تقرير عن mg 350 s

**moazoz** · 07-08-2014 04:01 PM

السلام عليكم
اولا دي اول مرة اكتب في المنتدي او اعمل تقرير عن عربية اصلا فسامحوني لو اسلوبي في الكتابة غير موفق
انا معايا ال MG 350 S من حوالي 5 شهور عامل بيها حتي الان 13000 كيلو
هاكتبلوكو امكانياتها و عيوبها ايه

نبتدي بالمميزات و الامكانيات:
تقفيل الداخلي لحوض الموتور ممتاز (في رايي افضل من بعض السيارات الكوري لنفس الفئة)
تقفيل الكابينة الداخلية رائع
المساحة الداخلية للكنب و الكراسي الامامية العربية واسعة و مريحة جدا مقابض نيكل من الداخل
تابلوه ديجيتال بالكامل (عدادات سرعة ديجيتال)
كمبيوتر رحلات (قياس عدد الكيلومترات المتبقية لانتهاء البنزين - متوسط السرعة - نسبة حرق الوقود/100كيلو متر - تنبيه لعمل صيانة 10000- وعدد الكيلو مترات المتبقية للصيانة- عداد كيلومترات الرحلة - )
كراسي كهرباء فوق وتحت و الظهر في الفئة الاعلي فقط
التحكم في مستوي ارتفاع الطارة
فوجات امامية و خلفية
LED لكل وظيفة في العربية (ABS - Hand Break-مقياس ضغط هواء العجل-الموتور - البطارية - الزيت - ال Airbags - الحزام - الانجيكشن -
4 زجاج كهرباء ( زجاج السواق اوتوماتك فتح و قفل و بيفتح لو فيه اي عائق عليه وهو بيقفل )
التابلوه بشكل عام مريح و شيك
الابواب بها اماكن تخزين و الابواب الامامية بها اماكن لزجاجة
التابلوه بيعمل ك مبرد مع التكييف وممكن فتحه او غلق المبرد حسب الحاجة
التكييف منه بكر او ديجيتال علي حسب الفئة
سينسور بارك
الاشارات الجانبية بها تكة زي الرعاش بتدي 3 مرات فلاش و تسكت و تستخدم في الانتقال من حارة الي اخري
مرايات الجانبية كهرباء و الفئة الاعلي بها مرايات ضم
فتحة سقف
بعد ابطال محرك السيارة ممكن تشغل النور الامامي و تقفل العربية و بيقفل اوتوماتك بعد 60 ثانية من غلق الابواب ويستخدم لانارة الطريق للسائق لو الشارع مظلم
الكنبة بتتقفل لزيادة مساحة الشنطة
مساحة الشنطة تعتبر من اعلي المساحات في فئتها
مسند كوبايات خلفي في الفئة الاعلي
مسند و مكان تخزين امامي
اماكن لحفظ الكوينز و الكروت
الكاسيت منه فئتين:
فئة الاولي (CD-AUX-USB-Radio)
الفئة الثانية( Touch Screen - GPS - Bluetooth -Mobile calls - rear camera - DVD player - CD - AUX - USB - Radio)
بها 4 سماعات او 8 سماعات
نظام صوتي DOLBY محترم جدا مش محتاج تركب سماعات
مكان ال AUX و ال USB غير ظاهر للحفاظ علي المظهر العام للتابلوه
مفتاح ريموت و فتح الشنطة بالريموت
مفتاح الشنطة من الكابينة كهرباء مش شداد
تارة مالتي في الفئة الاعلي
بها مخرج كهرباء مشابه لمخرج الولاعة 12V
تانك البنزين 55 ل + 5ليتر احتياطي

نتكلم بقي في المهم:
ال Safety:
نظام فرامل جيد ABS - EBD اداءه معايا كويس جدا
2 Airbags
نظام توازن الكتروني ESP
نظام غلق اوتوماتك للابواب عند التحرك بالسيارة
مفيش مسوجر هو زرار كهرباء بيفتح و يقفل الابواب مع امكتنية فتح الابواب الامامية بعد شد الدراع مرتين
منبه لحزام الامان بيشتغل بعد سرعة 10ك و بيسكت بعد 3 دقائق و يعيد العمل لو العربية نزلت سرعتها عن 10ك و سرعت تاني
ثبات العربية اكثر من رائع عن تجربة ( طريق السخنة 186كم/ساعة - RPM 4500 والناس اللي كانت راكبة معايا مش حاسة بالسرعة)
نظام عزل للصوت عند غلق جميع النوافذ كويس جدا
نسبة ضوضاء الهواء عند السرعات من فوق ال 100 كم مقبولة جدا
جنوط 16
العربية عالية حتي مع الحمولة
اداء التكييف رائع جدا جدا حتي مع درجات الحرارة العالية
الموتور 1500 cc و105 حصان عند 6000 لفة/دقيقة اداءه هايل ولكن مع التكييف نقدر نقول مقبول
الفتيس:
4 نقلات اوتوماتك والحمدلله مابحسش ب ولا غيار بتنقل في سلاسة
طبعا L1 - L2 - R - P
3 انظمة للعزم S-W-E (القيادة الطبيعية وديه اقل استهلاك وقود - قيادة الرياضية - قيادة الثلج)
اداء العفشة كويس
نظام الايموبلايزر ضد تشغيل المحرك بدون مفتاحها الاصلي
كده معظم المميزات

نتكلم في العيوب:
انا شايف انها زيها زي اي عربية فيها مميزات و عيوب بس عيوبها مقبولة مش كوارث يعني مدام مش في السيفتي زي الفرامل لو التروس او العفشة

اولا استهلاك البنزين اعلي من المتوسط (جايز علشان الزحمة و التكييف علي طول شغال مش عارف )
اقصي عدد كيلومتر جبته بالتنك كله حتي الاخر كان 665 ك ب 53 لتر بنزين تقريبا
في صفارة في الفرامل بسيطة وديه هابلغكو بيها لما اروح صيانة ال 10000 هاعرف فيها ايه يعني
اداء الموتور مع التكييف نديله درجة مقبول مش وحش و مش حلو رمادي يعني
في بعض الاحيان لما العربية تتركن اكتر من يوم عملية تدوير الموتور باتخد 2 ثانية بتتاخر يعني عن الطبيعي برده هابلغها في التوكيل لما اروح
التوكيل نفسه انا شايف انه فيه مشكلة مابيشتغلش لا جمعة ولا سبت زي كيا مثلا
لو فيه حد عايز يسال علي حاجة انا ماكتبتهاش يقلي
وفي الاخر العربيات ديه اصلها بتبقي اقدام

**Hunting_Eagle** · 07-08-2014 10:57 PM

شكرا على المعلومات المفيدة

العربية مظلومة في مصر .. و المفروض تاخد شريحة بيع اكبر من كده

**moazoz** · 12-08-2014 04:49 PM

تقرير عن صيانة ال 10.000 كم ل mg350
عملت الصيانة في التوكيل ب 6 اكتوبر
ناس محترمة جدا و متعاونين جدا
كنت رايح عندي مشكلتين في العربية غير صيانة ال 10000 العادية
المشكلة الاولي كان في صفارة في الفرامل و غربلة بعد ال 100 كم
الثانية كان ماكنة الازاز الخلفي فجاه كدة وانا بقفل الباب الازاز وقع السير اتقطع جوه
الحمدلله غيرولي ماكينة الازاز بواحدة جديدة (من غير اي نقاش او مجهود في اني احصل علي ماكنة جديدة زي ما بيحصل في توكيلات كبيرة و يقلك ده سوء استخدام)
عملولي صنفرة للطنابير و ترصيص للعجل الامامي والحمدلله المشكلتين اتحلو و مجانا مع العلم ان الترصيص ده برة الضمان و بيتكلف 100 جنيه و صنفرة الطنابير بتبقي برة الضمان بعد ال 10000 ك وانا كنت رايح بيها 13000 وبيتكلف 100 جنيه)
المشكلة اللي في التوكيل انه في 6 اكتوبر محتاجين فرع ليهم ناحية القاهرة الجديدة او مصر الجديدة لان مراكز الخدمة لو في مشكلة في العربية بتقلك روح المركز الرئيسي اللي في 6 اكتوبر

**midooo_119** · 15-08-2014 12:20 AM

ربنا يباركلك فيها ... انا من وجهه نظرى مشكله العربيه ديه انها تحمل اسم ام جى لان الناس عارفه انها صينى و فقط الى اتبقى من شركه ام جى علامتها و لانها فخمه و بيتسخدموا مواد جيده جدا فغاليه فالناس تقولك اشترى كورى احسن عالاقل مش صينى و مضمون