الموضوع: أحسن إختيار لسيارة في حدود ٣٠٠ ألف جنيه؟

المشاركة الأصلية كتبت بواسطة khaledhamdy300

طب بعد اذن سياتك يا دكترة
اية رايك ال اكس وان ولا الكيو ثرى ؟
وهل صوت موتور الاكس وان عالى, واخبار سحبها اية مع غياب التربو؟
وهل يمشى مع الاكس وان بنزين 92 ولا لازم 95 ؟
وكمان اخبار ضريبة التجديد اية غالية ولا معقولة؟

ارجو الافادة للاهمية لجدية الشراء.

م. خالد

سوري على التأخير في الرد

بص سيدي الفاضل

بالنسبة لصوت الموتور فهو مش عالي خصوصا وإنت راكب جوا. وحتى من برة العربية مش عالي.
صوته قوي وليه زنة مميزة تحب تسمعها خصوصا وإنت بتدور العربية الصبح.
كتير بحب أفتح باب العربية عشان أسمع صوت الموتور وهو بيقوم.

بالنسبة للسحب فهو هو موتور ال 320 (الشكل القديم مش الحالي) على ما أعتقد. وعن ناس ركبوا ال320 وربكوا عربيتي قالوا لي إن أداء الموتور في عربيتي أحسن من أداؤه في ال 320.

بالنسبة للبنزين فأنا شغال ب92 على طول لأن ال 95 مش متوافر حواليا. ومافيش أي مشاكل في العربية وأداء العربية ممتاز والحمد لله. يعني أنا سواقتي رياضية شوية والأر بي إم بينقل عند 3 أو 3 ونص وساعات بيوصل ل 4 ونص لما بكون بجاوز.
طبعا ال95 بيخلي إستجابة العربية أحسن لكن مش فرق كبير، يعني ممكن تقول 10% لصالح ال95.

بالنسبة لأن العربية من غير تيربو والكيو ثري بالتربو فحلخص لسيادتك معلوماتي المتواضعة في هذا الموضوع وخصوصا إني كنت خايف من ال92.

الكيو ثري 1400 مع تيربو وبيديك أداء مقارب لأداء ال2000 بتاع الإكس وان. ولكن عشان تاخد الأداء ده من الكيو ثري لاااااازم بنزين 95 فما فوق. ودي قاعدة على كل التيربو إنك لازم تحط بنزين عالي الأكتين عشان تاخد كل الباور بتاعة التيربو اللي مكتوبة في الكتالوج.
في حين إن 2000 بيديك بال92 أداء مقارب جدا للأداء اللي بيديه بال95.
يبقى بعد حسبة بسيطة حتلاحظ إنك تستمع بأداء ال2000 من غير تيربو من غير ما تكلف نفسك فرق بنزين ال95.

ونصيحة وبعد تجربة مالهاش لازمة حكاية رافع الأوكتان دي ما بحسش بأي فرق خالص. وعشان تجيب رافع أوكتان نضيف حتلاقي سعره داخل في 100 جنيه، يعني أحسن لك تحط 95.

بالنسبة للضريبة فهي 400 وكسر في السنة يعني حوالي 1300 أو 1400 في ال3 سنين.

بالنسبة للمقارنة بالكيو ثري فبصراحة أنا ماركبتش الكيو ثري قبل كده. بس شوفتها كذا مرة ولاحظت الآتي: (طبعا ده من وجهة نظري الشخصية، ممكن يكون لك رأي تاني).

من جوا طابع الإكس وان عاجبني أكتر، مساحة الشنطة الخلفية في البي إم أكبر. الإرتفاع عن الأرض حوالي سم واحد زيادة لصالح البي إم. سعر إعادة البيع طبعا في صالح البي إم عن الأودي عموما (هما الإتنين أصلا سعر إعادة بيع مش حلو بس البي إم أحسن شوية).

الأودي طبعا أحسن في الكواليتي بليت بتاعتها (جودة التصنيع) عشان متقفلة في ألمانيا. دا غير إن الأودي عموما ليه رونق مميز عن البي إم.

دا من وجهة نظري ولكن سيادتك ممكن ترتاح أكتر للأودي. عموما دي لينكات مواقع بتقارن بين الإتتنين وحضرتك صاحب القرار.

Audi Q3 Vs BMW X1 - Exteriors, Interiors, Engine, Performance

Car Review - BMW X1 Vs Audi Q3 | Auto Mavericks - Driving Excitement!

وأي سؤال تاني أأمرني

والسلام ختام

المشاركة الأصلية كتبت بواسطة khaledhamdy300

على فكرة حضرتك من الناس اللى شجعونى على الاكس وان ودخلوها فى دماغى
يس المشكلة ان الاكس وان ولا فيها زينون ولا فتحة سقف وتقريبا ولا ليدات ودية حاجات مهمة جدا بالنسبالى
مع انها موجودة فى الكيو ثرى بالاضافة للتقفيل المصرى للاكس وان حاسس انة ممكن يكون فية مشكلة
بالنسبة للموتور انا ركبت الاكس وان وحسين ان صوتها عالى مش عارف هل دة طبيعى فى المواتير 2000 ولا كان فى مشكلة فى العربية.

ارجو الرد للاهمية و تصحيح المعلومات لو فى اى خطا

هو فعلا مافيهاش زينون وبطلوا ينزلوها بفتحة سقف من سنتين تقريبا. لكن ممكن تركب الزينون عادي برة التوكيل من عند أوسرام ودول ناس محترمين وصادقين والتوكيل عارفهم. الزينون كله حيعمل 5 آلاف تقريبا.

الموتور فأنا أول ما جربته لقيته فعلا صوته أعلى من ما أنا متعود من المواتير الياباني أو الكوري بس عرفت بعد كده إنه موتور 2000 وده الطبيعي وده العادي. وعلى فكرة صوته جوا العربية أهدى بكتير من برة. وعلى آر بي إم عالي صوته حلو سواء من برة أو جوا. وبرضه على آر بي إم عالي وإنت جوا العربية صوته أهدى بكتير من صوت المواتير الياباني أو الكوري.

برضه بكرر على سيادتك لازم تركب الإتنين وتختار اللي يريحك. أكيد مش اللي برتاح فيه يكون مناسب ليك. وخلي بالك إن شكل الإكس وان حيتغير السنة الجاية. والله أعلم الجاية حتبقى جر أمامي ولا دفع خلفي ولا حيبقى السعر عامل إيه.

ياربت بقى لو تعمل تيست درايف للإتنين وتقولنا الأخبار إيه يبقى أفضل بكتيير من الكلام.