اللهم صل على محمد وعلى آله وصحبه أجمعين
انا مسافر من القاهرة لمرسى مطروووح بكرة ان شاء الله
هل الطريق يوجد بة كمائن سرعة او رادارات او كمائن عادية
هل يوجد مناطق اهدى السرعة فيها
ما هى الاماكن الى ينفع يتخرج فيها فى مرسى مطروووح ؟
عرض للطباعة
اللهم صل على محمد وعلى آله وصحبه أجمعين
انا مسافر من القاهرة لمرسى مطروووح بكرة ان شاء الله
هل الطريق يوجد بة كمائن سرعة او رادارات او كمائن عادية
هل يوجد مناطق اهدى السرعة فيها
ما هى الاماكن الى ينفع يتخرج فيها فى مرسى مطروووح ؟
الطريق هيكون قلق بعد موضوع كمين مارينا ف خلى بالك
ما تروحش بعربية
خد سوبر جت ووفر مجهودك
مطروح صغيرة تتاخد على الرجل
و الشوطاىء البعيدة المواصلات ليها اوفر بكتير من انك تاخد عربية
أنا سافرت مطروح قبل كده مع اخويا من المحلة
سافرنا لحد اسكندرية ومنها دخلنا علي طريق
طويل مباشر مكتوب في اوله يافطه كبيرة مطروح 255ك
الطريق الطويل ده من أوله لاخره مافيهوش اي رادارات ولا تهدئة سرعه ولا مطبات ولا اي شئ نهائي
وطريق ممتاز مافيهوش نقر او حفر
صراحة انا ماعرفشي دخلتة منين لكن هاسالك
امتى
تقريبا 5 شهور !!
ليه ؟ هما لغوا مطروح ولا ايه :d
الطريق هتلاقى عليه كماين و عادة فى رادارات سواء على طريق اسكندريه او طريق العلمين و طريق مطروح
خليك فى السرعه العاديه و ربنا يستر طريقك
في رادار موجود دايما قبل مدخل مطروح وعلي طول الرادار ده موجود وبيدققوا علي الحزام وكده
وبعد الحادثتين الاخيرين اللي حصلوا عند مارينا اكيد هيبقي في اكتر من كمين علي السكة خاصة الايام دي
اما عن الاماكن الكويسة ... حضرتك عندك منطقة فندق البوسيت وطلعت حرب دي من احسن المناطق هناك
عند شاطئ الغرام ده برضو من احسن الشواطئ ... شاطئ مينا حشيش حلو بس يعيبه ان مفيش خدمات علي الشاطئ
الابيض وعجيبة ... دي كده تقريبا كل مطروح ... في منطقة عند فتح الله علي البحر اللي هي عند المحافظة فيها ماكدونالدز وبيتزا هت وكنتاكي وكوك دور ... ماك وكوك دور واخدين اماكن علي البحر مباشرة القعدة فيها مجانية
في وشهم في حلواني صابر برضو ومطعمم حسني وعامل كافيه برضو جديد علي البحر ... كل ده في مربع واحد ... وبالنسبة لو عاوز تشتري حاجة هناك في فتح الله ... ولو عاوز مطعم كويس وقعدات عربي في كوكو العربي هناك مطعم جامد جدا وكمنة ... رحلة سعيدة ... وانصحك روح بالعربية عشان تقدر تلف وتستمتع في اي وقت انا روحت مرة بدون عربية كانت غلطة بصراحة العربية توديك اي مكان انت عاوزه في اي وقت ولا تتفق مع سواق وما يجيلكش ولا الكلام ده كله عربيتك وقت ما تحب تتحرك اتحرك ووقت ما تحب ترتاح ترتاح ... واتمني لك رحلة سعيدة
نصيحه امشي على السرعات المقرره وبلاش السرعه العاليه - ربنا يستر طريقك وتروح وترجع بالسلامه
لسة راجع من مطروح .. و دى كانت اول مرة من حوالى 6 سنين اروح مطروح ... مدخل طريق العلمين بقى كوبرى مش زى الاول بتاخد يوترن و لما بتنزل من الكوبرى بتلاقى حتة مزروعة على الجانبين و الجزيرة الى فى الوسط دى بيكون فيها ردار و اخر الزرع ده بيكون كمين .. فمتجريش فى الحتة دى و بعديها صحراء اجرى براحتك .. المشكلة ان بعديها الطريق زبالة علشان جردينه و بيصلحوه فلو جريت العربية حتبدهدل منك معدا اخر 20 كيلو مكنوش جردهم وقت ما سفرت
لما تخش على طريق مارينا .. اجرى زي ما انت عايز لغاية مراسى بعديها الطريق زبالة و مكسر و قبل مطروح فى كمين زى ما الاستاذ جورج تفضل و قالك ... نصيحة الطريق سىء جدا للجرى خصوصا لو راكب عربية واطية زى حلاتى .. الانترا 2012 و كانت محملة .. العربية اتمرطت
انا اخر مره روحت كان من سنه والطريق مكنش فيه رادارت ولا كماين ولا اى حاجه والطريق كويس كمان
بص حضرتك الرادار ده قبل مدخل مطروح بشوية بس ركز فيه ... انا اتمسكت فيه قبل كده بصراحة وكل ما اروح الاقيه فهما موجودين دايما والحزام كمان وخلي بالك هناك اشارات كتير ... وخلي بالك من المخالفات عشان المدينة منضبطة مروريا بنسبة كبيرة ... وفعلا الطريق مش مؤهل للجري غير حتة صغيرة كده قرب المدخل هي اللي نضيقة
ورحلة سعيدة في مدينة جميلة فعلا من احلي الشواطئ في مصر
شكرا يا رجالة على النصائح الجميلة دى :)
انشاء الله اجازه سعيده
انا لسه راجع من مطروح امبارح قعدت هناك 5 ايام من يوم الجمعه اللى فات
النصيحه الاولى : ما تسمعش كلام حد يقولك روح مواصلات خصوصا انك معاك العائله هتتبهدل من غير عربيه
2- طريق اسكندريه الصحراوى جميل جدا جدا لحد مدخل طريق العلميين والاسفلت ناعم والحارات متحدده بعيون القط . بس اياك تزود السرعه عن 100
3- مدخل طريق العلمين بقى عباره عن كوبرى فى اقصى اليمين بدل اليوترن وفيه يفطه كبيره قبلها بتقولك المتجه للعلميين يلزم اقصى اليمين
4- طريق العلمين ينفع تجرى فيه عادى بس الاسفلت بتاعه قديم ومتشقق ومليان حفر صغيره بس متجريش فى اول 15 كيلو واخر 15 كيلو عشان الرادارات موجوده فى المنطقتين دول ع الطريق
5- نوصل بقى لاخر جزء من الطريق اللى هو الطريق الساحلى الدولى وهو لا دولى ولا زفت .طريق قديم جدا متهالك جدا مليان مطبات هوا والعربيه تفضل طالعه نازله والاسفلت مخرفش وخشن لحد قبل مطروح بشويه كده بدأوا يصلحوا فيه ويعملوا اسفلت جديد
6- فعلا فيه كمين قبل مرسى مطروح كان موقف عربيات ملاكى كتييييير على جنب عشان السرعه والحزام
7- الطريق وانا راجع كان عادى جدا ومفيش اى استنفار امنى ملحوظ ع الطريق بعد حادثه العلمين وماوقفتش فى ولا كمين
8- خلى بالك وانت راجع بقى ع القاهره فى كوبرى جديد بيخلصوا فيه بيعدى من فوق مزلقات قطر بعد ما تخرج من مطروح ب 20 كيلو تقريبا .فى منزل الكوبرى فى زى فحت بعرض الطريق .طبعا وانا نازل من ع الكوبرى بسرعتى لبست فيه ومفيش اى تنبيهات بتهدئه السرعه اطلاقا
9 - خلى بالك بردو وانت راجع ع القاهره وبعد ما تخلص طريق العلمين وداخل على اسكندريه الصحراوى فيه مطبين ورا بعض رفيعين وعاليين ما شوفتهمش بردو ولبست فيهم ومفيش اى تنبيه قبلها
10- رحله سعيده وفعلا مرسى مطروح من اجمل مدن مصر بس المسئولين يهتموا بالطريق بتاعها شويه
مش حتعرف تجرى , الطريق زحمة اليومين دول والأسفلت زبالة ومشقق ومليان حفر , والطريق حارتين ضيقين ومليان يو ترنات
( انا بتكلم على طريق الساحل الشمالى , مش الصحراوى ولا وادى النطرون )
طيب وايه اقصر طرق السفر لمطروح؟
شكرا يا رجالة على النصائح الجميلة دى :)
انا وصلت امبارح الحمد لله
الطريق كويس الى حد ما ، اسكندرية الصحراوى طريق عادى و بعدين العلمين حارتين الشمال فى نقر كتيييير و اليمين يعتبر مفهوووش ، و اول طريق العلمين كان يوجد كمين سرعة فى اول 15 كم والطرييييق بعدها مفهووووش كماين ( دة ميمنعش بردو ان ممكن يكون فى كمييين فى آخر 15 كيلو فى طريق العلمين فى وقت لاحق ) وبعد طريق العلمين طريق الساحل و دة فى نقر كتير و الاسفلت فى بعض المناطق خشن ، قبل دخلت متروح بحوالى 25 :30 كم يوجد كمين (اعتقد انة ثابت ) بس لما عديييت علية مكنش بيوقف عربيات ، و بكدة يكون الطريق خلص .
المشوار متعب لكن يستحق هذا التعب :)
حمد لله على السلامه
حمدالله على سلامتك.. انا لسة جاى امبارح من مطروح وكنت ندمان أشد الندم إنى ما أخدتش عربيتى معايا
الموصلات هناك بقت آخر إستغلال
الله يسلمكم يا رجالة
و فعلا مترووووووح متترحش غير بعربية
ربنا يطمنكوا جميعا انا رايح ان شاء الله الجمعة الجاية وهروح بالعربية بشكركم علي تفاصيل الطريق كنتم محتاج منكم حد خبرة يقولي اقضي الاسبوع ازاي من حيث الشواطيء و المطاعم والخروجات والفسح كده يعني وتكون في الحونين... وشكرا
مفيش كلام بعد كده
اهلا بك فى مطروح