الموضوع: ازاى اعرف الزيت ده هيقعد قد ايه؟

مبدئيا... أقل مسافة تقعد فيها الزيت في موتور عربيتك هي 5000 كيلومتر

غريبة .. مش كده؟؟


والأغرب كمان إن مفيش معيار ثابت للمسافة اللي تمشيها بالنسبة للزيت.. لإن المسافة بتتحدد أساسا من الشركة اللي صنعت العربية بناء على مستوى أدنى من الزيوت اللي تقدر تحطه في الموتور

بمعنى.. إن الزيت في حد ذاته مش هو لوحده اللي بيحدد المسافة... والموضوع يختلف كتير بالنسبة لنفس الزيت لو كان الموتور معمول بمواصفات قديمة وواحد تاني معمول بمواصفات جديدة

علشان كده .. أول وأهم قاعدة من قواعد اختيار الزيت المناسب هي إن حضرتك ترجع للكتالوج وتشوف إيه الزيت المطلوب ويفضل في الموتور قد إيه.

لو عايز تعرف إيه الرموز اللي ممكن تستدل بيها على مدة خدمة الزيت.. ممكن ترجع للموضوع ده:

http://www.nilemotors.net/Nile/341680-a.html



...

المشاركة الأصلية كتبت بواسطة sword00

اختيار الزيت حسب اللزوجه وانه نوع مناسب فالموضوع اللى فى المنتدى هنا كافى جدا وملم بالنقطه دى لكن انا المشكله عندى هيا الزيت هيخدم قد ايه فى الماتور فى عربيتى مثلا معايا فيكترا 2000 سى سى 1997 حطيت شل بنزله على 5000 وبينزل كامل وكويس جربت موبيل xhp نزل على 3500 كان زى الزفت ناقص ومحروق فى واحد صاحبى بيستعمل زيوت وطنيه الزيت بينزل كامل لكن مع الموبيل اكس اتش بى مش كويس وبينزل ناقص المشكله ان فى انواع كتير جدا للزبوت المعدنيه وانا مش بحب اخد بكلام الصنايعيه ديما بحب الكلام يكون على اساس علمى لو روحت بنزينه وطنيه هتلاقيهم بيبيعوا زيت معدنى وبيقزلك بيقعد 8000 كيلوا وخد من ده كتير
تانى مشكله هيا ان كل الزيوت مكتوب عليها 20w -50
التعاون الاحمر 20w -50
التعاون sf ل 20w -50
موبيل mx الاسمر 20w -50
شل الاصفر 20w -50
موبيل xhp ز 20w -50
فلحد دلوقتى مفيش غير التجربه اللى بتقولى الزيت يقعد قد ايه

اللي أنا شايفه من كلام حضرتك إنك معتبر اللزوجة هي أساس اختيارك للزيت.. مش أي حاجة تانية.

بس اللي عايز أقوله إن اللزوجة مش هي المعيار الوحيد لمقارنة الزيوت... فيه حاجة تانية إسمها مستوى الخدمة.. اللي في معظم الأحوال بيعبروا عنه بكود الـAPI... ودي المفروض تكون هي أول حاجة تدور بيها على الزيت المناسب للعربية (حسب المكتوب في الكتالوج).

فالمفترض إن الزيوت اللي ليها نفس كود الـAPI يكون ليها نفس العمر الافتراضي تقريبا... ونفس الأداء طبعا.



فيه حاجة تانية مهمة جدا حضرتك ذكرتها.. لون الزيت.

لون الزيت مؤشر لكفاءة الزيت في تنظيف موتورك من الشوائب اللي فيه


الزيت الاسود أو الغامق مش معناه إن الزيت اتحرق... أبدا

ده معناه إن الزيت ده شال لك الرواسب داخل الموتور... وبالتالي بيقلل من انسداد مجاري الزيت .. يعني تزييت أحسن... وكمان بيشيل أي حاجة ممكن تسبب إعاقة لحركة أجزاء المحرك .. وده معناه استهلاك أقل للبنزين.


فيه حاجة كمان حضرتك ذكرتها...

زيت موبيل الأسمر mx زي ما حضرتك كاتب اسمه mobil Delvac.. وده زيت مخصص في أغلب الأحوال لمواتير السولار

ما تقدرش تستخدمه في عربيتك إلا إذا كان كود الـAPI بتاعه يبدأ بحرف S

الجزئية دي مشروحة في الموضوع بوضوح.. وتحديدا في المشاركة رقم 3



معلش وآسف إذا كنت تجاوزت حدودي.. بس حضرتك باصص لموضوع الزيوت زي ما يكون واحد بيشتري برتقال وما يعرفش إن فيه منه أنواع... برتقال بصرة وبرتقال سكري وبرتقال بلدي ... ومستغرب إن كل مرة يشتري فيها برتقال يطلع طعمه مختلف!!!

نصيحة مني .. حاول تشوف كتالوج العربية بيقول إيه... واقرا الموضوع بتاع "القواعد الذهبية" تاني..

وبعدين ... اشتري أي زيت يمشي مع المكتوب في الكتالوج وحاول تثبت عليه..

وصدقني... مش فارق أي ماركة زيوت .. المهم إن الزيت يكون بيوفي المتطلبات.



...