الموضوع: سيتروين ds5 .... التقرير المتكامل

المشاركة الأصلية كتبت بواسطة kingrab

الأخ الفاضل scientist9508
متفتكرش إن كلامك ده مكنش موقع تفكير فى دماغى قبل ماشترى العربية بس أنا هحكيلك القصة
أنا عملى فى شرم الشيخ
وبسافر كتير على الطريق .. فكنت محتاج عربية قوية ومريحة على السفر وفيها وسائل أمان وخاصة بعد الحادثة الشديدة اللى عملتها بعربيتى السابقة الكيا السيراتو وربنا نجانى منها على خير
وقعدت سنتين بدون سيارة علشان أدور على عربية محترمة وعلشان أجمع المقدم اللى دفعته فى العربية دى ( حوالى 170000 ) وأخدتها قسط على سنتين
وبعد ماجبتها إستحرمت أسافر بيها لسببين ..
أولاً : طريق شرم بقى مش مضمون مع الإنفلات الأمنى الحاصل
ثانياً : إستحرمت أبهدل العربية رايح جاى على طريق طويل زى ده علشان أنا ممكن أسافر مرتين فى الشهر الواحد
فخليت العربية لمشاوير القاهرة المهمة فقط أو للسفر للأماكن الساحلية
وكمان أن اربنا كارمنى بعربية تانية صغيرة لسه بايعها من كام أسبوع وبدور على عربية غيرها لمشاوير البهدلة .. وربنا يستر علشان أنا لما بعت العربية التانية المدام عندى شغالة على العربية دى أثناء سفرى ..بس أنا مربيلها الرعب .. يعنى لو رايحة مشوار فى وسط البلد ولا فى أى حتة زحمة بقولها يا إما ماتروحيش يا إما تركبى تكتك
وبغطى العربية وبحافظ عليها بقدر الإمكان ومبحطش فيها حاجة غالية تبان من الإزاز بعد ما بردو إتسرقت مرتين
بس كل ده مش هيمنع قضاء الله ... يعنى لو إفترضنا إنك راكن عربيتك فى شارع فاضى ورجعت لقيت واحد كاتبلك عليها بمسمار ؟؟؟ هتعمل أيه ؟؟
ثم أى عربية جديدة غالية كانت أو رخيصة قلبك هيتحرق عليها لما تاخد أول خبطة .. بعد كده خلاص .. يبقى أنا هفضل خايف وممتعش نفسى ؟؟؟
ثم أهم حاجة أنصحك بيها وأنصح الناس كلها واللى ناس كتير بتنطشها .... التأمييييييييييييين .. حتى لو العربية مش تقسيط
أنا ربنا أراد إنى أعمل الحادثة بتاعة الكيا بعد إنتهاء فترة التأمين وعدم التجديد بشهر واحد فقط
ومع ذلك مزعلتش لأن بعتبر إن دى إرادة ربنا وبشكره صبح وليل إن طلعت منها سليم لأنها كانت حادثة موت وكنت عامل بيها موضوع فى المنتدى
أنا آسف إنى طولت عليك .. بس تعليقك لفت نظرى أوى وبصراحة
ثم إنت عايز يحصلى حاجة إزاى بعد الدعوتين اللى إنت دعتهم فى الآخر دول ؟؟؟
الله يباركلك على كلامك الحلو ده ...
بس بردو مش عارف ليه حاسس إنك إتعرضت لموقف رخم فى شوارع بلدنا المحروسة من كلامك ده .. صح ولا إحساساى غلط ؟؟

بسم الله الرحمن الرحيم

أخونا الكريم جدآ

أشعر بالخجل منك بسبب تأخرى فى الرد و لكننى كنت فى إنشغال شديد فى الأيام الفائته و أثق أننى سأجد فى سماحة نفسك تفهمآ لهذا.

و أما عن سؤالك . . فإليك الآتى:

أنا على وشك إعتزال القياده بسبب ما أراه كل يوم من إنهيار السلوك الحضارى . . و تدنى الأخلاقيات إلى الحضيض . . و إنعكاس القيم و المفاهيم. بل إننى تقريبآ أصبحت لا أستخدم سيارتى إلا فى السفر و أحيانآ الضرورات القصوى فقط داخل القاهره على الرغم من صغر حجم سيارتى (ماروتى) و سهولة قيادتها

لن أطيل عليك الحديث حتى لا تمل و لكننى أعنى كل كلمة كتبتها بدقه . . هناك شريحة من أبناء جلدتنا إنعكست القيم لديهم . . فإنقلب الحق باطل . . و إنقلب الباطل حقآ . . بل و الأدهى و الأمر أنهم يتباهون بذلك. فتجد من يتباهى و يتفاخر بأنه فلت من الحساب و نجا من العقاب و نجح فى إستغباء الطرف الآخر حين برع فى قلب الباطل حقآ و الحق باطلآ . . . و الحقيقة أن الحق الذى أضاعه ينتظره يوم يقوم الأشهاد و لكنه نسى ذلك أو ربما لا يدرى بالكليه.
و مما زاد الطين بلة أننى حظيت بالقيادة خارج جمهورية مصر العربيه و رأيت بعينى القانون يطبق و كل ذى حق يأخذ حقه كاملآ غير منقوص و هذا جعلنى أرى الوضع فى بلدنا مصر بحجم أكبر مما كنت أراه قبل القيادة خارجها

أعتصم بقلة الكلام فى هذا الشأن عوضآ عن الإسترسال فيما يحزن.

أذهب الله همك و بدد حزنك و أسكن الفرحة قلبك

السلام عليكم و رحمة الله و بركاته

المشاركة الأصلية كتبت بواسطة hany63

كلام مظبوط جدا و رأي يحترم من انسان محترم
بس تعال نفكر من زاويه اخرى غير زاوية النزاهه
مهو العربيه الرخيصه مفيهاش اي وسائل امان من وسائد هوائيه و انظمة فرامل و ثبات ٠٠٠٠٠٠الخ
يعني الغلطه و في الغالب مش هتكون غلطتك بفوره و اقل حادثه اللي في العربيه هيتعرض للاصابه او الوفاه لا قدر الله
طبعا ربنا هوا المنجي و كل واحد هياخد نصيبه و اعرف ناس اتوفت في حوادث و راكبه عربيات فوق النص مليون بس ربنا قال برضه الواحد يحكم عقله و يا ما الواحد اتعرض لمواقف صعبه و ربنا نجاه منها و من بعدها الامكانيات المتوافره
و للعلم اول عربيه اشترتها للمدام كانت سوزوكي ماروتي و كانت فرحانه بيها و مش عايزه تغيرها بس لما انا سوقتها محتيش بأي بأمان و صممت ابيعها و ادتها عربيتي الكورولا اللي بأضعاف تمنها رغم ان الحاله الماديه ايامها مكنتش متيسره عشان خفت عليها و ربنا يحفظ الجميع

كلام حضرتك صحيح جدآ . . و خاصة بالجزء المتعلق بإنعدام وسائل الأمان فى الماروتى (السياره معى منذ 5 سنوات و أعرفها جيدآ)

المشاركة الأصلية كتبت بواسطة kingrab

سيدى الفاضل
من طريقة كلامك لا يوجد أمامك غير حلين ... ياتروح تعيش فى المريخ يا إما تغير من نفسك
أنا أسف فى الكلمة بس زى ما إنت محترم كده وبتحترم الناس لازم تبقى قليل الأدب شوية .. لازم يبقى صوتك عالى شويتين ... لازم تحط شومة فى العربية ... لازم تزنق على اللى بيزنق عليك
كده أو روح عيش فى بلد تانيه غير البلد دى
إنت اللى زى حضرتك بيتقال عليهم محترمين زيادة عن اللزوم
مينفعش .. لازم تبقى محترم عند اللزوم ... وقليل الأدب عند اللزوم بردو ( أعتذر عن اللفظ )
هدى لحضرتك مثال
أنا فى أوقات كتيرة ببقى فى مصر الجديدة على سبيل المثال .. فى أوقات متأخرة
الشوارع بتبقى فاضية تماماً .. ومع ذلك لو إشارة المرور إنقلبت للون الأحمر أنا بقف ..وحتى ولو واقف لوحدى فى الإشارة ... مع أنه لا يوجد كاميرات أو عسكرى مرور .. أنا بحترم نفسى وبحترم القانون .. ولو لقيت حد جاى ورايا وقعد يزمر أو يرعش .. أنا يا إما بطنشة يا إما بنزل من العربية لو لوحدى مش معايا الأسرة وبيبقى صوتى قد كده فى الشارع وشتيمة من اللى قلبك ميحبهاش
.. إشارة المحكمة مثلاً .. أول مابتبقى حمرا مبحاولش أجرى بسرعة علشان أعديها ... بحترم نفسى وبحترم غيرى ... وبقف
لكن أول مابتبقى خضرا بمشى ومليش دعوة بحد ... ولو لقيت حد كابس من الناحية التانية بقف أمامه ولا بيهمنى .. ساعتها اللى راكب معايا بيقولى سيبه يعدى ياعم .. إفرض خبطك .. بقوله خليه يخبطنى وأنا أنزل أخليه هوه وصاج عربيته حته واحدة ( الكلام ده بصراحة مبعملوش فى السيتروين )
لو طابور عربيات على كمين أو ملف ... برجع آخر الطابور وبحترم نفسى .. ولو حد عايز يعمل فيها ناصح ويعدى من على اليمين والله مابعديه .. لدرجة إنى مرة خبطت العربية اللى أمامى من كتر منا لازق فيها علشان معديهوش
الخلاصة .. خليك محترم .. إحترم المرور .. وإحترم نفسك وإحترم غيرك
بس لازم تطالب الناس إنها تحترمك زى ماحترمتهم .. حتى ولو بقلة الأدب
أنا عارف إن حضرتك محترم جداً ومش ضعيف ... بس للأسف اللى حوالينا اللى بيمشوها بلطجة وفهلوة همه اللى ضعاف وجبناء ..
ياريت إنت اللى يبقى صدرك رحب وتتقبل كلامى .. وحط شومة معاك فى العربية

بسم الله الرحمن الرحيم

أخونا الكريم جدآ

كم يسرنى الحديث معك حتى و إن كان شىء فى شىء محزن.

أولآ و قبل كل شىء كلامك صحيح و أنا أعترف بهذا . . ولكننى لى وجهة نظرى أعرضها لك إن أحببت.

فى أول إسبوع إشتريت فيه السياره كنت أتشاجر كل يوم تقريبآ و فى كل شارع أدخله تقريبآ. و كانت نتائج هذا كالآتى:

أود أن أذكر حضرتك على إستحياء بأن السلوك نوعان . . فطرى . . و مكتسب

النوع الثانى يشكل النسبه الأكبر من سلوكيات الإنسان و لذلك يجب ترقيته بشكل دائم و مستديم و إن عجز الإنسان عن ذلك فأقل مايجب فعله هو حمايته من الإنحدار لأسفل و ذلك هو الضعف بعينه

1 - خشيت على نفسى من إكتساب سلوكيات و مهارات الجدال بالباطل (ليس لأننى الطرف المعتدى بل لأن من أمامى يلجأ إلى ذلك من أول ثانيه و أن تصدح بالحق الصراح مع هؤلاء ليس له معنى أو قيمه لأنهم يقلبون الحق باطل و الباطل حقآ . . إذآ فليس أمامك سوى تعلم نفس السلاح و التدرب عليه)

2 - أذكر نفسى و إياك بأن الله يبغض الفاحش البذىء . . وأذكر نفسى و إياك بأن حال العبد هو حال لسانه. فإن أردت أن تعرف حال عبد فإستمع إلى ما ينطقه لسانه (إن كان اللسان نظيف فكذلك حاله و إن كان غير ذلك فكذلك حاله) و إن الإنسان يقضى سنوات من تدريب لسانه على هجر الفاحش من الألفاظ تحت المعتاد من الظروف و الإستثنائى منها . . فبالله عليك كيف أسقط هذا كله و كأنى لم أعرفه ثم أكيل السباب كيلآ.

3 - و بم يفيد السباب؟ . . أتراه يقنع من صدم سيارتك بدفع تكاليف تصليحها . . و ما نفع علو الصوت مع من علم فى قرارة نفسه أنه المخطىء ثم صرخ بأعلى صوته بعكس ما يعلم أنه حقيقه؟

4 - ترى إن كان لى حق عند شخص ما ثم إنهلت عليه بالسباب و الشتائم كالسيل الجارف . . فأى حق يكون لى بعد ذلك. و كيف أكيل له من حسناتى الكيل الوفير و أنا متأذى منه

5 - من وجهة نظرى الشخصيه , إن لم يصنع التعليم و المطالعه و القراءة الكثيفه فارق بينك و بين الهمج . . فأنت لم تتعلم شيئآ

6 - أنا أرى أن الشتائم و الصوت العالى لا ينصب ميزان العدل فى بلدنا مصر . . بل هو إنفعال نفسى يائس من إسترداد الحقوق (حتى ولو كانت أدبيه)

أخى الحبيب

أعلم جيدآ و أعالن أنك أنت الشخص المتكيف مع هذا المجتمع و ليس أنا. و بحكم القراءة و العلم و المطالعه كنت أعلم أننى بسفرى خارج جمهورية مصر العربيه ستقل قدرتى على التكيف و هى أصلآ قليلة من قبل السفر و قد وجدت ما توقعته

أؤكد لك أيها الحبيب أن هذه مشكلة خاصة بأبناء قومنا. فلقد رأيت فى بلد آخر إنضباط الناس كالساعه فى إحترام القانون (وفيهم الأغبياء أيضآ و لكن عقوبة مخالفة النظام و القانون لا مفر منها و مؤلمه) و أؤكد لك أن أكثر أبناء جلدتنا يسيؤن الأدب إذا أمنوا العقوبه.

و كم أتمنى أن أرى قومنا فى سلوك حضرتك الحضارى فى إحترام القانون حتى فى غياب الرقيب.

أسأل الله أن يصلح الحال و أن يجنبك شرور القاصى و الدانى ممن إحتضنتهم شوارعنا و يسيؤن التصرف مهما كانت دوافعهم.

السلام عليكم و رحمة الله و بركاته