حسبي الله ونعم الوكيل. لما تسيب عربيتك لازم تغطيها

**Karim_Monir** · 23-07-2007 06:27 PM

لاء طبعا خليك في التوكيل عشان هما عارفين درجة اللون بالظبط
وحاول تصورها قبل ما تترش عشان لا قدر الله لو حبيت تبيعها يبقي متشاف انها مش خبطات
وحاول تخلي التوكيل يكتبلك ده في الفاتورة بتاع الرش
تم الرش ولكن ليس نتيجة خبطات عشان قيمة العربية ما تنزلش جامد
قدر الله وما شاء فعل
والحمد لله انها جت في حاجة بسيطة وماجاتش فيك

**hazem_khidr** · 26-07-2007 05:06 PM

اصبر عليها علي ما تاخد العين بتاعها!!!
صدقني دايما ابقي خلي الخبطه ناحيه الشارع و ما تحاولش تداريها علشان اللي رايح و اللي جاي يشوفها يقوم ما يحسدهاش .و كل يوم اقرأ الموعذتين و الاخلاص الصبح تلات مرات و دعاء السفر و ربنا حيسترها معاك

**mohamed ismail** · 28-07-2007 04:33 PM

الف شكر يا رجاله علي ردودكم اللي صبرت الواحد شوية
انا فعلا وديتها التوكيل ورشيتها
ودفعت 1560 جنيه.
انا كنت فعلا ناوي اسيبها لكن مقدرتش اركب العربيه وهي كده مش عارف ليه
عموما الحمد لله
بس هل ده يقلل سعر العربية لو بعتها؟
م/محمد اسماعيل

**M_Abdallah** · 31-07-2007 12:15 PM

هو أكيد هينزل من سعرها بس مش كتير لأن الرش اللي عاملته مجرد رش نظافه .مش رش بعد خبطه يعني.

________________
محمد عبدالله

**hero** · 31-07-2007 12:50 PM

ربنا يعوض عليك ....وأكيد القضاء دة اخف من قضاء تاني ....
بس الدروس المستفادة....
ان اي واحد عندة عربية يفضل انة يغطيها او الاحسن انة يجرشها ...في جراش خاص لو امكن ...

الحاجة بقي الغريبة جداااا....

المستوي ايلي وصل لية الشارع المصري...
الانسان ايلي يشيل معاة مادة كيماوية او ماء نار او اي حاجة زي كدة ....وماشي بيها في الشارع والحقد والغل والحسد مالي قلبة ...ومستني يلاقي عربية زيرو علشان يدمرها علي قد ما يقدر.....

المشكلة ان دي مش اول مرة ...يمكن دي خامس او سادس مرة اسمع عنها من ايام حكاية عربية عمرو اديب ...بتاع القاهرة اليوم...
التصرف السلوكي الاجرامي دة المفروض انة خبراء علم الاجتماع والاخصائيين الاجتماعيين يدرسوة ويشوفوا احنا كدة رايحين علي فين...
للاسف الظواهر الاجتماعية السيئة رايحة من اسؤ لاسؤ...واحد يتسرق موبايلة وهو لسة عامل حداثة وبينزف ...وناس بتحرق عربيات الناس....

ربنا يستر ومانوصلش للامريكان ...ونفاجيء ان واحد اتجنن وقتلة 20 ولا 30 واحد علي الصبح ...!!!

ربنا يعافينا ويعافيكوا جميعا ...بس ياريت يكون فية موقف ايجابي ....
يعني لو حد حصلة شيء زي كدة ....يبقي لازم يكون في بلاغ لاقرب قسم شرطة تابع لمنطقتة ....يمكن لو الناس بدأت تبلغ الشرطة تبتدي تراقب المناطق دي ...ويكون في اي نوع من التصرف حيال الهبل ايلي بيحصل دة....

**hazem_khidr** · 31-07-2007 08:58 PM

حسبي الله و نعم الوكيل.
بالنسبه لكلامك يا استاذ هيرو انا متفق معاك انه كلام حلو بس صعب التنفيذ
اولا علماء علم الاجتماع حيعملو ايه بعد مما يدرسوا الظاهره؟؟و متهيالي من غير علم اجتماع احنا عارفين اللي بيحصل دا بسبب ايه و الناس المريضه و في نفوسها حقد و غل بسبب ايه.
اولا بسبب البعد عن الدين و عن اداب الدين
ثانيا بسبب الحاله الاقتصاديه اللي وصلنا ليها و انعدام الطبقه الوسطي يعني يا فقير يا غني انما وسط مفيش.
النقطه التانيه ان حضرتك بتقول تروح تبلغ في اقرب قسم شرطه تفتكر انك لما تروح حيرحبو بيك؟؟ما اعتقدش ولو رايح من غير واسطه حتتبهدل احلي بهدله علي الاقل دا لو ما اتعاملتش كانك مجرم او مذنب صدقني هيا دي الحقيقه عندنا بالاضافه الي ضياع وقتك و علي الفاضي .
سيدي الفاضل انت لو لا قدر الله قتلت واحد بعربيتك علي الطريق بتدفع غرامه 250 جنيه !!!!!! فما بالك بقي لو روحت قولت واحد بو بويه عربيتي و كمان عاوزيهم يدورو عليه؟؟؟!!!!!!

**hero** · 31-07-2007 09:07 PM

الله خير حافظ وهو ارحم الراحمين...
طيب اية العمل ...السكوت علي مواضيع زي دي هايخلي الناس ايلي بتعمل كدة تزيد في افاعالها ...
مش بعيد بعد كدة يبقي الاعتداء علي الناس نفسها مش عربياتها ...
يعني تخيل موقف افتراضي ان واحد بيركن عربيتة ونازل محترم لابس بدلة شيك...وواحد من اياهم غرقة هو وعربيتة بمادة كاوية ...!!!؟
انا عارف ان متابعه شيء زي كدة مش سهل....بس اضعف الايمان ...هو انك تبلغ مش علشان يقبضوا علي ايلي عمل كدة...بس علي الاقل يحاولو ينقذوا الضحية القادمة....
وربنا يحفظنا جميعا....

**hazem_khidr** · 31-07-2007 09:21 PM

انا عارف ان متابعه شيء زي كدة مش سهل....بس اضعف الايمان ...هو انك تبلغ مش علشان يقبضوا علي ايلي عمل كدة...بس علي الاقل يحاولو ينقذوا الضحية القادمة....

مفيش حد حيتابع حاجه صدقني.
انا عن نفسي لو ماشي في الشارع حتي لو بالعربيه و لقيت واحد بيبوظ في عربيه حد بالمنظر دا بقف و بنزل اضربه مش بتفاهم معاه و ببقي عاوز اخده علي القسم لولا الناس بتخش و تقول حصل خير و كده