مشكلة حصلتلى وانا راجع من شرم امبارح ...برجاء الافادة ....

امبارح وانا راجع من شرم الشيخ بعد اجازة العيد .. حصلة مشكلة فى عربية واحد قريبى معانا ... عربية ماتريكس 2008 مانيوال ... المهم انه بعد 40 ك من الطور قالى العربية سخنت والمؤشر رفع على الاخر .. ركنا على جنب وصبرنا شوية لحد مافتحنا غطا الردياتير مقالنياش ولا نقطة مية .. بدأنا نحط مية ..الغريب ان العربية خدت حوالى 6 لتر والحرارة نزلت بس للاسف مارضيتش تدور تانى .. كلمنا ميكانيكى قالى وش السيلندر ضرب ومتحاولش تدورها وطبعا اكتشفنا ان غطا الويت عليه طحينة ... المهم بعد حوالى 3 ساعات من المعاناة فى الصحرا جبنا ونش وجبنها مصر النهاردة

السؤال : هل احنا غلطنا لما زودنا ميه وكان لازم نصبر ولا ماكنش هيفرق فى حاجة وبردو تتفتكروا ايه سبب اللى حصل ؟

وايه التصرف الامثل فى موقف زى دة ؟
وشكرا

كنت تزود مياه و هي دايرة.

السبب في اعتقادي أنه:
لابد من تنظيف دورة التبريد وتغيير مياه التبريد ، وذلك في بداية فصل الصيف كل عام
ويبدو أن ذلك لم يحدث

اقتباس:

---

المشاركة الأصلية كتبت بواسطة kar!m

كنت تزود مياه و هي دايرة.

---

المشكلة ان العربية كانت سخنة جدا وبالتالى صعب تفتح غطاء الردياتر وهية دايرة

واضح أن ما كانش فيه مياه اساسا و انت بتزود و ده معناه ان العربية دايرة أو مش دايره مش هيفرق لأن ما فيش مياه من أصله. كان لازم تستني لما العربية تهدي خالص و بعد كده تزود.

حصلت معايا وبسبب تسرعي العربيه جابت جوان واضطريت انقلها
عشان كده بدل البهدلة ودفع فلوس علي الفاضي تستنا 4سعات او 3 لما العربية تهدي خالص وتقوم مزود ميه وتتكل علي الله تمشي بس تقول ايه في السربعة الي احنا فيها

اقتباس:

---

المشاركة الأصلية كتبت بواسطة mohamedbook

حصلت معايا وبسبب تسرعي العربيه جابت جوان واضطريت انقلها
عشان كده بدل البهدلة ودفع فلوس علي الفاضي تستنا 4سعات او 3 لما العربية تهدي خالص وتقوم مزود ميه وتتكل علي الله تمشي بس تقول ايه في السربعة الي احنا فيها

---

فعلا انا حاسس ان احنا اتسرعنا شوية بس القلق بيخلى الواحد مش عارف يفكر كويس ...

وبعدين انا عايز افهم حاجة مش الميه حتى لو ساقعة هتعدى على الردياتر وهتاخد السخنية منه وبعدين الموتور .. يبق هتفرق فى ايه بقى دايرة او مش دايرة ؟

هو حضرتك شيكت على المياه قبل السفر لان لو ما فيش تسريبات يبقي المياه راحت فين
وقدر الله وما شاء فعل وربنا يعنكم على الاصلاح

ميه بارده في موتور مولع هتخش تخلي الحديد يقفع ويتبهدل
لما يحصل كدة تستني نص ساعة وفي الفترة ده تكون حاطت المسة جنب الموتور وهو سخن عشان تسخن هي كمان
وتدور الأول وتحط ميه بالراحة جدا
وممكن تكون ضربت الوش أصلا من المشي وهي سخنة ... الهيونداي معفنة في الحركة ده

قبل السفر لازم تشيك على العربية كويس
و معلش قدر اللة و ماشاء فعل عملتها معايا العربية قبل كدة فى مطروح بس كانت لادا
كان لازم تستنى لما العربية تبرد شويتين و تطمن عليها

حمد الله على السلامة

حصل معايا موقف زى كده وبطلت العربيه على طول وسيبتها نص ساعه وزودتها مياه ومؤشر الحراره رجع مكانه

الفكرة انك متحطش مياه باردة على الموتور السخن الا لو كان داير عشان المياه تتقلب السخن مع البارد اللي بتزودها
عشان بالبلدي كده كأنك جبت مسمار متسخن علي النار وحطيته عليه مياه ساقعة

اعتقد ان السبب مش انك زودت ميه لان المؤشر على على الاخر واللى سايق ما خدش باله غير لما الموتور ولع والميه كلها اتبخرت وده مش بيحصل غير لو فيه تهريب فى دورة التبريد او حصل مشكله فى المراوح .. واعتقد انك حتى لو كنت حاولت تدور العربيه قبل ما تزود ميه ما كانتش دارت اصلا .. حصلت معايا قبل كده بس الحمد لله انا لحقتها اول ما المؤشر عدى النص وسمعت صوت تسقيفه فى العربية لما بدوس بنزين ولقيت تهريب فى كوع الميه بس ساعاتها بطلت واستنيت لما العربية هديت خالص ودورت العربية دارت ةزودت حوالى 2 لتر ميه وعدت على خير

عموما الحمد لله عدت على خير ... وربنا يكفينا شر الطريق .. الحمد لله العربية خلصت عملنا وش السيلندر عند الخراط وشيكنا على دورة الميه والميكانيكى قال ان الثرموثتات كان بايظ وغيره ... وللمعلومة الونش خد 800 جنيه من ابو رديس للمهندسين و400 للميكانيكى والخراطة وربنا يكفيكم شر العربيات ويدينا خيرها

يا باشا الوش ضرب عشان العربيه سخنت جامد مش عشان تزويد المايه

اقتباس:

---

المشاركة الأصلية كتبت بواسطة hi_nmr

يا باشا الوش ضرب عشان العربيه سخنت جامد مش عشان تزويد المايه

---

انا بردو بقول كدة بس مش متأكد