الموضوع: سيتروين ds5 .... التقرير المتكامل

السلام عليكم ورحمة الله وبركاته
أنا أسف على التأخير فى الرد .. بس بصراحة أخدت الأولاد يومين مصيف فى مدينة (شرم الجمصة ) الساحرة
ولمن يتسائل ما هى مدينة ( شرم الجمصة ) الساحرة .. هي مدينة ساحلية على البحر الأحمر كانت تلقب فى الماضى بمدينة ( شرم الشيخ ) .. ولكن بعد إزدحامها وإمتلائها عن آخرها بأهل مصرنا الحبيبة .. أصيب ( الشيخ ) بإنفجار فى المرارة وتوفى إلى رحمة الله تعالى .. لذا تم تغيير إسمها إلى ( شرم الجمصة )
واللى هيقوللى يعنى همه المصريين ملهومش نفس .. هقولو إن المصريين على راسى من فوق .. بس مشكلتهم إنهم فهموا إعلانات كوتونيل غلط .. وإفتكروا إن هانى رمزى لما يعمل إعلان عن كوتونيل يبقى كده كوتونيل إنتقلت من مرحلة الغيارات الداخلية لمرحلة مايوهات البحر

المشاركة الأصلية كتبت بواسطة scientist9508

بسم الله الرحمن الرحيم

أخونا الكريم جدآ

كم يسرنى الحديث معك حتى و إن كان شىء فى شىء محزن.

أولآ و قبل كل شىء كلامك صحيح و أنا أعترف بهذا . . ولكننى لى وجهة نظرى أعرضها لك إن أحببت.

فى أول إسبوع إشتريت فيه السياره كنت أتشاجر كل يوم تقريبآ و فى كل شارع أدخله تقريبآ. و كانت نتائج هذا كالآتى:

أود أن أذكر حضرتك على إستحياء بأن السلوك نوعان . . فطرى . . و مكتسب

النوع الثانى يشكل النسبه الأكبر من سلوكيات الإنسان و لذلك يجب ترقيته بشكل دائم و مستديم و إن عجز الإنسان عن ذلك فأقل مايجب فعله هو حمايته من الإنحدار لأسفل و ذلك هو الضعف بعينه

1 - خشيت على نفسى من إكتساب سلوكيات و مهارات الجدال بالباطل (ليس لأننى الطرف المعتدى بل لأن من أمامى يلجأ إلى ذلك من أول ثانيه و أن تصدح بالحق الصراح مع هؤلاء ليس له معنى أو قيمه لأنهم يقلبون الحق باطل و الباطل حقآ . . إذآ فليس أمامك سوى تعلم نفس السلاح و التدرب عليه)

2 - أذكر نفسى و إياك بأن الله يبغض الفاحش البذىء . . وأذكر نفسى و إياك بأن حال العبد هو حال لسانه. فإن أردت أن تعرف حال عبد فإستمع إلى ما ينطقه لسانه (إن كان اللسان نظيف فكذلك حاله و إن كان غير ذلك فكذلك حاله) و إن الإنسان يقضى سنوات من تدريب لسانه على هجر الفاحش من الألفاظ تحت المعتاد من الظروف و الإستثنائى منها . . فبالله عليك كيف أسقط هذا كله و كأنى لم أعرفه ثم أكيل السباب كيلآ.

3 - و بم يفيد السباب؟ . . أتراه يقنع من صدم سيارتك بدفع تكاليف تصليحها . . و ما نفع علو الصوت مع من علم فى قرارة نفسه أنه المخطىء ثم صرخ بأعلى صوته بعكس ما يعلم أنه حقيقه؟

4 - ترى إن كان لى حق عند شخص ما ثم إنهلت عليه بالسباب و الشتائم كالسيل الجارف . . فأى حق يكون لى بعد ذلك. و كيف أكيل له من حسناتى الكيل الوفير و أنا متأذى منه

5 - من وجهة نظرى الشخصيه , إن لم يصنع التعليم و المطالعه و القراءة الكثيفه فارق بينك و بين الهمج . . فأنت لم تتعلم شيئآ

6 - أنا أرى أن الشتائم و الصوت العالى لا ينصب ميزان العدل فى بلدنا مصر . . بل هو إنفعال نفسى يائس من إسترداد الحقوق (حتى ولو كانت أدبيه)

أخى الحبيب

أعلم جيدآ و أعالن أنك أنت الشخص المتكيف مع هذا المجتمع و ليس أنا. و بحكم القراءة و العلم و المطالعه كنت أعلم أننى بسفرى خارج جمهورية مصر العربيه ستقل قدرتى على التكيف و هى أصلآ قليلة من قبل السفر و قد وجدت ما توقعته

أؤكد لك أيها الحبيب أن هذه مشكلة خاصة بأبناء قومنا. فلقد رأيت فى بلد آخر إنضباط الناس كالساعه فى إحترام القانون (وفيهم الأغبياء أيضآ و لكن عقوبة مخالفة النظام و القانون لا مفر منها و مؤلمه) و أؤكد لك أن أكثر أبناء جلدتنا يسيؤن الأدب إذا أمنوا العقوبه.

و كم أتمنى أن أرى قومنا فى سلوك حضرتك الحضارى فى إحترام القانون حتى فى غياب الرقيب.

أسأل الله أن يصلح الحال و أن يجنبك شرور القاصى و الدانى ممن إحتضنتهم شوارعنا و يسيؤن التصرف مهما كانت دوافعهم.

السلام عليكم و رحمة الله و بركاته

أخونا المحترم جدااااااااااااااااااااااا ااااااااااااااااااااااااا اً
أنا ولله الحمد مشهود لى بالخلق الحميد .. بس أعمل أيه
غصب عنى وعنك .. أحوال الشارع والناس وبعدهم عن الدين يخللى الواحد يفقد أعصابه .. وللأسف فى مجتمعنا ده لو مخدتش حقك بصوتك ودراعك سوف تستضعف
والهيئة اللى إنت بتدفعلها فلوس من جيبك من ضرايب وخلافه علشان تاخدلك حقك مش فاضية
يبقى مفيش أمامك غير إنك تاخد حقك بنفسك ..
طب أنا هقولك حاجة
أنا كنت راجع مرة بالعربية وخبطت عربية كانت جاية فى تقاطع .. أنا نزلت من العربية وبمنتهى الهدوء .. قلتله من غير ماتتكلم أنا الغلطان .. وشوف عربيتك هاتتكلف كام وأنا هصلحهالك
الراجل بص فى عربيته ملقاش فيها حاجة غير شوية خرابيش صغيرة .. المهم فى الآخر ومع إصرار منى إنى أدفعله أى تعويض هيقوللى عليه ومع إصرار منه إن العربية بتاعته مفيهاش حاجة ومش هياخد تعويض .. ضحكنا فى وش بعض ومشينا
لما شارع بيبقى فردة واحدة وتيجى عربية فى وشى طول ما فى إمكانية إنى أرجع بضهرى أنا اللى برجع
اللى أقصده .. طول إن مفيش خطأ أو مشكلة من الطرفين أنا اللى بتنازل
بس لما تبقى إشارتى أنا اللى خضراء .. وأنا اللى ماشى صح .. والطرف التانى خطأه واضح .. لا تنازل ومبسبش حقى
بس
وربنا يباركلك فى عربيتك وفى ولادك وفى نفسك ... بس نصيحة منى .. غير من نفسك شوية .. مش علشان إنت فيك حاجة غلط .. لأ .. غير من نفسك علشان إنت فيك حاجات كتير صح متنفعش

المشاركة الأصلية كتبت بواسطة dodge2013

الصراحه وياريت متزعلش مني متسواش التمن ده 270 ولا 300 الففي سيتروين في الاخر ؟؟؟؟؟؟؟؟؟؟؟؟؟؟؟

كنت جبتلك مرسيدس ولا بي ام يوزد حتى افضل 100 مره من سوسو ديه

فرق شاسع ما بين الراحه وعدم الاحساس باي حفر مطبات عفشه ناعمه و الخامات هنا وهناك مابين الاستحمال هنا وهناك ما بين سعر اعادة البيع هنا وهناك

مابين الفخامه هنا وهناك وياريت متزعلش من كلامي ولو اختلاف الاذواق لبارت السلع فعلا

والف مبروك

تعالالاى إنت بقى أرد عليك
أولاً .. إنت فكرك لما تقوللى العربية دى متسواش مش هزعل ؟؟؟ طبعاً مش هزعل
يعنى هيه كانت من بقية قرايبى ؟؟..
بس إنت عايز الحق .. إنت كلامك صح مليون الميه
فى الريفيوهات العالمية بيقولو فعلاً إن العربية دى فيها زيادة سعرية حوالى 5000 دولار
بس تعالى معايا ونتكلم على مصرنا الحبيبة
أيه رأيك فى الكيا السيراتو أم 194000 جنيه
أيه رأيك فى الإلنترا
دول كده مش غاليين ؟؟
العربية ياسيدى الفاضل بالنسبة لمستوى الأسعار المصرية مش غالية .. لما تبقى الكيا السيرتو واللى مفيهاش أى نوع من أنواع وسائل الأمان غير اتنين أيرباج و abs وتبقى بـ 194000 .. يبقى مش عايز دى تبقى بـ 300000
ثانياً .. أنا بحب لما أركب موديل بركب أعلى فئة فى الموديل ده
البى إم أعلى فئة فى ال316 كانت بـ 342000 .. يعنى فرق 47000 عن السيتروين اللى جبتها
المرسيدس الـ cla180 بغض النظر عن الفرق اللى كان حوالى 30000 الإستلام كان بعد سنة ونص من الحجز
الفولفو كان الفرق فوق الـ 50000
وقلت قبل كده فرق الفلوس والراحة النفسية لصالح السيتروين بالإضافة إنها أعلى فئة
مش فاضل غير الأوبل إنسجنيا واللى كانت بـ 290000 .. وهنا كان الإحتيار الكبير بين العربيتين .. وتم حسمه نتيجة الراحة النفسية فقط لصالح السيتروين
نيجى لنقطة موضوع العفشة .. مش معنى إنى بقول إنها ناشفة .. ده معناه إنها ناشفة بجد
أنا بقارنها بفئات عالية زى المرسيدس والبى إم .. ومع إن فى ناس إشتكت من عفشة المرسيدس كذلك
ومن ناحية الفخامة .. لا خلاف إن السيتروين الـ ds عربيات فخمة جداً وتقفيلها فخم ( مش محترم وبس ) .. العربية من أولها لآخرها تقريباً مفيهاش حتة بلاستيك ( كلها جلد ومعدن وخامات غير البلاستيك )
أنا والله نفسى تركبها وتجربها وإنت تعرف أد أيه هيه عربية ممتازة
بس أنا كان لازم أبقى متحامل عليها فى التقرير بتاعى علشان كان نفسى تقترب من درجة الكمال
وكان لازم ابقى صريح لأقصى درجة
وأى حد معاه نفس المبلغ المالى اللى كان معايا .. وطلب منى النصيحة .. هنصحه بالسيتروين
ولو فى إمكانية إنه يزود المبلغ بدون تفكير هنصحه بالـبى إم أو المرسيدس أو الفولفو

نيجى بقى للموضوع الكبير ده ومع الأسف مش هقدر أرد عليك بالتفصيل أوى لأن العربية فى القاهرة وأنا فى شغلى فى شرم .. اللى هفتكره واللى هعرف أرد عليك فيه هرد .. واللى مش هفتكره سامحنى هرد عليك فيه لما أرجع وتبقى العربية أمام عينى

المشاركة الأصلية كتبت بواسطة densfog

السلام عليكم

اولا : موضوع فوق الرائع ,
الله يباركلك
وواضح المجهود الكبير المبذول فيه ,
والله قعدت أكتب فيه حوالى أسبوع .. والإعداد ليه قعد شهر كامل
جزاك الله عنه كل خير , وبارك لك فى سيارتك وأدام فرحتك بها , وعجبنى جدا الأسلوب المحايد فى عرض المميزات و العيوب ... و معجب بحضرتك جدا على القرار المرعب اللى انت أخدته بشراء العربيه الرائعه دى بس فى البلد دى ... و يارب ما تندم أبدا على هذا القرار ..
معرفش ليه بدأت أخاف لما أخويا راح يعمل صيانة العشرين ألف عند عز العرب لعربيته الفولفو s80 وكلفته 5100 جنيه ( 2600 صيانة + 2500 تيل فرامل )
.. بصراحه كان نفسى حضرتك تزود نقطه كمان تشرح فيها امكانيات الشاشه الوسطى بتفصيل أكتر ..
حااااااااااضر .. لما أرجع هشرحلك الموضوع بالتفصيل .. بس هوه عامةً الشاشة الوسطى حالياً كل إمكانيتها معايا هو بيان تفاصيل التليفون المحمول والميديا فقط لا غيرررر .. مبيظهرش عليها أى حاجة تانية
ثم يتم تنسيق كل النقاط ورا بعضها بدون تعليقات بينها .. ثم التثبيت
موضوع التنسيق حصل إنى كنت بنسق جزأ جزأ وأنزله وأكتب فى آخره يتبع .. بس نسيت أكتبها فى آخر 3 نقط .. فبعض الأعضاء إفتكروا إن الموضوع خلص .. هوبا لقيتهم نطو فى النص
وموضوع التثبيت ده مش بتاعى .. انا بعت لإدارة المنتدى بطلب منهم بس تنسيق الموضوع ويخلوه ورا بعضه .. بس تقريباً همه كانوا قافلين .. لا حياة لمن تنادى وتقريباً ميعرفوش أصلاً إن فيه موضوع جديد إتعمل عن العربية

ثانيا : كان ليا حبه ملاحظات من باب الدردشه:

* بالنسبه لموضوع أستهلاك البنزين بيتهيألى ممكن يتحسن بعد اول 10 الاف كم .. وعامه هو تقريبا زى استهلاك الأنسيجنيا ... اما باقى سيارات الفئه دى فمعنديش معلومات عنها
أدينى مستنى من بقك لباب السما .. وأنا كده كده هروح التوكيل على صيانة ال 10 آلاف وهقولهم على موضوع البنزين وكمان علشان مخرج الولاعة باظ .. فصل كهرباء خالص

* شويه كماليات كان نفسى تبقى موجوده فى العربيه دى ... زى اوتو باركينج زى اللى موجود فى الكورولا اللى أقل منها
أعتقد موضوع الأوتو باركينج لو كان موجود فى العربية دى كان خللى سعرها نط لفوق أوى .. إذا كان مش موجود فى البى إم ولا المرسيدس ..أو كان هايجى على حساب كماليات تانية هتتشال من العربية.. وده برده اللى خللى التيوتا سعرها يبقى عالى
.. و سقف بانوراما بيتفتح زى الأوكتافيا الهاى لاين .. نظام الـ eco اللى على كلام حضرتك انه مش موجود فيها ... شاشه جرافيك بالكامل زى اللى موجوده فى الدودج دارت و الفولفو الجديده واللى بيختلف تصميمها بالكامل على حسب نمط القياده ... والشاشه الوسطى تكون تاتش ... نظام مراقبه ضغط الأطارات ... وطبعا ده من باب البحث عن السياره الكامله اللى مش هتلاقيها فى الواقع

* بالنسبه لموضوع الكاميرات الجانبيه أنا شوفت موقع لشركه بيبيع منتجات من النوع ده عن طريق تغيير المرايه الوسطى بأخرى مقسمه الى 3 شاشات .. شاشتين للكاميرتين و الثالثه للكاميرا الخلفيه ... وكمان فيه جهاز قياس ضغط الأطار بشاشه منفصله موصله وايرلس بأربع حساسات متركبه على بلوف الكاوتش
مش عارف ليه مبحبش أعدل فى العربية ولا أركبلها حاجة مش موجودة فيها .. بالكتير أوى شوية إكسسوارات صغيرة .. أكتر من كده مبحبش

* انا اتفجئت بموضوع العفشه دى لأن من اراء الساده الأعضاء فى سيتروين ان العفشه فى سيتروين عامه كويسه جدا و ملائمه لمصر ...
العفشة ياجماعة مش ناشفة للدرجة اللى إنتو متخيلينها .. بس برده مش ناعمة زى ماكنت متوقع
ومتنسوش إن جنطها 18 ووزن العربية كبير
بس أنا كنت بصراحة مستنيها تبقى ناعمة زى الفولفو أو أفضل كمان .. وده اللى خلانى أقول عليها مخيبة للآمال

ثالثا : كان ليا شويه أستفسارات أتمنى أنى مكونش هتأقل عليك بيها :

* ياريت لو حضرتك تفيدنى فى أسعار قطع غيارها .. أو الصيانات الدوريه
لسه والله معملتلهاش غير أول صيانة على 2500 .. وكل اللى تم تربيط العفشة .. ومتكلفتش ولا مليم

* هو موضوع الزينون اللى فى الواطى بس ده موجود فى كل السيارات ولا فى السيتروين خاصه .. لأنى كنت سألت مسئول المبيعات وقالى أنها فى العالى و الواطى ... ولو ممكن تقارنهالنا بالفولفو
اللى أعرفة إنها فى الواطى بس .. وبص مش هكدب عليك .. النور العالى مش هالوجين ومش زينون .. مش عارف بصراحة .. طب بص لما أرجع هصورلكم النور تانى لأنى فى حاجات كتير أوى فى العربية لسه مكتشفتهاش .. العربية معايا بقالها أكتر من 3 شهور بس لظروف شغلى مش عارف أقعد وأفصص فيها أوى .. يعنى لحد دلوقتى أنا معرفش رشاشات الفوانيس بتشتغل إزاى
ودورت على النت وعرفت إنها بتشتغل أتوماتيك لما بتبقى الفوانيس مش نضيفة أو على سرعة أعلى من 40 كم تقريباً ولازم الفوانيس تبقى مضيئة .. ومش عارف أجرب الموضوع ده لحد دلوقتى

* هل الشاشه ممكن تعرض فيديوهات و ممكن تشغل ميديا من الموبايل عن طريق البلوتوث ؟؟ .. ومفيش أى أخبار جديده عن نظام الملاحه ... وبالمناسبه المشكله دى على حسب علمى موجوده فى كل العربيات مش عربيتك بس
الشاشة مبتعرضش أى حاجة غير زى ماقلتلك معلومات الميديا والتليفون ودرجة الحرارة والبوصلة والساعة والكاميرا الخلفية طبعاً
وبرده مفيش أى أخبار عن موضوع الملاحة وأعتقد إنه مش هتبقى فيه أخبار عنه

* لو هتقارنها بالفولفو فى السحب .. فرق كبير ولا مش للدرجه ؟؟
بصراحة .. فرق كبير
إنت بتتكلم فى 20 حصان فرق .. الفولفو سحبها ملوش حل .. وبالأخص على السرعات العالية

* السقف البانوراما فارق ولا حاسس انه مالوش لازمه؟
بصراحة برده .. من جوه العربية ملوش أى لازمه
من بره العربية شكله حلو ماعدا فى لون العربية الأسود زى بتاعتى ( مش باين أصلاً ) .. يعنى مع اللون الأبيض عامل شكل جبار

* ياريت تشرحلنا و ان أمكن صوره للأضاءات الداخليه فى الصالون ... لأن الds4 ... أسمع ان فيها أمكانيه تغير لون أضاءات العدادات
معرفش حاجة عن الـ ds4 .. بالنسبة للـ ds5 مفيش إمكانية تغيير أى ألوان غير ألوان الشاشة الوسطى فقط

* لو رجع بيك الزمان .. وبالسعر الجديد .. وبعد ما جربت السيتروين لفتره... هتشترى السيتروين ولا الفولفو ولا حاجه غيرهم
بالسعر الجديد ؟؟ اللى هوه 319000
بصراحة لأ .... لو بنفس السعر ماشى ( أنا جايبها بـ 295000 )...
بس المشكلة برده إن الفولفو سعرها زاد أوووووووووووووووى بطريقة فوق المبالغ فيها
بس حاليا ً ومع السعر الجديد ومع تقلص الفرق بينها وبين البى إم ( 348000 ) كنت هجيب البى إم طبعاً .. أو حتى هجيب الإنسجنيا ( 295000 )
ناس كتير اوى وأنا معاهم إشتكوا من موضوع الزيادة المبااااااالغ فيها فى السيتروين وكمان بالأخص فى الفولفو
بس على فكرة فى معلومة مش متأكد منها إن التوكيل تراجع عن السعر الجديد ورجعها لـ 30000 جنيه تانى وده على لسان مندوب مبيعات فى شركة b-auto اللى لما سألته عن سعرها قاللى 300000 والكلام ده كان من أقل من أسبوعين والله أعلم
وشكرا مقدما .. وأسف على الأطاله

أسأل زى مانت عايز وأنا معاك للصبح