ألقاب x ألقاب

**omardeneo** · 19-10-2008 11:34 PM

انا اللقب الوحيد اللى كنت باحلم بيه و الحمد لله ربنا من عليا بيه هو لقب "بابا"

عموما موضوع ظريف جدا يا "ابله" علا

**SHNORY** · 19-10-2008 11:39 PM

حد فيكم يفتكر لقب (يا غالي) كانت بتتقال علي الفاضيه والمليانه بشكل مستفز
كل ما اكلم حد ولا حد يكلمني يقولي امرك يا غالي واحشني يا غالي لما كرهوني في الكلمه وبقيت بشمئز منها
مره واحد كان عاوز ياخد كورس سوفت وير فبساله اسمك ايه قالي غالي والله كنت ناوي اقوله معنديش وقت بس حصلت ظروف وهو مجاش اصلا

**omardeneo** · 20-10-2008 01:11 AM

المشاركة الأصلية كتبت بواسطة ahmodium

انا لو حد دخلي الصيدليه وقالي يا احمد حاف كده الصراحه باكون متغاظ منه

حتى يا د/احمد لو كان مريض و تعبان و قالك الحقنى يا احمد :D

**جمال** · 20-10-2008 01:44 AM

المشاركة الأصلية كتبت بواسطة OlaOsman

النهاردة في الشارع لقيت واحد بيسأل تاكسي، رايح امبابة ياوحش؟ التاكسي رد عليه عادي جدا.. لاحظت فعلا ان الرجالة دلوقتي بأت تنده بعضها بيا وحش

علا باشا
لقب وحش ده على ما اتذكر بدأ فى الجيش
اولا كان لقب رجال الصاعقة و المظلات , وبعدين بقى ينادى به الجنود اثناء التدريب للتحمية , للاسف دلوقتى بقى ينادى به سائقى التاكسيات !!!!

انا الناس اللى ماتعرفنيش لما بتشوف شعرى الابيض بيقولو لى يا حاج , مع انى مهندس و الله , انما اللى بيعرفنى ينادينى ب باش مهندس
وانا بفضل مهندس جمال , و الافضل جداجدا - جدو جمال من احفادى
وياريت تكون من اولادى و اخوتى بالمنتدى جدو جمال

**moh_kamal67** · 20-10-2008 02:22 AM

من الالقاب الاستفزازية (يا نجم)
ودى تعتبر نوع من انواع الشتيمة المحورة ، حد يكون مستعجل ، شايف نفسه مهم ، ماشى عكسى وغلط ، بيزنق على عربية علشان يعديها ، او اى امر فهلوة او نصب بيرد الآخر باتفضل يا نجم
اما من الالقاب الملتصقة بيا من وقت الصبا هى ( كيمو) لان اسمى فيه كمال
من الالقاب التى تفرح السيدات جدا الالقاب القديمة وخاصة يا هانم او ياست الكل
والدى كان دايما يقول للسيدات يا ست الكل ، وكنت اراهم فى قمة السعادة بهذا اللقب
انا مقدرش استعمل (ياست الكل) لان فى مرحلتى السنية دى يعتبر معاكسة وانا موش ناقص
من الالقاب الجديدة بين الشباب (يا مان) وبتبقى بين الصحاب وفيها عشم
ويعتمد فهم الطرف الاخر للقب هل هو احترام ام تريقة على طريقة الالقاء

**M_ashraf** · 20-10-2008 02:40 AM

زي ما banboty قال
انا النهارده مثلا ماشي في المستشفى ولابس البالطو
وكله تمام الاقي اللي يقوللي يا باشمهندس اللا هو كذا منين؟
انا كل العيانين الستات الكبار بقلهم يا ست الكل
و الصغيرين يا ست البنات
و الرجالة باساميهم و الكبار يا حاج

**Abdelrahman** · 20-10-2008 02:41 AM

أنا عن نفسي بكره الالقاب ....أنا بشتغل مع أجانب من ساعة ما اتخرجت ...عندهم مفيش القاب نهائي خالص ...يعني المدير العام لما بنكلمه او بنبعتله ايميل ..بيتبعت باسمه على طول بدون اي القاب.

الصراحه أنا بحب الناس تندهلي باسمي على طول ..بس لو حسيت ان الشخص الي قدامي ..عنده نقص او بيحاول ينتقص من قدري او علمي ...ساعتها لازم أخنق عليه وخليه يندهلي يا بشمهندس.

**SAbuhashem** · 20-10-2008 12:04 PM

وحسرتاه على لقب مهندس إلي بقى لكل المهن
أي حد دلوقتي يلقب مهندس

لأ و الأدهى إن كل واحد شغال في شركة أو حرفه لها علاقة بالهندسة بأي شكل يقول أنا مهندس وبكل بجاحة حتى لو ملوش علاقه بها نهائي أساساً !
ويغيظك أكتر بإنه كاتب مهندس كذا في البزنس كارد بتاعه !

عموماً وبصراحة أنا بحس إن كل الالقاب دي زي برنس وعمده ووغيرها كتير بيئه وسوقيه كلها

Thanks
Eng.Sherif Shaker

-

الموضوع: ألقاب x ألقاب

LinkBack

أدوات الموضوع

عرض

-

-

-

-

المواضيع المتشابهه

سيارات لها ألقاب ( عند المصريين )

ألقاب الصحابه راضوان الله عليهم

ألقاب الصحابة رضي الله تعالى عنهم

فكرة مسابقه على ألقاب NILE MOTORS

الكلمات الدلالية لهذا الموضوع

المفضلات

المفضلات

ضوابط المشاركة