هااا ،، فيات 128 مو 79 .. اول عربية ليا ،، رأيكم ايه فى القرار ؟

الســـلام عليكم و رحمة الله وبركاته

احبابنا الكرام ،، أول عربية شخصية ليا
و معروض عليا فيات 128 موديل 79 .. يا ترى هاعرف اتعلم عليها ولا هى اللى هاتعلم عليا

انا بخبط مشوارى للشغل حوالى 25 كيلو رايح & 25 كيلو جاى
و ممكن مشاوير داخلية وسط الزحمة كمان 10 كيلو
دا استعمالى ليها الاساسى اليومى بإذن الله

لو مشاوير تانية هاتبقى حسب الاحتياج ، ممكن مشوار 5 كيلو ... ممكن مشوار 50 : 60 كيلو
بس الحاجات دى كل فين و فين .... ماا علينا

كان فى بالى استنى و اصبر كمان بتاع 6:9 شهور ،، و اجيب حاجة ( لادا ) نيفا أو 2107 علشان اولا التكييف
+ انها هاتبقى عفية و بتاعت مرمطة ( لو حبيت امرمطها براحتى يعنى )

لكن استجد فى الامور امور ،، و فى وسط الامور لقيت واحد صاحبى بيتصل بيا بيقولى
" واحد معرفة عنده فيات 128 مو 79 ... عاوز يبيعها علشان هايسافر ، حالتها كويسة ، لسه مجدد رخصة سنة من اسبوع ، طالب فيها 12 بس ممكن نتكلم معاه على 9.5 أو 10 "

بعد ما حاولت استفسر منه اكتر عن حالتها أو اى بيانات مفصلة عنها قالى ان صاحبها كان بيعمل بيها مشوارين المنصورة كل اسبوع -> لذا الموتور هايكون بحالة تساعد & مغيرلها دسك و اسطوانة قريب جداد & مغير فرد الكاوتش
دا اللى عرفته منه ،، لحد ما نشوفها على الطبيعة

الجميل فى الامر ان أنا جديد لانج على اقتناء سيارة ، دا حتى السواقة الفعلية على الطرق يعتبر معرفهاش

و انا من النوع اللى بحب اعرف كل حاجة عن الحاجة اللى معايا ، علشان لما تحصل فيها مشكلة مابقاش قاعد جنبها لا خبرة لى بها .. و افضل فى عرض الشارع العن قرار شرا العربية لو عطلت منى

فـ هل العربية هاتساعدنى فى مشاويرى ، و مش هاتضايقنى بأعطالها ، و مع الوقت هاتعلم منها اللى عاوز اعرفه عن اساسيات الميكانيكا & احترف السواقة .... الخ

بحيث أنى لو لقيتها مكفية احتياجاتى اخليها معايا كام سنة ، و تبقى البركة بتاعتنا
أو لو الصيف الجاى الحر هايبقى غير محتمل ، هابيعها و اجيب حاجة على قدى يكون فيها تكييف

====================
دى نقطة ،، النطقة التانية بقى : و انا بعاين العربية هايكون معايا صديق قديم فى العربيات هو اللى هايشوفها معايا
ايه الحاجات اللى اقوله يركز عليها ؟ و ايه الحاجات اللى اقلق منها لو لقيتها متغيرة أو مش مظبوطة ؟
و رينج سعرها بيبقى فى حدود كام ؟

بصراحة هو المغري في ال128 سعرها فقط
غير كده أنصحك تزود شوية وتقتني
فيات أونو من 1993 لحد 1997
عملية-حديثة -شكلها أشيك من الــ 128 - اعتمادية - رشيقة (سحب وجري تجميع غير الـ 128 خالص) - موفرة في البنزين بمعنى الكلمة- واسعة من الداخل زي ال128 وأحسن -صالونها أفخم من الـ 128- بتتركن في أي مكان - سهلة ومحبوبة لأي ميكانيكي
قطع غيارها أصلية (ايطالي) في الوكالة وعزبة شلبي وبورسعيد
قطع غيارها جديدة من شارع معروف والتوفيقية وشارع دمشق
اسعار قطع الغيار (الأصلي والجديد) والله أرخص من الـ128 وأرخص من الماروتي ومن الـ 127 وعن تجربة
لما تزهق منها ممكن تبيعها زي ما اشتريتها ( كأنك ركبت ببلاش)
-------------------------
لو مصمم ع الـ 128
ركز على حالة الصاج عموما (والشاسيه) واياك والبارومة
لو تعرف صديق بيفهم فى السيارات هيفيدك (أو سمكري يفحصها)
لو الصاج والشاسيه تمام فأي شغل تاني في العربية (ميكانيكا وعفشة) مقدور عليه باذن الله
وتصليحها وقطع غيارها بقروش وهتتعلم معاها سواقة وكهربا وميكانيكا ان شاء الله

كان فى بالى استنى و اصبر كمان بتاع 6:9 شهور ،، و اجيب حاجة ( لادا ) نيفا أو 2107 علشان اولا التكييف
+ انها هاتبقى عفية و بتاعت مرمطة ( لو حبيت امرمطها براحتى يعنى )


اوعى تركب لادا ولا اي حد من عائلتها (المصونة) في بداية ركوبك للسيارات
هتكره ركوب العربيات
وهتزعل منها وهي تزعل منك
العربية هتكون عفية عليك وانت اللي هتتمرمط مش هي

بص هو تمنها مغرى لو حالتها كويسه وشويه وربنا يوسع عليك وتغير

الشاسيه له حل - الموتورله حل - الفتيس .....

اما البارومة فهى اخطر مشكلة على الاطلاق

فعلا البارومة مشكلة المشاكل في ال128 , لكن عامة هي هتحتاج ايدك فيها على طول وانا عملت زيك اول ما قلت يا عربية ركبت ال128 وعشت معاها حياتي , ولازم حد بيفهم كويس في العربيات يكون معاك ويركز على الصاج والشاسيه

نصيحة اخوية حاول تزود الفلوس او تستنى شوية وتجيب حاجة اعلي انا بيعة 2 قبل كده وكرهوني في السواقة وقعدت فترة من غير عربية بسببهم :hugging:
وطبعا حضرتك بتسأل طيب اما بعت واحده 128 اشترتها تاني ليه اقول لحضرتك كنت فاكره ان موديل السنة ممكن يفرق الاولي كانت 1985 فعليت وجبت التانية 1991 بس طلع كلو 128 :mahf(5):
بالتوفيق

عن تجربة لادا 2107 و فيات 128 اقوللك ال128 احسن و اهدي و انعم بمراااحل

معتقدش انها حالتها كويسه علشان السعر فى الضيااع بس لو حالتها كويسه يبقى كويس جدا بالسعر ده

بس خد بالك لو حالتها متبهدله هاتعلم عليك وهاتبقى علامه سوده فى حياتك بعد الشر طبعا وعمرك ما هاتنسى ايام المرمطه عند حناطه الميكانيكي و حرنكش العفشجى .. وغيره .... الخ .. وبعد ربنا ما يكرمك بحاجه حلوه هاتقول دى كانت ايام سوده الله لا يعيدها ولا يكتبها على حد ابدا :)

جـــــزاكم الله خيرا على المشاركة يا جماعة

اللى وصلنى من كلامكم
- ان الـ 128 شر لابد منه ،، بحكم انى لسه جديد على السواقة و الميزانية حاكمانى
- التركيز على البارومة ثم الشاسية و الصاج و انا بشوف العربية ، و ماتنازلش لو فيه مشاكل فيهم
- اطلع اللادا من دماغى خاالص :) || و لم غيرت بعدها يبقى اونو ( 93:97 ) ، فيها تكييف الموديلات دى :) ؟؟

============
انا مستنى تليفون من صاحبى علشان نقابل صاحبه و نشوف العربية
بس انا ماكلمتوش علشان ما ابينش انى مدلوق على العربية .. لحد ما اشوف ايه الاوضاع معاهم

ايه الحاجات اللى اسأل صاحب العربية عليها و انا بعاين ؟

يعنى مثلا اللى جه فى بالى :
- متوسط استهلاكها بيعمل معاك كام ؟
( لإن النقطة دى مش هاعرف احددها إلا بعد الشرا و الاستعمال ، فيبقى افضل اعرف تقديره حتى و إن كان خاطئ :) )

انا كمان مقدم على شراء 128 او 127 بس كل لما شوف عربية تكون مرشوشة من جوة صاحبها يقول علشان البارومة ما فيش عربية يقالها اتر من 30 سنة لازم تكون مرشوشة انا ماارداش اخودها علشان لما اجى ابيعها بعد كدا اعرف ان اللى مرشوشة من جوة سوقها واقف رايكم ايه

اول عربية حتكرهك فى صنف العربيات كلها***

يا رجاااالة

عرضت فكرة الـ 128 دى على بعض الزملاء فى الشغل ،،

واحد منهم عنده ماروطى قالى خد باااالك اوى من الشاسيه ، لإن لو كان مقطوم ( مفتوح ) ... مهما اتعمل فيه من لحامات مش هايظبط و العربية مش هاتبقى ثابتة و ممكن على السرعات العالية تلاقيها عايمة

و سمعت من الزملاء ارقام فى موديلات الفيات ولا عمرى سمعت عنها قبل كدا !!

124 و 125 و 127 و 128 و 131

دخلت على النت علشان اعرف موضوع الشاسية المفتوح ده لقيت انه موضوع مشهور فعلا ( و خصوصا فى الـ 128 و موديل اسمه ريمتو ! )

فـ بدأت اقلق من الموضوع ده ، و خصوصا انى لسه جديد فى السواقة

قولتلهم ان كان معروض عليا مو79 بـ 10 آلاف ،، ضحكوا
قالولى الموديل من زماااااااااان ،، و السعر فى الارض <---- فأكيد العربية انتهت صلاحيتها
و قالوا انى اجيب حاجة اجدد و افضل حتى لو هادفع فيها ،، بدل ما ابقى كل يوم عند ميكانيكى و هاصرف اكتر و اضيع وقت
^^^
نفس كلامكم يعنى :)

-----------
طيب كدا الحل ايه ؟؟
ازود الميزانية لـ 15 الف ... ( او خلوها 14 بس ، و الالف التانية تظبيطات ما بعد الشراء ^_^ )

على النت فيه ناس بتشكر فى الـ بيجو 205 ...و بيقولوا انها فى نفس رينج السعر ده

فأيه رأيكم ؟؟؟
فيه موديلات من الفيات التانية تكون مضمونة و اعتمادية فى رينج الـ 14 الف ؟
ولا ابدأ ادور فى الـ بيجو 205 أو ماركات تانية ؟
ولا اقضيها مواصلات و اضيع صحتى و عمرى فى المايكروباصات :) !!

فيه عضو بالمنتدى عامل موضوع نسخة من موضوعك
وفيه كلام مفيد عن الـ 205

http://www.nilemotors.net/Nile/386399-205.html
يارب يفيدك

شكــــــــرا يا معالى الباشا ،، فعلا الموضوع مفيد
لكن اكتشفت ان سعرها بيلعب فى الـ 20 !! كااانت زمان بـ 15:16 .. دلوقتى مش عارف ليه سعرها ارتفع

----------
خلينا فى الفيات اللى على قدنا ؟؟

فيه اللى قال ان الـ 124 و 125 افضل الفئات دى ، ايه رأيكم ؟

و اللى قال ،، هات الـ 128 بحالة تعبانة ، و ظبطها انت على ايدك
لإن كدا كدا اى عربية 128 بعد شرائها هاتظبط فيها و تغير عند ميكانيكية

ايه رأيكم فى الاقتراحات دى ؟

نصيحه لوجه الله
خد معاك حد بيفهم قوي وقلبه عليك
طالما اول مره تشتري عربيه
ثاني شيء
المبلغ اللي معاك مش هايجيب عربيه نضيفه ايا كان نوعها
وال24 عربيات انتهت واتعدمت العافيه في الشوارع
عمرها اكبر مني وانا مواليد 72
ال25 بطبيعتها مفككه من بعضها وقوايمها بتتكسر
البلونيز لو فكرت فيها هاتكون افضل منهم حديثه نسبيه
قطع غيارها متوفره وانجيكشن لو حبيت
عيوب ال25 قوايم كارونه مافيهمش مشكله
تابلوه حديث
اللي ممكن تلاقيه ماسك نفسه شويه
32 و31 و504
عربيات شقيانه لكن بيظهر فيها الشغل والنضافه
ودي 20 الف يوقعوا لك عربيه معقوله وماسكه نفسها

اقتباس:

---

المشاركة الأصلية كتبت بواسطة ladawy

شكــــــــرا يا معالى الباشا ،، فعلا الموضوع مفيد
لكن اكتشفت ان سعرها بيلعب فى الـ 20 !! كااانت زمان بـ 15:16 .. دلوقتى مش عارف ليه سعرها ارتفع

----------
خلينا فى الفيات اللى على قدنا ؟؟

فيه اللى قال ان الـ 124 و 125 افضل الفئات دى ، ايه رأيكم ؟

و اللى قال ،، هات الـ 128 بحالة تعبانة ، و ظبطها انت على ايدك
لإن كدا كدا اى عربية 128 بعد شرائها هاتظبط فيها و تغير عند ميكانيكية

ايه رأيكم فى الاقتراحات دى ؟

---

اوعي تشتري عربية تعبانة تظبتها علي ايدك إلا لو غاوي و عندك خبرة عالية اوي و حضرتك بتقول إنك جديد لانج في العربيات
فبلاش تخاطر بفلوسك في حاجة زي دي

نصيحة لوجه الله... لكي تتجنب السيارات المقرفة
فالأفضل أن تصبر حتى تزيد الميزانية الى 20000 على الاقل
حتى تزيد الاختيارات وتركب موديللات تسعينات مش سبعينات
وللا تتعجل في الشراء حتى لا تندم:majd(4):
الصبر مهم جداً
وبلاش حكاية انك تشد العربية على ايدك هتكره ركوب العربيات ..........................................وهتر جع تحب المواصلات وسواقين (الميكروباظ) :00020140:

اللي يعمل كده واحد خبره وبقاله 10 سنين بيركب ودارس السوق والتجار وقطع الغيار والورش و فاهم الصنايعية وقرفهم وتلاعبهم وفلسفتهم (هو مجرد ما يشم انك جديد في الركوب وهيحاول يأخذ كل جنيه في جيبك -الا ما رحم ربي-)
انت لسه بدري عليك انك تلف على ميكانيكى وبتاع العفشة وبتاع فتايس ومتخصص ضبط كاربراتير وكهربائي وسمكري وضبط زوايا وسروجي(لو الصالون تعبان) .... كتير عليك
ومحلات قطع الغيار الاستيراد في الوكالة وعزبة شلبي والحرفيين
ومحلات الجديد واللي يقولك ده ايطالي وده تركي وكله صيني غالباً

اهم حاجة تصلي استخارة قبل الاقدام على أي أمر
وربنا يوفقك للخير

كل الطرق تشير إلى انى استنى لحد ما احط ميزانية 20 الف و بعدها ابدأ اتحرك :)

انا على العموم كنت فكرت فى انى اتقل على نفسى شوية ، و اعمل لستة بالعربيات اللى عندنا فى البلد عارف استخدامها و عارف ان صاحبها بيحافظ عليها ،، و ارمى خبر ليهم ان لو انت بتبيع اشترى منك
و اصبر ، شهر .. 3 .. ست شهور ،، انا و حظى
و كنت هافتح رينج العربية وقتها لـ 20 الف ( لو حاجة تستاهل )

============
بالمناسبة ، اخويا لسه برضه فى دماغه اللادا، و بيضرب المثل ان كل المندوبين و كل الاطباء البيطريين مش بيشتروا إلا لادا ،، علشان يهلكوها براحتهم :)
فإيه رأيكم فى الكلام ده ؟؟
لإن احتياجى لعربية حدادى بـ عفشة محترمة و مش كل شوية توقفنى عند ميكانيكى
============

صاحبى ( اللى هو الواسطة بينى و بين اللى معاه الـ 128 ) كلمنى من يومين على العربية تانى
انا كنت من ساعتها و كنت قررت انى مش هاكلمه إلا لما هو يتصل ، علشان اعرف صاحبها فعلا بيبيع ولا لأ
كان المفروض معادنا نشوفها امبارح ، بس انا كنت مشغول ، و هو ما اتصلش

برضه هامشى فى الموضوع للأخر ، و هايكون معايا حد بيفهم فى العربيات و نشوفها براحتنا ، و لو ان الراجل المعرفة اللى هاخده معايا يشوفها مش راضى انى اجيب 128 .. فلو وافق على انها حلوة يبقى اكيد هاتكون محترمة .

غير كدا هانتظر لحد ما حاجة تستاهل ، ولا ايه ؟