الموضوع: اللوجان الاتوماتيك كركرت ثم بطلت

السلام عليكم
عندى سياره لوجان اتوماتيك ماشيه ١١ الف كيلو . النهارده الصبح دورتها فوجدتها بتكرر لاول مره من ساعه ما جبتها . سيبتها حوالى ٣ دقايق تسخن كالعاده و لقيت الكركره هديت شويه . المهم اتوكلت على الله و مشيت بيها و لكن للاسف بعد دقيقه العربيه بطلت و كنت فى نص ملف .
جبت الفتيس على n و سحبتها جنب الرصيف و اتصلت بالكهربائي و جه بعد حوالى ١٠ دقايق و دورت العربيه دارت بالكركره . الكهربائي طلب منى ادوس على البنزين كذا مره بعدها العربيه كركرتها خفت و قالى روح مشوارك و تعالى اشوفهالك . روحت الشغل و كانت ماشيه مش متظبطه اوى و انا رايح. و انا راجع كانت زى الفل و لا كأن فيها حاجه و كمان شغلت التكييف على ٣ و مشتكتش.
انا اتصلت بالتوكيل بس للاسف لقيت اول ميعاد بعد اسبوع و انا خايف اروح للكهربائي يلعب لى فيها و يطلعها من الضمان

المفروض بكره اسافر مع الاولاد و خايف العربيه تعملها فيا .
و لا اوديها التوكيل بكره و اقول لهم على المشكله؟ و لا اطنش عشان العربيه ماشيه كويس دلوقتى

انا طبعا بحط بنزين ٩٢ من يوم ما جبتها و انا فولت من يومين

و جزاكم الله خيرا