تجربتي مع الصيني ... شيري QQ ..أحداث أول بأول

**PAYOO** · 19-07-2007 05:03 PM

بصراحة يا جماعه أنا عاوز أشارككم معايا تجربتي مع العربية الصيني "شيري QQ" وهنا في الموضوع ده هانتناقش عن كل ما يخص التجربه دي بكل ما فيها سواء جيد أو سيئ

أولا أنا أخدت قرار شراء سياره صغيره فئة الـ1000cc أو 1100cc لأني محتاج عربيه صغيره للمدام والأولاد عشان زهقوني في عشتي وأحتلو العربيه الماتركس بتاعتي أحتلال أمريكاني وبصراحه زهقت خصوصا أن الأولاد مشاورهم كِترت
المهم
قرار شراء عربيه صغيره ماكنش مرتبط بماركة معينه يعني ما كنتش منحاز لماركة معينه وإن كنت افضل العربيه الـ"كيا بيكانتو" أو الـ"الدايهاتسو شاريد" لأنهم من وجهة نظري أحسن عربيتين في الفئة دي وبعدهم تيجي الـ"شيفورليه سبارك" وفي زيل القائمه تيجي العربيه الـ"شيري كيو كيو"

طيب أيه يا "بايوو" إللي خلاك تروح لديل القائمة؟
هاقول لكم
أولا البيكانتو عليها مشاكل كتيره جدا بين الوكيل القديم والوكيل الجديد لدرجة أن العربيات الكيا عموما موقوف إستيرادها لأي شركه لحين البت في القضيه وأنا سالت أكتر من حد معاه العربيه البيكانتو لقيته بيأكد أنه بيلاقي مشاكل لما بيواجه عطل معين محتاج لقطعة غيار خاصة شويه
أو بمعنى آخر طول ما العربيه محتاجه زيت وفلتر وبوجيهات وسيور مش هاتواجه مشكله لكن لو احتجت حاجه في الموتور وللا الفتيس أو أي حاجه تانيه ممكن يركنوك جنبهم شهور على مايبعتو يجبهوالك ده غير أن العربيه سعرها بقى 59500 جنيه تكييف وباور فقط ولو حبيت يكون فيها زجاج كهرباء وسنتر وأكصدامات بلون العربيه يبقى هاتدفع 62500 جنيه وبكده يبقى العربيه دخلت في فئة أعلى منها بكتير يعني الفيرنا أحسن منها في الحالة دي

العربيه الـ"الشاريد" عربيه زي الفل صناعه وتقفيل وخامات وكل حاجه ماحدش يقدر يقول عليها نص كلمه لكن شكلها مش حلو خالص (ودي مسألة أزواق) أنا شايف شكلها مش حلو وكمان سعرها زي الـ"بيكانتو" وإن كانت الـ"شاريد" كصناعه أفضل من الـ"بيكانتو"
وكمان الشاريد هاينزل منها شكل جديد على السنة الجديده وده إللي خلاني مافكرش أني أشتريها حاليا وبعد كام شهر ألاقي شكل جديد ودي تبقى قديمه

نيجي بقى للعربيه إللي كماليتها حلوه وشكلها كمان كويس وأسم وماركه وكل حاجه وسعر معقول مع كماليات كويسه
الـ"شيفورليه شبارك"
ودي بقى رحت حجزتها يوم الخميس إللي فات من فرع منصور شيفورليه سور نادي الزمالك
ولكن مالقيتش عنده ولا عربيه واحده حتى للعرض عشان أتفرج عليه على الطبيعه ولكن لثقتي في أسم شيفورليه أكتفيت بالصور الموجوده على الموقع الخاص بمنصور شيفورليه والكماليات المذكوره وثمنها 55000جنيه
وأدي الوصل طبعا كتبته باسم المدام مش خوف والله ولا حاجه يا جماعه

المهم بعد ما حجزت سألت مسئول المبيعات إللي أتعاقدت معاه وسألته على مكان او موزع أو أي حد يكون عنده ولو عربيه واحد عشان أتفرج عليها وأخد فكره برضه وبصراحه الراجل ماتأخرش دلني على موزع أسمه "الغلبان" ومكانه في عمارات أغا خان على الكورنيش
روحت للغلبان وأتفرجت على العربيه وأتصدمت
والصدمة سدت نفسي عن العربيه
بأختصار وعشان ماطولش عليكم العربيه لا تمت إلى أسم شيفورليه بصلة ولا حتى اسم دايوو إللي كانت صاحبته قبل ما شيفورليه تشتري مصانع دايوو يعني بصراحة الـ"ماتيز" القديمه برقبتها
المهم قررت أني أشتري الأرخص طالما أن الأغلى مافيهوش إللي أنا عاوزه والمدام شجعتني على كده خصوصا أنها كانت متضايقه من موضوع إننا هانستلم العربيه الشيفورليه سبارك بعد شهر

وروحت لشركة شيري إللي في طريق مصر الأسماعيليه الصحراوي وأشتريت العربيه الـQQ إللي تقفيلها وكماليتها محترمين جدا وبلذات موضوع الكماليات ده حاجه كده ماتتحطش في عربيه صغيره أبدا
يعني فيها
تكييف
باور
سنتر
راديو كاسيت
نظام امني يمنع إدارة السياره إلا بمفتحها الأصلي
4 زجاج كهرباء
مرايات كهرباء
ماكينات لرفع الزجاج عند أغلاق السياره بالريموت
مساحة خلفيه
فوانيس شبوره اماميه
فوانيس شبوره خلفيه
فتح الشنطه من الداخل
فتح التنك من الداخل
جنوط أسبور
زجاج حراري بالخلف
زجاج ملون أمامي
أمكانية طي الكنبه الخلفيه إلى جزئين كل جزء على حدا60/40
الأستبن جنط أسبور
مثلث تنبيه مع شنطة عده متكامله
ساعة رقميه بالتابلوه
عداد كيلو متر و عداد رحلات ديجيتال

العربيه مرفق معها جنش قلاووظ يتم تركيبه في الامام او الخلف لشد العربيه (تقريبا كده عاملين حسابهم أنها هاتعطل كتير وتحتاج تتشد كل شويه)

وإن شاء الله هاقول لكم أول بأول على تجربتي معاها
إللي أظاهر كده والله أعلم أنها هاتبقى تجربه مش ولا بد

**وائل السويفي** · 19-07-2007 07:04 PM

ربنا يباركلك ان شاء الله في اختيارك

بس عندي سؤال : أيه اللي صدمك في السبارك بالظبط

**hazem_khidr** · 19-07-2007 08:10 PM

الف الف مبروك يا باشا ربنا يديك خيرها و يحجب عنك شرها و ان شاء الله مش تحتاج تقطرها ولا اي شئ مش عارف ليه شكلك كده متشائم اخر سطرين مش عاجبني.
طبعا مش حقولك العربيه خرافه و تحفه بس بالنسبه لاستعمال الاولاد مش حتتاثر اوي ان شاء الله.افرح بعربيتك يا راجل دا انت مش كل يوم حتشتري عربيه زيرو يعني :lol:

**fahd_628** · 20-07-2007 01:47 AM

الف مبرووووووك يا بايو و ان شاء الله تطلع كويسة

**Mina W** · 20-07-2007 12:59 PM

مبروك عليك و على الاولاد العربية الجديدة، بس انا فعلا عاوز اعرف ايه اللى صدمك فى السبارك اصل والدتى كانت بتفكر فيها و كمان (و ان كان متأخر) ليه مفكرتش فى الالتو؟ :?:

**شريف سيد** · 20-07-2007 02:00 PM

الف مبرووووووك الله يباركلك فيها

**Karim_Monir** · 20-07-2007 02:46 PM

مبروك يا هاني
بس كنت اسالنا ا راجل
ربنا يباركلك فيها ويبعد عنك كل سوء

**PAYOO** · 21-07-2007 03:36 AM

متشكر قوي يا جماعه على زوقكم وأدبكم وتهنئتكم

وأنا عارف انكم ناس محترمه ومش عاوزين تزعلوني وتقولولي أن العربيه زباله
لكن هيه دي الحقيقه العربيه فعلا زباله
وأنا عارضها للبيع ولسه مارخصتهاش ومش ناوي أرخصها لأني مش هاخللي عيالي يركبو عربيه بالثبات ده ... ثبات أيه ؟... دي مافيهاش ثبات اصلا العربيه كده زي ماتكون راكب ريشه ريشه في هواء ده غير العيوب إللي ظهرت من أول يوم إللي هاحكيلكم عليها بس بعد ما ربنا يوفقني في بيعها ومش مهم خساره 500 جنيه في كام يوم المهم ولادي يبقوا راكبين في أمان وابقى متطمن عليهم وهما في رعاية ربنا طبعا وفي عربيه ثابته على الأرض مش نفخه تطيرها

بجد يا جماعه أنا نفسي مسدوده ومش هاحكيلكم على حاجه دلوقتي إلا بعد ما ربنا يوفق وأبيعها وأنا هاعمل اعلان هنا في المنتدى للبيع عشان بس الناس إللي ممكن تشك في أني فعلا أشتريت العربيه وبعد يومين عاوز أبيعها

لكن انا هاعرضها في معرض ومش عاوز اقابل إللي هايشتريها عشان مش عاوز اكدب واقول له أن العربيه حلوه أنا يدوب هابقى موجود ساعة أستلام الفلوس وكتابة العقود وخلاص لكن لو سالني مش هاكدب وأقوله ان العربيه ممتازه ولا حاجه وهاقوله العربيه مش ثابته على الأرض بالرغم من الأمكانيات والكماليات إللي في العربيه لكن الواحد مش بيشتري كماليات

معلش يا جماعه أنا متضايق حبيتن كده بعد ما أخلص من العربيه دي هاجي وأحكي لكم على كل حاجه وعلى الفصول البايخه إللي عملتها العربيه في اليومين دول (حاجه تكسف وتقرف بعيد عنكم)

وبصراحه لو الوكيل بيخللي العميل يسوق ويجرب العربيه قبل الشراء كنت عمري ما فكرت أني أخللي زوجتي والأولاد يركبو عربيه منعدمة الأمان زي كده

**hazem_khidr** · 21-07-2007 03:58 AM

ولا يهمك يا باشا ما تضايقش نفسك لاهي اول عربيه اشتريتها ولا اخر عربيه ان شاء الله تبيعها و تجيب احسن منها .
انا مش بصبرك ولا حاجه بس هو دا قدرك و دي حاجه مكتوبه عند ربنا نصيبك انك تشتريها و ربنا يعوضك عنها و عن زعلك منها باحسن منها ميت مره

-

الموضوع: تجربتي مع الصيني ... شيري QQ ..أحداث أول بأول

LinkBack

أدوات الموضوع

عرض

-

-

مبروك -

الف مبرووووووك هاني باشا -

-

المواضيع المتشابهه

رجاء الافادة من التنين الصيني جيلي ck2 مستعمل ولا ابعد عن الصيني

عدو الصيني الاول يقدم: السيارة الصيني التي ستهز عرش الالماني (الجزء الأول)

عدو الصيني الاول يقدم: السيارة الصيني التي ستهز عرش الالماني (الجزء الثاني)

شيري - اسبرانزا علي حلبة Nürburgring العالمية ! ( اختبار موديل جديد من شيري )

تجربتي مع الصيني ... شيري QQ ..أسأل وأنا اجاوب

الكلمات الدلالية لهذا الموضوع

المفضلات

المفضلات

ضوابط المشاركة