الموضوع: التحذير من طريق (بورسعيد - دمياط) الدولي الساحلي

السلام عليكم ورحمة الله ،،،،

كل عام وانتم بخير ،،،

انا كنت رايح دمياط اول امبارح عن طريق القاهرة/اسماعيلية الصحراوي ثم اسماعيلية/بورسعيد ثم اخذ الطريق الدولي الساحلي بورسعيد/دمياط ،، المهم بعد ما اخد اليوترن قبل مدخل بورسعيد عشان امسك الدولي الساحلي ،، لقيت يافطة مكتوب عليها ان الدولي الساحلي مغلق ! المهم خلتني ماشي لحد ما اشوف فيه ايه ،،، لحد ما وصلت لحواجز قافلة الطريق ففضلت واقف والعربيات وقفت ورايا

الحمد لله لقينا تاكسي كتر خيره جاي من الطريق العكسي بيشاور ان في يو ترن قدام فرحنا اخدناها وكملنا وراه لحد ما لقينا الطريق مسدود برده من الناحية التانية ... المهم اخدنا قرار ان ناخد الطريق العكسي وده مكنش قرارنا ده كان قرار العربيات اللي سبقونا ... المهم كملنا طوالي علي الطريق المعاكس لحد ما لقينا كوبري معدية في اصلاحات علي الطريق الاصلي وده سبب ان الطريق مغلق .... فضلنا مكملين عكسي لحد ما لقينا ملف يدخلنا للطريق بتاعنا الاتجاه الصحيح دخلنا.. فضلنا مكملين لحد ما لقينا كوبري تاني في اصلاحات فرحنا داخلين عكسي تاني ورجعنا دخلنا طريقنا الصحيح مرة تاني بعد كده ...

قلت انبهكم لو حد بيفكر يسافر دمياط او راس البر وحابب ياخد الزراعي يكون افضل شوية ،،، او يعمل زينا وده في مخاطرة ،،،، او في حل انه يدخل بورسعيد من جوة بس انا معرفش الطريق ده بصراحة.

في نقطة تاني وانا راجع الطريق كله ضلمة مش منور لحد تقريبا الاسماعيلية فالافضل العودة من الزراعي او الرجوع بالنهار

ربنا يسلمنا ويسلمكم

المشاركة الأصلية كتبت بواسطة kok3

باشا غلطان اخر حاجة انا لسه راجع م المطار ولقيت نفس المشكله حضرتك هتلاقي يافطك علي اليمين هتقولك كمل علي طول ومتدخلش عشان فيه اصلاحات هتكمل كأنك داخل بورسعيد عادي خالص وهتدخل في الطريق اللي رايح بورسعيد من دمياط وبعد ٥٠٠ متر تقريبا هتعمل يو تيرن وترجع في اتجاه دمياط تاني طريق بورسعيد دمياط القديم مش الدولي هتمشي فيه علي طول هتلاقي دمياط قي وشك عاوز ترجع تركب دولي تاني بعد ٥كيلو هتلاقي دخلة للدولي اسكندريه هتعدي علي دمياط الجديده و جمصه وبلطيم لو رايح اسكندريه انا كنت محتار زيك ومدخلتش عكسي غلطان

الله ينور عليك يا باشا بصراحة انا مشفتش اي يفط بالرغم اني كنت متابعها كلها طول الطريق ... حصل خير وطبعا كلامك 100% صح وان شاء الله الواحد ياخد بيه المرة الجاية وبالتاكيد انا غلطان ... تسلم ياباشا علي التوضيح والوصفة (y)