ما خاب من استشار تحت امركم فى اى استشارات مالية او عقارية

**mfe** · 06-08-2014 11:30 PM

الحقيقة ترددت كتير اكتب فى الموضوع ده بس فى مواضيع مختلفة الكلام جاب بعضه و حسيت ان كتير من الاعضاء خاصة الى بره مصر نفسهم يحطوا فلوسهم فى حاجة مضمونة جوه مصر و دايما بيسالوا و احيان كتير بيسالوا الشخص الغلط فانا قررت اساعد اخواتى هنا مع توافر وقت الفراغ الكافى ليه
بداية اعرفكم بنفسى انا اسمى الدكتور محمد و مش هقول بقية الاسم علشان الموضوع ده يمكن يبقى حساس لشغلى معايا دكتوراة من امريكا و اشتغلت عمرى كله تقريبا بره مصر ماعدا اخر ٥ سنين باشتغل فى مؤسسة كبيرة امريكية و ماسك الاستثمار فى مصر و تونس و شرق اوروبا سواء الاستثمار العقارى او المالى يعنى اسهم و سندات انا عندى ٤٢ سنة و الفترة الاخيرة انفصلت عن مراتى الاجنبية الى رفضت تعيش فى مصر و معنديش ولاد و مضرب عن الزواج حاليا ففى الفترات الى باقضيها فى مصر غالبا مبخرجش بره البيت خالص و طبعا زهقان من التليفزيون و من كل حاجة فقررت انى انفع اخوتى هنا لو حد عايز يستشرينى فى شراء عقار او فى كيفية استثمار فلوسه
انا طبعا الحمد لله و الشكر ليك يارب حققت اكتر بكتير من الى بحلم بيه ماديا يمكن انا فشلت فى تكوين اسرة و اطفال بس اعتبرت ان ده نصيب و النصيب هيجى فى الوقت المناسب
فاى حد عايز يسال عن العقارات فى مصر او تركيا او الاستثمارات او دراسة جدوى لمشروع صناعى انا تحت امره و كذلك عن الاسهم المصرية او التركية او الامريكية بس على شرط انا دورى يقتصر على النصيحة و التوجيه لا اسوق لاى مشروعات و لا اى توصيات مباشرة بس هساعد كتير فى انى اوجهك للاستثمار الى يناسب ظروفك و شخصيتك و المخاطر الى ممكن تتحملها و العائد المتوقع ليك و طبعا اكيد انا لا اسعى لاى استفادة من اى نوع يعنى الموضوع ده هيبقى لنشر ثقافة استثمارية ليس الا
طبعا انا عايز الناس تعذرنى لو حد سالنى و ماجاوبتش عليه اكيد هكون مشغول فى شغل تانى او مسافر بره مصر
برضه الى هيسال عن مشروع تجارى او محل مش هقدر افيده لانه ليس مجالى و مفهمش فيه علشان كده انا حددت المشروعات الصناعية لان جزء من شغلى هو تاسيس هذه المشروعات و هيكلتها

**ali ashraf** · 06-08-2014 11:44 PM

د. محمد الفاضل السلام عليكم عندى شقة 175 متر بهضبة الاهرام فى عمارة ساكنة بالدور الثانى فوق الارضى و تطل على حديقة و على الوجهة بحرى العمارة بمنطقة الفيلات (ن) بها مصعد طبعا و مفيش فيها غاز تشطيب سوبر لوكس كنت شطبتها علشان السكن لكن يبدوا انى هنقل من القاهرة و عايز استثمرها . لو حبيت ااجرها قانون جديد تبقى فى حدود كام؟ و هل وجود اجهزة تكييف ترفع قيمة الايجار؟ الحقيقة انا معرفش فى العقارات و الايجار بس عايز ما يرضى الله المناسب لى و المناسب للمستأجر و ما هى القوانين المتبعة فى ايجار القانون الجديد يعنى سنوى و لا سنتين و هل يزيد سنويا؟ مع ملاحظة انى محتاج اكبر دخل ممكن و الشقة لو اتباعت ثمنها فى الوديعه اللى زادت الى 11 و 12% ممكن تكون دخل ثابت و مستقر بس فى المقابل اسمع ان اسعار الشقق فى حدائق الاهرام هتزيد عند دخول المترو و افتتاح المتحف الدولى فى انتظار رايكم الكريم مع خالص تحياتى

**mfe** · 07-08-2014 12:01 AM

المشاركة الأصلية كتبت بواسطة ali ashraf

د. محمد الفاضل السلام عليكم عندى شقة 175 متر بهضبة الاهرام فى عمارة ساكنة بالدور الثانى فوق الارضى و تطل على حديقة و على الوجهة بحرى العمارة بمنطقة الفيلات (ن) بها مصعد طبعا و مفيش فيها غاز تشطيب سوبر لوكس كنت شطبتها علشان السكن لكن يبدوا انى هنقل من القاهرة و عايز استثمرها . لو حبيت ااجرها قانون جديد تبقى فى حدود كام؟ و هل وجود اجهزة تكييف ترفع قيمة الايجار؟ الحقيقة انا معرفش فى العقارات و الايجار بس عايز ما يرضى الله المناسب لى و المناسب للمستأجر و ما هى القوانين المتبعة فى ايجار القانون الجديد يعنى سنوى و لا سنتين و هل يزيد سنويا؟ مع ملاحظة انى محتاج اكبر دخل ممكن و الشقة لو اتباعت ثمنها فى الوديعه اللى زادت الى 11 و 12% ممكن تكون دخل ثابت و مستقر بس فى المقابل اسمع ان اسعار الشقق فى حدائق الاهرام هتزيد عند دخول المترو و افتتاح المتحف الدولى فى انتظار رايكم الكريم مع خالص تحياتى

استاذ على عائد الايجار فى مصر قانون جديد يتراوح بين ٤-٦٪ من قيمة العقار نفسه على حسب مستوى التشطيب الداخلى لان معظم عقارات مصر تباع من غير تشطيب داخلى و المالك هو الى بيشطب يعنى لو شقة تمنها ١٠٠ الف يبقى تتاجر فى السنة بسعر حوالى ٤٠٠٠ الى ٦٠٠٠ جنيه حسب مستوى التشطيب جواها و التكييفات و خلافه فيه استثناءات للكلام ده بس قليلة زى الشقق المصيفية و المبانى للاغراض الخاصة
بالنسبة لك علشان الشقة مميزة هيبقى ٦ ٪ من تمن الشقة سنويا و ليس شهريا سعر مناسب جدا للايجار
الشقق فى حدايق الاهرام هتزيد طبيعى بس مش زيادة مميزة قوى لطبيعة المنطقة مش محتاج الشقة بيعها و حاول تاخد ارض فى توسعات ٦ اكتوبر الشمالية حتى لو هتزود شوية ساعتها هتشعر بعائد الاستثمار او ممكن تاخد شقة هناك قسط بس دور على منطقة مميزة

**ali ashraf** · 07-08-2014 12:09 AM

جزاكم الله خيرا

**mfe** · 07-08-2014 12:18 AM

هتكللم دلوقتى على بعض المصطلحات الى يمكن تعدى على كثير مننا و هو مش فاهمها
اولا السهم هو مساهمة فى ملكية شركة او مشروع لو السهم ده ممكن يتباع او يتشرى فى البورصة يتسمى سهم متداول و اى بورصة فى الدنيا هى عبارة عن سوق لبيع و شراء المساهمات او الحصص دى و مؤشر البورصة هو مؤشر لقياس تغيرات اسعار اقوى مجموعة اسهم موجودة فى السوق لحظيا و يتغير المؤشر على حسب تغير السعر و بيتحسب بطريقتين اما متوسط السعر خلال اليوم زى مصر او اخر سعر وصله السهم زى امريكا

**mfe** · 07-08-2014 12:29 AM

السند
هو عبارة عن قرض صاحب السند بيديه لشركة بشكل مباشر مش من خلال بنك و فى المقابل الشركة بتديه فايدة كل ستة شهور بنسميها كوبون السند الفايدة دى بتبقى ثابتة طول عمر السند مش بتتغير بتغير الفايدة فى البنوك و السندات هى وسيلة التمويل الاولى فى امريكا لان الشركات ممنوع عليها تقترض من البنوك
السند سعره ممكن يزيد او يقل رغم ان الفايدة ثابته و ذلك نتيجة تغير الفايدة فى السوق
يعنى انت لو واخد سند بسعر كوبون ١٠٪ سنويا و فايدة البنوك نزلت بقت ٨ ٪ طبيعى السند بتاعك هيعلى تمنه علشان يعوض فرق الفايده ده يعنى لو السند انت واخده بالف و السعر ١٠٪ لو سعر الفايدة بقى ٨٪ السعر هيزيد يبقى ١٢٥٠ جنيه مثلا كتوضيح فقط ليس اكثر

**buisnessman** · 07-08-2014 12:30 AM

السلام عليكم
أنا واتنين من أصدقاءي معنا نبلغ 80000 جنيه وكنا عاوزين نستثمره
هل فيه أي فكرة بالنسبة للمشاريع والاستثمارات المرتبطة بتخصص حضرتك ينفع فيها المبلغ ده
وكم العائد المتوقع لها
؟

**zorg** · 07-08-2014 01:00 AM

والله انتا تشكر mfe خبرة صعب ان الواحد يسيبها تعدى كده من تحت ايده
يعنى انتا رايك لو انا عايز فيلا او بيت يبقى اركز على المناطق اللى انتا قولتها دى - بس تفتكر انى ممكن الاقى حاجة مبنية جاهز لانى انا ماليش خبرة فى مجال انى اجيب مقاول يبنى و الكلام ده واخاف ينضحك عليا وخصوصا ان الواحد مقروص من المقاولين دول قوى
------
وعايزك بقى تكلمنى على الشقق لو عايز اجيب شقتين فى دور تانى ولا حاجة كل شقة 160 متر ولا حاجة قولى برضه على المناطق الكويسة و الراقية اللى ممكن الف اشوف فيها سواء فى التجمع او اكتوبر

نكمل النقاش هنا يازعيم

**Ah.Farid** · 07-08-2014 01:53 AM

د محمد السﻻم عليكم
فى مشاركة سابقة كنت اتكلمت عن فرص اﻻستثمار فى اراضى بمدينة بدر امام مدينتى والمكان هناك شاسع هل لديك معلومات اكتر عن جعرافية المكان واسعارة اكون شاكر جدا

**mfe** · 07-08-2014 02:23 AM

المشاركة الأصلية كتبت بواسطة zorg

نكمل النقاش هنا يازعيم

تحت امرك ياباشا
بص كل حاجة انت بتعملها ليها عائد اسمه العائد الزمنى و ده بيرتبط بسهولة او صعوبة الى انت بتعمله يعنى مثلا انت عايز مبنى جاهز فكده فيه واحد تانى بناه الى بناه ده مستنى عائد من البنى غير عائد الارض نفسها
فى الحالة دى لو هو متكلف مليون هيطلب مثلا مليون و نصف غير تمن الارض نفسها
حضرتك بقى ممكن لى مش عايز وجع دماغ و فى ناس كتير كده هتدفع و تاخد المبنى جاهز بس لو بتاع وجع الدماغ زى هتقف على بناك و تتاكد من كل طوبة فيه و توفر الفلوس دى
وصلت الفكرة