صلاة النبي جنط 15 وبرضوا بتحك في المطبات!!
غريييييييب أويييييييي أننا نبقي عاملين قسم طويل عريض فصصنا فيه الجيلي من قمة سقفها حتي أخمص جنوطها وأتكلمنا فيه عن كل مشاكلها حتي التافهة منها ،، وبرغم كل ده ألا أننا ما جيبناش سيرة أهم وأرخم وأبوخ عيوبها وهو الحك في المطبات....وحتي لما حد هنا في المنتدي جاب سيرة المشكلة ديه مرة من المرات كانت الردود مقتصرة علي تغيير السوست بسوست تويوتا 2007 من غير مانفكر مع بعضينا عشان نعرف أيه سبب المشكلة أصلاً ولا أيه اللي بيحك تحت مع أقل مطب!!!!
بصراحة أنا أمبارح كنت راجع من فرح في أمبابة وكنت مركب واحد جنبي وتلاته ورا وجيت أدخل مطب صناعي في شارع المطار وطبعاً وقفت بالعربية خاااااااالص وجبت أولاني وطلعت واحده واحده من أول و جديد ،، بس أظاهر أن ده ماشفعليش عند الجيلي هانم وبرضوا خيشت بطريقة غبية أوي في المطب لدرجة أني حسيت أنها أتحشرت في المطب اللي مكانش عالي أصلا....طبعاً أتحرق دمي أوييييييي وكان قلبي بيتقطع وقومت راجع مارشيديه وواخده بالجنب ومعديه،، وبعد ماروحت ودخلت الجراج قررت أنزل تحت العربية عشان أتفقد أثار العدوان وفعلا جبت الغطا من الشنطة وفرشته عالأرض ونزلت كشاف كبير من البيت عشان أقدر أشوف كويس...وكانت المفاجأة أني بعد مالفيت تحت العربية وفصصتها من أولها لأخرها وبصيت علي العتب والدواسات والأكصدامات وتنك البنزين والمساعدين وقاعدة الماتور والقضيب العرضي اللي في العفشة الورانية...مالقيتش خدشة واحده فيهم ولو صغيرة!!!!! حتي الشكمان اللي كنت شاكك فيه بنسبة 99% برضوا مالقيتش فيه خدشة تريح باللي!!!!
بس اللي أنا متأكد منه أن الحكه ديه بتحصل في نوص العربية بالظبط...وبالتحديد بعد ما تطلع بالعجل الأدماني وتنزل بيه من فوق المطب بتحصل المشكلة....يبقي كدا هانستبعد الربع الأدماني لأننا لما بنطلع بيه المطب مابتحصلش حاجة....وكمان النوص الوراني لأننا لسه ما طلعناش بيه المطب أصلاً....وبكدا ما يتبقلناش غير نص العربية ودا مافيهوش حاجة ساقطة أوي غير علبة الشكمان الأولانية والماسورة بتاعتها....بس اللي جنني بجد أنها سليمة ومافيهاش خدشة حتي الفويل أو العازل الحراري اللي راكب عليها برضوا سليم ومافيهوش قاطعه واحده!!!!
حاجة أخيرة عاوز أقولها بس مش متأكد أوي منها...وهي أن الصوت تقريباً بيبقي جاي من ناحية اليمين وكمان فيه رنه خفيفة كأن الشكمان سقط منك علي الأرض ومشيت تجرجر فيه!!!!
اللهم جرجرك يا غبور بحق جها النبي الكريم
