محتاج نصيحه بخصوص مشكله

**Karim Alaa** · 08-08-2014 04:39 PM

اولا السلام عليكم و رحمه الله و بركاته

انا واقع فى حيره شديده و محتاج نصيحه و مش لاقى حد اتكلم معاه فهاعتبر الاخوه فى المنتدى اخواتى و اسف انى ممكن اطول بس الموضوع كبير شويه و ياريت اى حد يرد يقرا و يحط نفسو فى مكانى الاول

انا حاليا عندى 28 سنه لسه متخرج من كليه تجاره السنه دى 2014 السبب ظروف كتير حصلت بعد وفاه والدى و مش مهم ذكرها الان

انا حاليا خاطب من سنه و بشتغل مصمم مواقع الكمبيوتر ده هوايتى من زمان و الحمد لله بشتغل فى شركه و كمان Freelancer من البيت بعد الشغل و الحياه معايا كده تمام التمام اوى الحمد لله ماديا و معنويا و مبسوط

انا طبعا كان لازم اخلص الكليه السنه دى عشان مطردش منها بسبب الجيش اقصى سن 28 و عشان نفسى كمان و يبقى معايا مؤهل عالى

نيجى للمشكله بقى الجيش دلوقتى انا فاضلى بالظبط سنه و المفروض ابقى جبت الشقه و جهزتها عشان اتجوز و طبعا بقالى سنه بعافر و الحمد لله حوشت مبلغ معقول شويه كده و اقدر اجيب الى نفسى فيه ثانيا انا شغلى مش هينفع فيه اسيبه سنه و بعدين اجى سواء الى فى الشركه او الفرى لانس ببساطه لو سبت الشغل ده سنه مع السلامه ليه و لكل الى بكسبه حاليا ممكن احاول ابدا من الصفر بس مهياش حاجه مضمونه نهائى بنسبه 80 فى الميه مش هترجع زى مكانت لانى بنيت شغللى ده فى اكتر من 3 سنين

دلوقتى انا مطلوب منى اسيب شغلى و حياتى دى سنه مش هشيل فيها قرش و بعدين اطلع الاقى كل الى عملته هوا و ابدا من الصفر غير انى عندى التزام ناحيه خطيبتى و اهلها و هبقى محتاج اضاعف الى بحوشه مش اقعد سنه مفيش و اطلع برضه مفيش

انا كل الى محتاجه من الجيش كان انى اشتغل حكومه جنب شغلى freelancing عشان الامان الوظيفى فقط لكن شغلى الحمد لله كفيل جدا بانه يعيشنى كويس بس برضه محدش ضامن الظروف المهم انا حسبتها الحكومه مش بتطلب تعين بعد ال 30 و انا لو دخلت جيش هدخل فى 1/2015و اطلع فى 3/2016 يبقى فاضلى 5 شهور و اتم ال 30 كأن هتحصل معجزه و الاقى شغل فى 5 شهور بس

انا مش قادر اتخيل انى اسيب كل الى بنيته ده و اضيعه فى الهوا زى مقولت سنه مش هشيل حاجه و اخرج اقصى امل ليا انى ارجع الاقى شغل ب 1500 جنيه يعنى عشان اكمل ال بدائته عايزلى 3 4 سنين

اعمل ايه فى الحيره دى عقلى بيقولى كده كده مش هتشتغل حكومه اصبر سنتين و اروح اسوى موقفى

و فى نفس الوقت انا عمرى ممشيت شمال و مبحبش ابقى خايف من حاجه و كان نفسى اوى انى اشتغل حكومه كأمان ليا مع شغلى الخاص ومكنش هاممتى هاخد كام من الحكومه

ياريت قبل مترد تقرا الموضوع كله و تحط نفسك فى مكانى انا دماغى هطق و ملحوظه ده مش موقف سياسى من الجيش و لا انا كان فارق معايا السنه دى خالص و والله لو فى فى شغلى اجازه بدون مرتب كنت روحت و الى يحصل يحصل حتى لو خدونى 3 سنين مش هزعل ولا هفكر فى اى شىء بس انا مش قادر اتخيل واحد عاقل يدمر حياته بايديه بعد مربنا كرمه و بناها

ياريت يا شباب تساعدونى برايكم بعد متحوطو نفسكم فى موقفى و ياريت الى يقول راى يقول سببه عشان اقدر انا كمان اقتنع بيه

ممنوع إستخدام اللون الأحمر حيث أنه مخصص للمداخلات الإدارية
م ب 3

**بحار** · 08-08-2014 05:05 PM

الارزاق بايد ربنا ..
خليها على ربنا قادر زى ماعملك شغلك يعمل احسن منه ..
اهل خطيبتك عارفين يعنى ايه جيش وهيقدرو موقفك
ببلاش تتهرب من الجيش .. خليك صح احسن ..
ماتخفش ممكن يكون جيشك حته قريبه وتقدر تشتغل ولو يوم فى الاسبوع
موضوع شغل الحكومه ده طلعه من دماغك خالص .. حياتك فى الشغل الخاص لو ناجح زى ماقلت احسن الف مرة
انا كان قدامى فرصة اول ماتخرجت فى شركه محترمه ماتوفقتش ورجعت زعلان جداا ..
وبدأت عمل خاص وبعد السنين مامرت بأقول الحمد لله يارب انك ماستجبتش دعايا .. لأنى أحسن كتير الحمد لله

**Karim Alaa** · 08-08-2014 06:26 PM

شكرا اخى البحار و فى انتظار باقى الاراء

**midoabdeen** · 08-08-2014 07:04 PM

اولاً انت ممكن ماتدخلش الجيش اصلا ودا احتمال كبير على فكره

لما كنت بسمع الارجا بتاعتي كانت المواليد القديمه دي مش بيدخل منها حد خلي املك فى الله

ثانباً نصيحه لوجه الله انسي موضوع شغل الحكومه دا نهائي

انا شاب 24 سنه اهو اصغر منك قعدت سنه واحده فى الحكومه كرهت نفسي مرتبات تعبانه واللي بيشتغل زى اللى مش بيشتغل ونظام قمه فى الاهمال والاستهتار

صدقني والله الحكومه مش راحه خالص هي عايزه ناس كبيره واحد عمله قرشين كويسين ومحتاج يريح دماغه شويه انما فى بدايه الحياه اتمرمط فى القطاع الخاص هتستفيد خبره فى مجالك وفلوس فى نفس الوقت

طبعا الكلام دا بعيد عن قطاعات البترول والكهرباء والضرائب والاتصالات لان لو جاتلك فرصه فى الاماكن دي مافيش فيها تردد دول بياخدوا فلوس

ثالثاً انت شايل هم حاجه اصلا مش بايدك افرض لاقدر الله الشركة اللى انت فيها استغنت عنك وانت مش لاقي شغل فري برا هتعمل ايه

الارزاق بيد الله اوعي تقلق من النقطه دي ربنا زي ماهياخد منك حاجه هيديك الاحسن منها بدون نقاش

وربنا يوفقك للخير

**Mfaisal89** · 08-08-2014 07:52 PM

بص يا باشا من الآخر . انت دلوقتى عندك 28 سنة يعنى لو حتى دخلت جيش هتدخل وانت عندك 28.5 بالمستريح وهتخرج قبل ال 30 بحاجة بسيطة

وبما انك شغال فريلانسر والدنيا مظبوطة معاك يبقى من الآخر عاوز رأيئ الشخصى ؟

فكك من موضوع الجيش ده وقضى السنة ونص وانت فى بيتك معزز مكرم لغاية ما تتم ال 30 وتدفع الغرامة وتاخد شهادتك وسيبك من اللى بيقول مش هتدخل انا ياما شفت فى جيشى ناس دخلت وهى قدك ومافيش أوسخ من البهدلة والأهانة على كبر

ده رأيى ولو أنا مكانك ثق تماما انى مش هعمل الا كده

**Mfaisal89** · 08-08-2014 07:55 PM

أهم حاجة لو انت قدمت ورقك يبقى لازم تكمل يا معلم والا هتتعامل معاملة الهارب وهيفضل قاعدلك فى البخت طول عمرك انما لو لسة مقدمتش ورقك يبقى قدامك فرصة

**Karim Alaa** · 08-08-2014 08:39 PM

المشاركة الأصلية كتبت بواسطة midoabdeen

اولاً انت ممكن ماتدخلش الجيش اصلا ودا احتمال كبير على فكره

لما كنت بسمع الارجا بتاعتي كانت المواليد القديمه دي مش بيدخل منها حد خلي املك فى الله

ما هو انا يا كبير نفسى فى كده اوى نفسى فى التاجيل و يبقى كده الدنيا بقت فل الفل بس للاسف ك الناس بتقول ان ده كان قبل السنتين الاخرين و دلوقتى كله بيلبس خصوصا الى مش هيجى تانى زى

المشاركة الأصلية كتبت بواسطة midoabdeen

ثانباً نصيحه لوجه الله انسي موضوع شغل الحكومه دا نهائي

انا شاب 24 سنه اهو اصغر منك قعدت سنه واحده فى الحكومه كرهت نفسي مرتبات تعبانه واللي بيشتغل زى اللى مش بيشتغل ونظام قمه فى الاهمال والاستهتار

صدقني والله الحكومه مش راحه خالص هي عايزه ناس كبيره واحد عمله قرشين كويسين ومحتاج يريح دماغه شويه انما فى بدايه الحياه اتمرمط فى القطاع الخاص هتستفيد خبره فى مجالك وفلوس فى نفس الوقت

طبعا الكلام دا بعيد عن قطاعات البترول والكهرباء والضرائب والاتصالات لان لو جاتلك فرصه فى الاماكن دي مافيش فيها تردد دول بياخدوا فلوس

عز الطلب يا باشا يجيبو اى فلوس مش فارقه زى مقولت الى فارق معايا بس انى اروح الساعه 2 3 اشوف شغلى الحقيقى و معايا فى ايدى وظيفه امان لا عايز اشتغل و لا عايز فلوس كويسه :) اهى شغلانه مضمونه و تامينات و بتاع و زى منتا قولت مفيش شغل اصلا و الفلوس مش هتبقى القضيه :)

المشاركة الأصلية كتبت بواسطة midoabdeen

ثالثاً انت شايل هم حاجه اصلا مش بايدك افرض لاقدر الله الشركة اللى انت فيها استغنت عنك وانت مش لاقي شغل فري برا هتعمل ايه

الارزاق بيد الله اوعي تقلق من النقطه دي ربنا زي ماهياخد منك حاجه هيديك الاحسن منها بدون نقاش

وربنا يوفقك للخير

صدقنى عارف و متاكد ان الله سبحانه و تعالى بيرزق بس برضه اعقلها و توكل مش شايف اى ميزه نهائى فى الحوار غير بس انى مبقاش ماشى غلط ولا يحصلى حاجه فى السنتين دول و ارجع اندم لا قدر الله

المشاركة الأصلية كتبت بواسطة mfaisal89

بص يا باشا من الآخر . انت دلوقتى عندك 28 سنة يعنى لو حتى دخلت جيش هتدخل وانت عندك 28.5 بالمستريح وهتخرج قبل ال 30 بحاجة بسيطة

وبما انك شغال فريلانسر والدنيا مظبوطة معاك يبقى من الآخر عاوز رأيئ الشخصى ؟

فكك من موضوع الجيش ده وقضى السنة ونص وانت فى بيتك معزز مكرم لغاية ما تتم ال 30 وتدفع الغرامة وتاخد شهادتك وسيبك من اللى بيقول مش هتدخل انا ياما شفت فى جيشى ناس دخلت وهى قدك ومافيش أوسخ من البهدلة والأهانة على كبر

ده رأيى ولو أنا مكانك ثق تماما انى مش هعمل الا كده أهم حاجة لو انت قدمت ورقك يبقى لازم تكمل يا معلم والا هتتعامل معاملة الهارب وهيفضل قاعدلك فى البخت طول عمرك انما لو لسة مقدمتش ورقك يبقى قدامك فرصة

ناس كتير و منهم ظباط قالولى الوضع اتغير دلوقتى و التاجيل بقى مستحيل بياخدو كل الناس و خصوصا الى زى كده انا متوقع لان اى تاجيل ليا هيبقى نهائى اصلا

انا مش فارق معايا البهدله و الله يا كبير انا بس بس صعبان عليا شغلى و مستقبلى بعد معملت و عملت و عملت الاقى نفسى هوا مفيش اى حاجه و اتبهدل زى مكل الشباب مهو متبهدل بعد اما صدقت بنيت لنفسى بنفسى شغل كويس جدا و مستقبل

اما موضوع الهروب ففى كذا محامى عسكرى و ظابط قالولى مبيتحسبش هروب غير بعد انا تسمع سلاحك و تعمل كارنيه كل الى قبل كده عادى بعد ال 30 بيخلص بغرامه و الكلام ده اكيد جدا و بتلعب فى دماغى اكمل لحد الارجا يمكن تيجى من عندهم و خلاص و لو خدونى امشى بس برضه مش عارف

لسه مستنى بقيت الاخوه يفيدونى بارائهم يارب وفقنى للى فيه الخير يارب

**hilal** · 08-08-2014 09:28 PM

في رأيي الخاص
انت لا يوجد امامك سوى حل وحيد للحفاظ على مستقبلك وخطوبتك
دخولك الجيش هيدمر كل حاجة
انسى موضوع الجيش ، وادفع الغرامة ، وكل شيء سيكون على ما يرام
وعموما ممكن تصلي صلاة الاستخارة ، وتترك الامر بيد الله
لانه يوجد دعاء بعد صلاة الاستخارة ، يطلب الانسان من الله تعالى أن يختار له الاصلح لأنه غير قادر
وربنا يوفقك

**mr_vampire** · 09-08-2014 01:19 AM

هو في غرامة بتدفع لو حد تخلف او تهرب من التجنيد ؟؟؟؟ بتتقدر ازاي وبتوصل لكام ده بقي ؟؟؟؟؟

**Karim Alaa** · 09-08-2014 01:46 AM

المشاركة الأصلية كتبت بواسطة mr_vampire

هو في غرامة بتدفع لو حد تخلف او تهرب من التجنيد ؟؟؟؟ بتتقدر ازاي وبتوصل لكام ده بقي ؟؟؟؟؟

لو وصل سنك 30 سنه و مكنتش روحت تجنيد بتروح تقدم طلب تسويه موقفك التجنيدى و بتدفع غرامه حدها الاقصى 5000 جنيه وف السنتين الى فاتو محدش دفع اكتر من 2500 و بتاخد صوره الحكم و بتروح اداره التجنيد تاخد اعفاء نهائى تسافر بيه من غير اذن سفر او تشتغل بيه بتتقدر حسب مالقاضى بيشوف سبب التخلف و موقفك المادى يعنى خاضعه لتقدير القاضى نفسه بس حدها الاقصى 5000 حجنيه

و مبتقضيش ولا ربع ساعه حبس ولا اى حاجه كلها من برا مجرد اجرائات