اقرا كتالوج عربيتك.. هتستريح

**borio1704** · 06-08-2014 05:09 PM

اقرا كتالوج عربيتك.... فعلا هتستريح

الصراحة أنا مستغرب قوي ازاي إنسان دافع في عربية فوق الـ100 ألف جنيه ومستخسر يضيع من وقته ساعة أو ساعتين يفر في الكتالوج اللي جاي معاها!!!!

صحيح الكتالوج شكل صفحاته كتير ومكتوب فيه بخط صغير.. يعني ممكن ياخد مننا وقت كبير علشان نخلصه

بس أنا ما قلتش يقراه بالتفصيل... يفرّ فيه ويشوف المعلومات اللي ممكن يكون محتاجها.. ولو من باب الفضول!!

والله 80% على الأقل من الأسئلة اللي واجهتها في المنتدى جوابها موجود في الكتالوج.. بس احنا للأسف كسلانين شوية.

وفي الآخر نسأل ناس ما يكونش عندها خبرة ويفتوا .. ونمشي وراهم وبعدين نزعل لما فتاويهم تبوظلنا الدنيا.

وعلشان أسهل على الناس اللي لسه ما شافتش كتالوج العربية من ساعة ما اشتريتها.. هشرح ببساطة الكتالوج متكون من إيه في معظم الأحوال.

الكتالوج في معظم الأحوال متكون من الأقسام دي:

- مقدمة.. وده غالبا بيكون فيه معلومات عن كيفية تليين العربية وإيه نوع البنزين اللي تحطه.

- لمحة سريعة عن السيارة ..... وده غالبا بيبقى عبارة عن صور للأجزاء الرئيسية للسيارة وتسمية كل جزء منها.

- تعرف على سيارتك... وده فيه شرح لكل الوظائف والأوبشنز اللي في العربية وازاي تستخدمها .. وطبعا فيه أوبشنز كتير ممكن ما تكونش موجودة في العربية فعليا... بس مفيش حاجة من الأوبشنز اللي ممكن تنزل في العربية مش مشروحة فيه.

- نظام الأمان .... وده وبيشرح الوظائف والإمكانيات الموجودة في العربية من ناحية الأمان.. زي حزام الأمان والإيرباج بأنواعه المختلفة.. وكمان بيديك نصايح علشان الأطفال وازاي تحافظ عليهم في العربية.

- قيادة السيارة..... وده بيشرح إزاي تسوق سيارتك بحيث تحافظ عليها لأطول وقت ممكن.. زي إزاي تشغل العربية وإزاي تستخدم الفتيس العادي والأوتوماتك وازاي تستخدم الفرامل.. وكمان إزاي العربية بتتصرف مع أنظمة السلامة زي الـabs والـesp ... ده غير إنه بيديك نصايح ازاي تسوق عربيتك بحيث توفر بنزين وازاي تستخدمها في الحالات الطارئة.. إلخ.

في رأيي .. ده أهم قسم تقراه قبل ما تسوق العربية خالص.

- حالات الطوارئ... وده بيشرح لو اتعرضت لحالات طوارئ أو أعطال تتصرف ازاي.

- الصيانة... وده في رأيي من أهم الأقسام ... وفي القسم ده بيشرح إيه هي الحاجات اللي يتعملها صيانة وكل قد إيه... وكمان ممكن يشرحلك الحاجات اللي ممكن تعملها بنفسك وإزاي تعملها... وكمان ازاي تحافظ على شكل العربية.

- المواصفات... وفي القسم ده بيشرحلك أهم مواصفات السيارة ولو فيه سوائل بتتغير زي الزيوت مثلا بيقوللك مواصفاته إيه... ده غير كمان أنواع اللمبات المستخدمة .. والكاوتش تنفخه على كام.. وحاجات تانية كمان.

طبعا... مش كل الكتالوجات زي بعض... ممكن تلاقي معلومات مكتوبة في أقسام غير اللي أنا ذكرتها فوق.. وممكن تلاقي أقسام مدمجة مع بعض.

بس الأهم.. إننها هنلاقي في الكتالوج كل المعلومات اللي احنا محتاجينها علشان نحافظ على العربية.. بس احنا ندور... وأكيد هنلاقي.

...

**No Comment** · 10-08-2014 12:35 PM

كلامك نظرياً جميل يا م.أحمد ... لكن فعلياً الناس بتستسهل وبتكسل انها تفهم او تضيع وقت فى القراءة .
عندى مثلاً منزل مانيوال العربية pdf وبلجأله فى بعض مشاكل العربية ذات الطبيعة الغامضة ... بس للأسف الميكانيكية اوالفنيين أو حتى بعض المهندسين فى المراكز المتخصصة بيستكبروا انهم حد يقولهم اعمل كذا زى ما هو مكتوب فى المانيوال لانهم أخدوا واتعلموا بطريقة التجربة والخطا وليس الرجوع إلى أصل الأشياء فى كتيب العربية .

**borio1704** · 13-08-2014 05:21 PM

المشاركة الأصلية كتبت بواسطة No Comment

كلامك نظرياً جميل يا م.أحمد ... لكن فعلياً الناس بتستسهل وبتكسل انها تفهم او تضيع وقت فى القراءة .
عندى مثلاً منزل مانيوال العربية pdf وبلجأله فى بعض مشاكل العربية ذات الطبيعة الغامضة ... بس للأسف الميكانيكية اوالفنيين أو حتى بعض المهندسين فى المراكز المتخصصة بيستكبروا انهم حد يقولهم اعمل كذا زى ما هو مكتوب فى المانيوال لانهم أخدوا واتعلموا بطريقة التجربة والخطا وليس الرجوع إلى أصل الأشياء فى كتيب العربية .

أعتقد حضرتك بتتكلم على كتالوج الصيانة Service Manual.. مش الكتالوج اللي بييجي مع العربية Owner's Manual

أتفق مع حضرتك بدون شك إن معظم اللي بيشتغلوا في الصيانة بشكل عام بينفذوا الشغل زي ما اتعودوا.. وللأسف ده راجع لإن البيئة المصرية بتعتبر المعلومة الفنية سر كبير، واللي معاه معلومة ما بيقولهاش للي أصغر منه علشان ما يتفوقش عليه.

وكتالوج الصيانة اللي يعتبر المرجع لكل ماكينة للأسف مش متاح لكل اللي بيشتغلوا في الصيانة.. وإذا كان متاح فمشكلة اللغة هي أكبر عائق.

أنا باكلمك من خلفية شغلي كمهندس صيانة لمدة 6 سنين من حياتي.

إنما لو اتكلمنا على الكتالوج اللي بييجي مع العربية.. فده هيوفر معلومات كافية للمستخدم العادي إن يحافظ على عربيته في أفضل حالة لأطول وقت ممكن..

وهو ده اللي نفسي الناس تعمله..

ونفسي كمان ألاقي كتالوج في عربية مستعملة

...

**DEVIL333** · 30-08-2014 01:53 AM

مهم جدا لمعرفة تفاصيل السيارة

**monamize4** · 08-09-2014 06:56 PM

يااااااااااااه على موضوع الكتالوج دا
لو كل واحد قرا الكتالوج كويس قبل ما يسأل ,, هيوفر على نفسه اسئلة كتييييييييير

ابسط حاجة السؤال المتكرر ((العربية بتاخد كام لتر زيت ؟))
اللى اعتقد ان فى حوالى 1000 موضوع ف المنتدى معمولين للسؤال دا بس
و ف حين اجابته بمنتهى البساطة ف الكتالوج