طريقة فك و تنضيف فلتر تكييف كورولا 2014 بالصور

**Mohamed.Hany** · 01-08-2014 09:20 PM

بسم الله الرحمن الرحيم

زملائي الاعزاء بنايل موتورز السلام عليكم .......

بقالنا فترة متكلمناش و لا عملنا مواضيع فقولنا نكسر السكوت ده و نجمد قلنا و نبدأ نفك في العربية و نستكشف فيها واحدة واحدة .

ما شاء الله احنا عارفين تكييف العربية قوي جدا بس ده ميمنعش اننا نهتم بيها و ننضف فلتر التكييف كل فترة كدة لضمان قوة التبريد .

مكان الفلتر موجود ورا الدرج الجانبي او ال Glove Box و هو سهل الوصول اليه و هلخصه في 7 خطوات :

1. هتفتح درج التابلوه هتلاقي من الجنب اليمين نزل زي مساعد بيمسك الدرج لتحت عشان لما تفتحه ينزل ببطء و شياكة كدة , كل اللي عليك انك تدوس عليه من الجنب اللي شبه راس المسمار العادة هتلاقي راس المسمار ده خرج من التجويف بتاع المفصلة و بكدة نبقي فكينا المساعد من الدرج .

2. طبعا الدرج مش هتلاقيه اتفك ليييييه؟ عشان فيه ودن يمين و ودن شمال ماسكين الدرج عشان ميقعش في حالة ان المساعد باظ مفيش حاجة كدة متسابة هباءَ , كل اللي عليك انك هتدوس علي الودنيين بالتناوب عشان تحرر الدرج من مكانه هتلاقي الدرج اتدلق لقدام عليك .

3. الخطوة دي خطوة زيادة ممكن متعملهاش و هي انك تفك الدرج من الاربع مفصلات بتوعه نهائيا و تشيله برة.

4. هتلاقي علي ايدك الشمال الغطا بتاع الفلتر لونه اسود كل اللي عليك انك هتدوس علي الودن بتاعته ناحية اليمين هتلاقيه فك معاك.

5. هتلاقي الفلتر قدامك المفروض لونه ابيض ههههه هتشده عليك و تنضفه كويس بالهوا .

6. هترجع الفلتر تاني مكانه مع ملاحظة انك تركبه في الوضع الصحيح يعني كلمة UP و السهم لفوق .

7. هتبدأ ترجع كل حاجة زي مكانت و تمشي علي الخطوات من 4 الي 1 .

مبروك عليك تنضيف الفلتر !

**abofandy** · 01-08-2014 09:42 PM

تقرير الجمعه المتميز
تسلم الايادى يا بش مهندس
شغل عالى

**yahya157e** · 02-08-2014 02:14 AM

تسلم ايديك يا بشمهندس ويجعله ف ميزان حسناتك

**bassem.naguib** · 02-08-2014 02:45 AM

جامد يا أبو هاني .

**Y a r i s** · 02-08-2014 03:24 AM

الله يعطيك العافية
وتسلم ايدك ... بس اسمحلي احب اضيف حاجة صغيرة. على نفس الصور ونفس الطريقة دي كمان برضوا هيا هيا طريقة فك فلتر اليارس. الشكل القديم او الجديد والفلتر واحد ... بتاع الكورولا. هو نفسوا بيركب على اليارس ... وتحياتي ومشكور .