عايز اشترى بطارية جديدة .. اشترى ايه و منين ؟؟؟

**bobosico** · 09-08-2014 12:38 PM

السلام عليكم

انا البطارية عندى خلاص كل شوية اجى ادور مش بتدور
3 مرات فى اسبوع و اخر مرة
بعد لما اديتها وصلة و دورتها
قلت الف بالعربية نص ساعة كدة عشان الدينمو يشحن
و اول ما بطلت و جيت ادور لقيتها مادرتش
هل ده عيب من الدينمو ؟؟؟؟؟
لون العدسة اخضر بس الكهربائى و الراجل اللى قاس البطارية قالولى عايزة تتغير
المهم كنت عايز اعرف اجيب
الفارتا سيلفر الالمانى ولا الاسى ديلكو مين احسن ؟؟؟؟؟
و اجيبهم منين بضمان محترم و انضف و اضمن حاجة مش مهم السعر

شكرا

**Land_Cruiser** · 09-08-2014 01:15 PM

الفارتا ممتازه و الايه سي ديلكو كويسه قوي و في البانر انتاج النمسا دي الناس بتشكر فيها قوي برضه. لو الفلوس مش هي عامل الاختيار ارشح الفارتا او البانر اما لو الفلوس هي عامل الاختيار تبقي ال AC Delco و الجوده جيده في الثلاثه بصفه عامه بس في حاجه كويسه و حاجه احسن و كله بثمنه

**ali ashraf** · 09-08-2014 04:20 PM

كل البطاريات اللى لا تحتاج صيانة كويسه انا بجيب اى سى ديلكو من 8 سنوات بدون مشاكل و اعمل حسابى لازم اغيرها كل سنتين تقريبا و سعرها 410 جنية و باسلمه القديمة و الحقيقة مشفتش منها اى مشكل المهم تحسب سنتين من وقت شرائها و يبقى ده ميعاد تغيرها بشرط طبعا سلامة الدينامو و عدم تسريب كهرباء الخ و بالطبع لا تحتاج اى صيانة و بالتوفيق

**MMamdouh** · 10-08-2014 12:31 PM

ألAC Delco و الفارتا ممتازين بس ضمان الAC Delco افضل من الفارتا عشان مفيش فيه تحميل اهلاك لو غيرت البطارية فى الضمان

احسن اسعار عند سمير بيومى (شركة الايمان) فى الدقى - شارع التحرير امام برج ساريدار الطبى (جنب جاد)

MMamdouh