الموضوع: زيت موتور الفلوينس و الميجان بلاي :)

كل سنه و انتم طيبيبن يا جماعه

ما كنتش حابب اتكلم فى موضوع زيت موتور الفلوينس كتير و لكن وصلت لمعلومه مفيده و حبيت اشرككم . كنت فى التوكيل بعد العيد لتربيط العفشه و ظبط زوايا فى مركز صيانة العبور و تحدثت مع مهندس محترم هناك و فتحت معاه بصفه وديه موضوع زيت الموتور فى الفلوينس و الحالات اللى ظهرت فى دفعه من دفعات 2014 و كانت المفاجأه كالاتى :

المشكله ما كنتش مشكلة موتور نهائي و لا خلوص بساتيم زى ما احنا كنا متخيلين
المشكله كانت فقط فى valve التبخير للزيت و لم يكن محكم البرمجه و الغلق و كان بيأدى الى تبخير كميات زيت كبيره مما يؤدى للنقص
صارحته انه فيه ناس غيرت الموتور فعليا و قال لى حصل لانه احنا ما كناش عارفين المشكله من اساسه الموتور جديد عليهم و من تصنيع نيسان و لو كانوا يعرفوا ايه سبب المشكله ما كانش اتغير اى مواتير نهائي كان ال valve و برمجته بس اللى اتغيروا . ما عرفوش السبب الا لما اتفك موتور و اتبعت زى ما هو بحالته لفرنسا و تم اجراء التجارب عليه و ارسال التفاصيل لهم بس للاسف الناس اللى حصلت عندهم المشكله و لغاية التوكيل ما عرف السبب و علاجه كانت كمية البخر للزيت و خروجها كبيره و عملت تدمير جزئى للمحرك

تم طبعا تلاشى الموضوع ده تماما فى كل الدفعات اللى بتنزل دلوقتى و رينو فرنسا خدت اجراءاتها فى الموضوع ده

حبيت بس اكتب فى الموضوع ده علشان الناس تطمن من الملاك الحاليين او المقبلين على الشراء و انه حتى لو ظهرت المشكله فى اللى اشترى 2014 ما فيش تغيير موتور و ﻻ حاجه و بيتعالج الموضوع فى ساعه فقط بتغيير الvalve و برمجته مش اكتر

--الميجان بلاى الفيس ليفت نزلت 2015 و فئه واحده فقط اللى موجوده و سعرها 165 الف و حجز و هيه جميع المواصفات الفنيه للفلوينس بس شكلا فى الفيس ليفت تحفه بصراحه

تحياتى و كل سنه و انتم طيبين :)

تمام يا تامر بيه . الراجل كان صريح جدا و محترم بالامانه و لم يدعى العلم و قال صراحة انهم ما كانوش يعرفوا المشكله فين و اعترف انه الموتور جديد عليهم و انه اتبعت لفرنسا بالكامل و انهم استخدموا الحل دلوقتى فى اى حاله بتجيلهم و من غير مشاكل و فيه هنا اعضاء فعلا راحوا التوكيل و زودوا لهم اللى نقص و ظبطوا ال valve و برمجته و همه نفسهم كاتبين انهم من غير مشاكل دلوقتى بس ما يعرفوش طبعا ايه اللى تم . ال valve له كميه معينه بيخرجها من البخر قليله لا تزيد عن نص كيلو عند التغيير على 10000 كم و ده طبعا للحفاظ على ضغط الموتور . ال valve كان بيخرج كميه بخر كبيره لمشكله فى برمجته و هو اللى كان بيأدى لنقص الزيت بصوره غير طبيعيه و تم التحكم و انهاء المشكله . مش رينو و نيسان اللى ينتجوا موتور فيه مشكله فى خلوص البساتم :) .

و استمتعوا بفلوينساتكم :)

المشاركة الأصلية كتبت بواسطة abubakr1234

tayeb lo homa regala y5lona nghir zit ghir total
9castrol aw liqui moly masalan)

اتكلمت معاهم فعلا فى الموضوع ده لانه واضح انه زيت توتال مش ماشى مع تكنولوجية الموتور و نسبة بخره عاليه مع المحرك و الدليل انه هو نفسه موتور النيسان قشقاى و ما فيش مشكلهلانهم مش بيستخدموا زيت توتال و همه عندهم دلوقتى تفهم للموضوع ده و بيوافقوا تشترى انت الزيت و يتغير عندهم

المشاركة الأصلية كتبت بواسطة aymanshebl

حاجة غريبة يعنى مشكلة نقص الزيت و العيب ده ظهر فقط فى مصر مع العلم ان الموتور ده بالذات فى موجود فى كل العالم

هيه فعلا غريبه . الموتور ده بالمسمار و المللى و فتيسه موجود فى 4 انواع عربيات من رينو و نيسان يعنى حتى مش فى شركه واحده منهم و برغم ده لم تظهر المشكله فى اى مكان و ﻻ حتى فى اى ريفيوهات على النت عن العربيه او منتديات اجنبيه خاصه بالعربيات . يعنى مش زى مشكلة الفتيس ال dsg اللى لو فتحت اى منتديات خاصه بالعربيات اجنبيه بتلاقيها موجوده

المشاركة الأصلية كتبت بواسطة land_cruiser

اعتقد ان الموضوع محتاج بلد درجات الحراره فيها مرتفعه علشان المشكله تبان

بالظبط ده المبرر الوحيد . لانه المصنع بتاع تركيا بيورد لمصر و روسيا و اوروبا فقط . الفلوينس 1600 ما بتنزلش اوروبا من اصله .بتنزل لروسيا و مصر و طبعا ظروف التشغيل ما بين الاتنين مختلفه تماما من حيث الجو و درجة الحراره . الشتا بتاعنا صيف عندهم و بالتالى ما ظهرتش المشكله عندهم و فيه مصنع تانى فى الارجنتين بيورد لجنوب افريقيا و استراليا و امريكا اللاتينيه بس بيصنع فلوينس ديزل و بالتالى مختلفه . و مصنع فى كوريا بيصنع ديزل لجنوب شرق اسيا و بنزين للخليج بس طبعا فى الموتور و الزيت معمول حساب درجة حرارة الخليج فى كل حاجه و مواصفات خليجيه مختلفه . يعنى اللى بتنزل زينا بالظبط نفس المواصفات بتنزل فى روسيا

انا لسه شايف الموضوع النهارده
المهم فعلا كونت بكلم واحد صاحبى مهندس ف ابو رواش قالى نفس كلام حضرتك
عشان انا كونت قلقان فعلا ( اصل انا موسوس شويه )
وكل ما اقرب استلم بقعد اراجع المواضيع اكنى بذاكر

يا ريت يتثبت الموضوع ده عشان فيه غيري كتير مكنش يعرف ان المشكله بسيطه واتحلت