الموضوع: بالصور : تقرير عن تغيير فوانيس لانوس أمامي بفوانيس استيراد و توضيح الاختلافات

السلام عليكم و رحمة الله و بركاته

نور العربيه الأمامي كان أشبه بنور الشمعه و ده كان شكل الفوانيس

وش الفانوس اليمين سايح

الفانوس الشمال طلع في الصوره أحسن من الواقع المرير بسبب فلاش الكاميرا

بعد ما جمعت معلومات عن الموضوع من المنتدى

قلت ابدأ التنفيذ

من باب نسب الفضل لأهله لازم اوضح أولا أن في معلومه قالها الأستاذ محمد ممدوح في موضوع سابق وفرت عليا مجهود كبير في الموضوع ده و هي أن النور الصغير في الفوانيس الاستيراد بيكون مالوش مكان داخل الفانوس و بيعوضوه بلمبة أشاره 2 بول بتشتغل نور صغير + أشاره في نفس الوقت عشان كده اهتميت أوي اني اشتري الفوانيس بالفيش بتاعتها

المهم لقيت فعلا الفانوس الاستيراد مقفول بطبه مكان النور الصغير

أما الفانوس القديم ده مكان اللمبه بتاعت النور الصغير

حاجه تانيه ان الفيشة و الدوايا بتوع الأشاره في الفانوس القديم 2 رجل لأنها أشاره فقط

أما الفانوس الاستيراد فالفيشه 3 رجل لأنها نور صغير + أشاره

التركيب :

خليت الكهربائي مايقصش الفيش بتاعت العربيه لكن يقشر السلك قبل الفيشه و ياخد توصيله للفيش الجديده عشان لو اشتريت فوانيس جديده فيما بعد أقدر اركبهم على فيش العربيه الأصليه بسهوله و تم عزل الفيش الأصليه بشيكرتون للحفاظ عليهم

كان رأي الكهربائي انه يشيل الطبه بتاعت النور الصغير و يشغل الفانوس على الوضع التقليدي

(نور صغير + واطي + عالي في مكان) و (أشاره في مكان)

لكن انا رفضت قولت اجرب الشكل الجديد ولو معجبنيش ممكن ارجعه فيما بعد للوضع التقليدي

الخلاصه لو لقيت الفوانيس من غير فيش ممكن تاخد ضفيرة الفانوس القديم و تشغله على الوضع التقليدي للانوس

التكلفه :

سعر جوز الفوانيس سموك استيراد 400 جنيه

مكان الشراء البيت الكوري خلف سوق السيارات مدينة نصر

التركيب 25 جنيه

النتيجه :

فرق شاسع في الأضائه على الرغم من تركيب نفس اللمبات القديمه 260\200 مع وجود كتاوت نور

أيه مقترحات حضراتكم لأنسب لمبه من اللمبات دي الموجوده عند الموزع ده Crazy Car Store

و ده الشكل النهائي