى تكييف البيت كده

بصراحة التكيف جميييييييل أوييييييييي وفي عز الحر 3شرط بيظبطوني....لكن بالليل شرطتين بيقوموا بالواجب وزيادة....بس كل المشكلة الهوا السخن اللي بيطلعوا أول ماتيجي تشغله بالنهار..وبصراحة خايف ألعب في زرار الدورة الخارجية والداخلية ده....مخليه علي (لو) ومظبطه علي كدا

المشكلة بأه يا معلم في سحب العربية اللي بيروح في 60 داهية أول ماتشغل التكيف وطبعاً ساعتها مابتجمعش عدل وبما يرضي الله ألا علي 3 أو 3.5 أر بي أم....ويمكن اللي بيساعد شوية خاصية السمارت درايف اللي بتخلي التكيف يفصل أول ماتحتاج عزم جامد

وبكره عندي صيانة أل1000كيلو في غبور ومجهز ورقة فيها كل المشاكل البسيطة اللي قابلتني...بس الأكيد أني هاخليهم يغيروا الزيت المنيل بتاع الباور وكمان زيت الفتيس عشان عندي المارشيديه فيه زعقه خفيفة قد تكون من الزيت أو الدبرياج محتاج يتعلي...وكمان دراع النور أبتدي يستهبل والنور ساعات بيطفي لوحده ويرجع تاني لما أهز الدراع هزه خفيفة

المشاركة الأصلية كتبت بواسطة midooo_119

ماتحكمش عالسحب دلوقتى خالص اصبر كده بعد ال5 الاف فرق كبير اوى

عامة أنا عمري مابعدي أل2.5 أربي أم في الغيارات حتي لو الدنيا أتهدت
بس أنا دلوئتي عامل في حدود 2700 كيلو وطبعا حاجز معاد الصيانة اللي هوا بكره من حوالي 20يوم فأضطريت أغير الزيت برا الضمان بشيل أصفر من غير ماهوب ناحية فلتر الفابريكة

وقلتلهم كدا النهاردة وأنا بأكد علي معاد الحجز وقالولي مافيش أي مشاكل....
رأي حضرتك أيه
أغير الزيت تاني بكره مع أني مامشيتش عليه أكتر من 1500كيلو....ولا أخليه وأغير الفلتر بس؟؟؟
وهل ينفع أغير الفلتر بس؟؟؟؟

حاجة كمان أفتكرت أقولك عليها....من كام يوم عملت فرش كامل للعربية...جلد أرضية وشنطة وكمان فرش كراسي جلد...بس خليت السروجي قفل بالجلد علي كمبيوتر العربية الموجود تحت الكرسي الشمال عشان يحميه لأنه في مكان مكشوف أوي....هل دا غلط وهايسخنه...ولا موضوع التهوية ده مايفرقش؟؟؟

المشاركة الأصلية كتبت بواسطة midooo_119

غالبا فالتوكيل هيخلوك تغير زيت وفلتر مش عشان ده الصح بس عشان ده الى فمصلحتهم و موضوع الكمبيوتر ماعتقدش انه هياثر فحاجه

لسه جاي حالاً من صيانة الألف وديه الفاتورة::::
زيت ماتور شيل أصفر 130ج
فلتر زيت 30
زيت فتيس 75
ضريبة مش فاكر كام عشان الفاتور تحت في العربية
المجموع كله 247 ج

بالنسبة للباور قولتله أنه تقيل جداً وعاوز أغيرله الزيت بس هو قعد يماطل وقالي هاظبتهولك من غير تغيير زيت وفعلاً بقي تمام

أما الزعقه الخفيفة اللي في المارشيديه فلسه موجوده مع أنه قالي مش محتاج تعلي دبرياج...وديه غلطتي أني أنشغلت بتجربة الباور أدامه ولما فرحت بيه نسيت موضوع الفتيس خااااااالص

وصوت الخبطه اللي في الأولاني..((خبطه خفيفة مش زعئة)) ساعات تبقي موجوده وساعات كتير لأ.......ديه لقيت ناس كتير بتقولي أنها عندهم ولما سئلت المهندس قالي عادي وماتقلقش

أخر حاجة بأه لقيتهم منضفين الماتور أويييييي وكأنه مغسول....بس أنا أستهبلت ومارضيتش أعيد وأزيد لحسن يضيفوه دا كمان عالفاتورة