عاوز اروح شارع فوزى الرماح اللى فى المهندسين

**michohat** · 20-10-2008 04:10 PM

حد يعرف فين شارع فوزى الرماح اللى فى المهندسين اللى اعرفه عنه انه متفرع من شارع السودان
وايه انسب طريق اروح له لو انا جاى من عند السندباد رايح للكليه الحربية

**aliabutaleb** · 20-10-2008 04:33 PM

بما إني كنت شغال هناك فعارفه كويس
الشارع ده قدام مزلقان أرض اللواء بالظبط من شارع السودان
ومن ناحية تانية هو متفرع من شارع شهاب من قدام راديو شاك تقريباً

أما عن الطريق له من عند الكلية الحربية فأكيد الاخوة مش هايقصروا لأني مليش في الطرق في القاهرة

**M_55** · 20-10-2008 04:34 PM

Use this site

www.cairolocator.com

write the name of the st. on the left side , it will
appear immediatly

Good luck

**دموع الثلج** · 20-10-2008 05:51 PM

هتاخذ كوبرى اكتوبر من صلاح سالم وتكمل فى الكوبرى لحد نزله المهندسين تنزل هتدخلك على شارع البطل احمد عبد العزيز هتكمل لاخره ههتلاقى هارديز على يمينك الاتجاه يمين اجبارى شارع جامعه الدول العربيه هتاخذ اول يوتيرن شمال وتكمل على طول لا خر شارع جامعه الدول تدخل يمين وعلى طول هيقابلك زحمه وميكروباصات ومزلقان قطار على شمالك ده مزلقان ارض اللواء هتدخل الشارع اللى مقابله على طول وبس

او من كوبرى اكتوبر هتدخل يمين مدخل المهندسين والزمالك اللى بعد ميدان رمسيس

وعلى طول هتلاقى نفسك على كوبرى 15 مايو كمل على طول لحد ما تنزل على طول على ميدان لبنان هيقابلك المحور متطلعش سيب المطلع وامشى تحت 50 متر وتلاقى تقاطع شارع السودان قدامك هتعدى وتدخل شمال هيقابلك المزلقان على يمينك وشمالك شارع فوزى رماح هتلف وترجع له

او تدخل من جامعه الدول الى شارع شهاب تكمل بعد بلاتنيوم مول تسال هناك اى حد هيشاور لك على دخله الشارع اللى عاوزه

**michohat** · 21-10-2008 12:07 AM

متشكر على سرعه التفاعل دى بس معلش عندى استفسار لانى اخر اللى اعرفه فى القاهرة مدينه نصر فاول مره اطلع براها وكمان بالعربية واللى اعرفه عن كوبرى 6 اكتوبر ان اللى ماشى عليه لازم يكون حافظ المخارج لان مفيش يفط قبل المخارج فالمفروض المخرج بتاع المهندسين رقمه كام؟
وكمان انهى انسب الطرق من اللى سبق وذكرها - دموع الثلج - خصوصا وان المشوار ده هيبقى يوم جمعه والصبح قبل الصلاة والمشوار من الكليه الحربية لحد شارع فوزى الرماح ياخد وقت قد ايه؟
تصدقوا معايا فى العربية خريطه للقاهرة ومش لاقى فيها الشارع ده

ولو فيها غلاسة هوا طريق العوده هوا نفسه طريق الذهاب؟

**دموع الثلج** · 21-10-2008 02:23 AM

الطريق ياخذ معاك فى التوقيت ده نص ساعه ان شاء الله

مخرج المهندسين الاول اللى متوصل بكوبرى 15 مايو ومنه لميدان لبنان

بعد ما تعدى ميدان رمسيس اكيد عارف محطه القطار اللى فى رمسيس هتلاقيها على يمين الكوبرى هتاخذ الحاره اليمين هتقابلك اول داخله يمين سبها كمل وادخل الثانيه اللى بعدها مكتوب لوحه المتجه الى المهندسين الزمالك

لو معرفتش كمل قبل اخر الكوبرى هتلاقى نزله يمين اللى بتودى شارع البطل ومنه على جامعه الدول وتكمل الوصف

وطريق العوده نفسه تاخذ كوبرى اكتوبر برضو
هحاول اعملك خريطه بالطريق

**heshaaam** · 29-10-2008 05:30 AM

هو لازم العربية خد المكيف من الحى السابع او خد اى حاجة رايحة م لبنان

انزل الموقف وامشى خطوتين هتلاقى نفسك ف الشارع

**heshaaam** · 29-10-2008 05:33 AM

ولو ليك ف الدائرى خده لغاية المحور وانزل منزل السودان واسال هتلاقيه قدامك

**michohat** · 30-10-2008 06:44 PM

بعد ما كنت ناوى اروح من ناحيه الكليه الحربية حصلت ظروف و سافرت طريق الاسكندرية القاهرة الزراعى و دخلت المحور ونزلت نزلة محور 26 يوليو معرفش بصيت لقيت نفسى داخل على الطريق الزراعى مره تانيه
المهم بعد لف وتواهان وسؤال سواقين التاكسيات الحمد لله وصلت ميدان لبنان وبعد كده توهت برضه وفين وفين لحد ما وصلت للشارع اللى عاوزة فعلا الغريب فى بيتوه وحتى لو كانت معاه خريطه زيي كده