ألقاب x ألقاب

**OlaOsman** · 19-10-2008 10:10 PM

النهاردة في الشارع لقيت واحد بيسأل تاكسي، رايح امبابة ياوحش؟ التاكسي رد عليه عادي جدا.. لاحظت فعلا ان الرجالة دلوقتي بأت تنده بعضها بيا وحش و يا باشا و يا جميل.. افتكرت زمان لما كان حد يبحب يحترم حد كان بيقول له يا حضرت.. أو يا حضرت المحترم.. ده غير ان أفندي ده كان لقب فعلا مش تريقة او تبكيت زي دلوقتي.. لما حد يقول لحد يا أفندي يبقى يقصد تقطيم و تبكيت و بالمثل يا هانم.. برضه بتدي نفس المعنى.. في حين انها زمان كانت لقب في حد ذاته و لا بد تكون زوجة بك أو باشا :)

طبعا دلوقتي كل الناس بأت يا باش مهندس.. بدءً من الميكانيكي مرورا بالسمكري و انتهاء بأي حد.. مش فارقة. طبعا يا دكتور دي أساسي لكل الدكاترة و الصيادلة و صعب حد يقول لحد يا دكتور إلا لو كان طبيب او معاه دكتوراه. أما أستاذ فمش عارفة ليه محدش بأه يحب يتنادى بيها.

اما بالنسبة للنساء حاليا فالسائد هو يا مدام او يا آنسة.. الألطف بالنسبة لي هو يا أستاذة للناس الأغراب تماما.. أصلي مش فاهمة خالص ليه النساء بتتنادى بألقاب على حسب حالتهم الاجتماعية.. ايه المغزى يعني؟ إنما أكتر لقب بيغيظني ان حد يناديني بيه هو يا أبلة.. بس دول ممكن سواقين الميكروباص همه اللي ممكن ينادوني بيها لو سايقة جنبهم :D

أول مرة حد يناديني بعلا باشا كان هنا في نايل موتورز :D

انتوا بأه بتهتموا بالألقاب؟ و هل بيفرق معاكوا لو حد ناداكوا بلقب ما ينطبقش عليكوا؟ أو بتحبوا لقب معين الناس تندهكوا بيه؟

**banboty** · 19-10-2008 10:14 PM

في المجتمع و الحياة

كل الناس بيتقال لها دكاترة
ما عدا الدكتور نفسه بيتقال له يا بشمهندس

**Noha.M** · 19-10-2008 10:16 PM

انا كنت بحب جدا لقب باشمهندسة و انا بشتغل بجد كنت بنتشي فى نفسي اوى

بس الللقب اللى بيحرق دمى اوى كلمة يا مدام دى بس متقالتليش متقاليش غير مرة واحدة و انا

فى السوبر ماركت و كنت شايلة ميكا بنت اختى و كانت عندها سنة تقريبا و كنت بشترى جبنة

فالراجل بيقولي حاجة تانية غير الجبنة يا مدام قولتله اهو عشان مدام دى مش واخدة الجبنة و بجد

والله سيبته و مشييييييييت

**MoToRiZeR** · 19-10-2008 10:38 PM

خااااااالص انا مبحبش الألقاب كلها

بما إن انا لسة شاب صغير يعني فا محدش بيقولي يا أستاذ .. إلا لو بشتري حاجة أو بركن .. إنما الألقاب اللي بين الصحاب كلها مبحبهاش خصوصا "يا برنس" اما حد بيكلمني و يقولي إيه يا برنس بحس إن عايز أكله قلمين .. و بعدين الناس بتخترع ألقاب و أوصاف زي "أخر حاجة" اللي عندي حساسية منه .. و مرة واحد بيسألني كويس ؟ فا قلتله تمام الحمد لله .. قاللي تمام جامد يعني أسد الصحرا ؟ قلتله أسد الصحرا أكيد

بس انا أحياناَ بزق لقب أستاذ في تعاملاتي و الشغل عشان فيه ناس بتزعل .. بس مؤخراَ إكتشفت فيه ناس بتزعل منه برضه و بيحبوا يتنادوا بإسمهم بس زيي فا بشوف يعني لحد ما أعرف الشخص كويس

**Hassan Khalil** · 19-10-2008 10:48 PM

مبهتمش اوي لو حد ناداني بلقب لا ينطبق عليا .. لكن باتفرس من زعيم .. ووحش .. و سبع و الحاجات دي
انا قعدت حوالي سنة بيتقالي يا مستر .. و كنت بحبه جدا لانه كان من ناس بحبهم جدا
و قعدت فترة كبيرة بيتقاللي يا استاذ
و برضه فترة كبيرة بيتقاللي يا بوب
و بعض الناس بتقوللي يا شيخ .. لما اكون سايب دقني .. و كنت لما بركب التاكسي و انا بدقن .. و سواق التاكسي يكون مشغل اليسا و اللا نانسي و اللا حتي عادل الخضري ...الاقيه يقوللي .. اقفل الكاسيت يا شيخ ؟؟؟
و قعدت حوالي سنة و نصف بيتقاللي يا بشمهندس في الشغل .. رغم اني ماليش اي علاقة بالهندسة من قريب او بعيد ...بس طبيعة المكان اللي كنت بشتغل فيه ..
و قاعد حوالي خمس سنين بيتقاللي يا دكتور .. و شكل الواحد عمره ما حيشوف الدكترة دي .. و لا حتي حيشم ريحتها .
و في الغالب الاعم و بين محيط الناس اللي بحبهم .. ابو عليييييييييي( بمد اليــــــــــــــــــــــ ـاء)

**hamedo0** · 19-10-2008 11:06 PM

المشاركة الأصلية كتبت بواسطة Noha.M

انا كنت بحب جدا لقب باشمهندسة و انا بشتغل بجد كنت بنتشي فى نفسي اوى

بس الللقب اللى بيحرق دمى اوى كلمة يا مدام دى بس متقالتليش متقاليش غير مرة واحدة و انا

فى السوبر ماركت و كنت شايلة ميكا بنت اختى و كانت عندها سنة تقريبا و كنت بشترى جبنة

فالراجل بيقولي حاجة تانية غير الجبنة يا مدام قولتله اهو عشان مدام دى مش واخدة الجبنة و بجد

والله سيبته و مشييييييييت

والله حرام عليكي يا بشمهندسه يعني هو كان بيشم علي ظهر ايده ان بنت اختيك هي المعاكي بس المفروض تروحي تخدى الجبنه

**Ahmed REDA** · 19-10-2008 11:07 PM

الالقاب بين الاصدقاء --->عادي زي ازيك يا باشا و يا كبير

الالقاب بين الغرباء ---->في الغلاب لغرض شخصي ,زي مثلا عاوز اركن في ارض فضاء واقف عليها غفير في ناس ممكن تقولة يا عمدة حسيبها خمسة و جاي ,هوة عمدة ؟لا,بس اتقال لة يا عمدة عشان يفرح شوية و يوافق و دة برضة ينطبق علي المثل بتاع سواق التاكسي اللي قالتة علا ,قالة يا وحش عشان ينتشي شوية و يقف

الالقاب في الشغل---->ضرورة في البداية للاشخاص المتقاربين في السن وذالك الي ان تتحول علاقة العمل الي علاقة عمل و صداقة عندها ترفع الالقاب و ضرورة دائما للاشخاص الاكبر في السن

اول متخرجت كنت بفرح لما حد يقولي يا باشمهندس بس مع مرور الوقت عادي و بقت ولا فارقة :D

**Noha.M** · 19-10-2008 11:11 PM

المشاركة الأصلية كتبت بواسطة hamedo0

والله حرام عليكي يا بشمهندسه يعني هو كان بيشم علي ظهر ايده ان بنت اختيك هي المعاكي بس المفروض تروحي تخدى الجبنه

لا متخافش ما انا خليت اختى تروح تجيب الجبنة D: ما انا شايلالها البنت و مستغليانى اخر استغلال اهو

**MoToRiZeR** · 19-10-2008 11:13 PM

[quote=Hassan Khalil;460238]و قاعد حوالي خمس سنين بيتقاللي يا دكتور .. quote]

والدي برضه إشتغل فترة في الأجهزة الطبية و كانت الناس بتقوله يا دكتور .. وهو خريج أداب جغرافيا :D

**PRO-DRIVE** · 19-10-2008 11:24 PM

المشاركة الأصلية كتبت بواسطة MoToRiZeR

خااااااالص انا مبحبش الألقاب كلها

بما إن انا لسة شاب صغير يعني فا محدش بيقولي يا أستاذ .. إلا لو بشتري حاجة

أو بركن .. إنما الألقاب اللي بين الصحاب كلها مبحبهاش خصوصا "يا برنس" اما حد بيكلمني و يقولي إيه يا برنس بحس إن عايز أكله قلمين .. و بعدين الناس بتخترع ألقاب و أوصاف زي "أخر حاجة" اللي عندي حساسية منه .. و مرة واحد بيسألني كويس ؟ فا قلتله تمام الحمد لله .. قاللي تمام جامد يعني أسد الصحرا ؟ قلتله أسد الصحرا أكيد

بس انا أحياناَ بزق لقب أستاذ في تعاملاتي و الشغل عشان فيه ناس بتزعل .. بس مؤخراَ إكتشفت فيه ناس بتزعل منه برضه و بيحبوا يتنادوا بإسمهم بس زيي

فا بشوف يعني لحد ما أعرف الشخص كويس

اااااااااااااااااااه كلمه يابرنس دي بسمعها من سواقين المكروباص و ببقي عاوز اقتله :@

عموما انا مبحبش فكره الالقاب اصلا بس بقولهم عشان محدش يزعل :ack2:

الموضوع: ألقاب x ألقاب

LinkBack

أدوات الموضوع

عرض

-

-

-

-

-

-

-

المواضيع المتشابهه

سيارات لها ألقاب ( عند المصريين )

ألقاب الصحابه راضوان الله عليهم

ألقاب الصحابة رضي الله تعالى عنهم

فكرة مسابقه على ألقاب NILE MOTORS

الكلمات الدلالية لهذا الموضوع

المفضلات

المفضلات

ضوابط المشاركة