على بركة الله قررت شراء مولد كهربائى بنزين بعد البحث الرائع اللى ساعدنى من موقع العضو الزميل المحترم روتانا واشكره على مساعدته ياريت اسمع تجاربكم عن الموضوع ده و انا طبعا هبلغكم كل المعلومات اللى هتواجهنى في عمليه الشراء و الأسعار الخ
على بركة الله قررت شراء مولد كهربائى بنزين بعد البحث الرائع اللى ساعدنى من موقع العضو الزميل المحترم روتانا واشكره على مساعدته ياريت اسمع تجاربكم عن الموضوع ده و انا طبعا هبلغكم كل المعلومات اللى هتواجهنى في عمليه الشراء و الأسعار الخ
مولدات كهربائية المانى الصنع ماركة swiss kraft 8500 بقدرة اخراج 4000 وات صافى , .
واليك مواصفات المولد :
الماركة : سويس كرافت Swiss Kraft .
الصناعة : مولد كهربائى المانى تقفيل صينى .
التشغيل : سحب يدوي وليس مارش .
الملف : المونيوم مطوى نحاس .
القدرة : 8500 وات ( 8,5 كيلو) .
معدل الإخراج للكهرباء : 6000 وات ( 6 كيلو ) .
معدل الاخراج الحقيقى له : 4000 وات ( 4 كيلو) .
الوزن : 40 كيلوجرام .
الفولت : 220 / 380
(2 فاز - 3 فاز).
التردد : 50 هرتز .
السعة اللترية : من 15 : 17 لتر بنزين .
مادة التشغيل : البنزين .
ساعات العمل : من 11 : 14 ساعة متواصلة .
استهلاك البنزين : 1.36 لتر في الساعة .
سرعة المحرك : 3600 دورة في الدقيقة .
البستم : 1 بستم
التبريد : هواء
و طبعا نلاحظ ان سلك الملف الومونيوم يبقى ملوش لزوم بعمل بحث عن مولدات هوندا و على كلمهم الملف نحاس 100% و بضمان سنة هعمل سيرش و اكتب برضه
افضل مولد حاليا ومتجرب من ناس اعرفهم اسمه
لوتيان اصفر كدا
lutian
لو لاقيته اشترية وسعره حاليا 1800
طيب ماتفكر فى موضوع الانفيرتر مش هيتحط فى البلكونه مش هيعمل ازعاج مش هيعمل عادم مش هتقوم تشغله هو بيعمل تلقائيا بدون تدخل منك نهائى مش هتشترى بنزين وزيت وال 900 va بيسموه كيلو بيشغل مروحتين 2 شاشه واكتر من عشر لمبات
بصراحه انا مركبه من يومين وبجد اختراع ماشاء الله مبحسش اصلا بانقطاع الكهرباء كل حاجه بتفضل شغاله زى ماهى عدا اجهزه المطبخ طبعا هو قدرته محدوده لكن انا مش عايز اكتر من كده المهك يكون المكان منور وعلى الاقل مروحه شغاله
مجرد رأى مش اكتر ...
ياريت لو معلومات اكتر عن الانفرتر ده و بكام و منين و طريقة تشغيله و الحاجات دي بتفضل شغاله مده زمنيه بردوايه أد ا
انا للان معرفش سعره تخيل والله كلمت صديق بيشتغل فيهم على ماروحت لقيته راكب ولسه وكل مااكلمه يقولى هجيلك اقعد معاك
بس فيه اخوه فى المنتدى اشتروا ماركه تانيه وبسعر تقريبا 1350 من غير البطاريه
الموجود عندى انفيرتر اسمه لومينوس هندى 900 بيجى معاه بطاريه 150 امبير وترابيزه شيك على عجل بيتحط فيها البطاريه والجهاز فوقها وهو شبه ريسيفر التلفزيون
واللى ركبه مهندس تبع التوكيل صفى الاحمال المناسبه من لوحه المفاتيح ووصلها بالجهاز مخدش ساعه فى الموضوع طبعا طلع التكيفات والمطبخ بالكامل من الموضوع
وعملنا تجربه كا لاتى
اضاءه 2 شاشه بالريسيفر - 47 و 32 -------- تشغيل 12 لمبه موفره مع لمبتين 60 == تشغيل حوضين سمك --- تشغيل مروحه 30 بوصه (دى مصيبه لوحده لانها كبيره جدا ) تشغيل مروحه مكتب فريش صغيره -- اكسيس بوينت -- كمبيوتر===مش عايز اكتر من كده كفايه على لمبتين والمراوح والتى فى
الجهاز مجرد قطع الكهرباء بيشتغل تلقائى يعنى لو تلفزيون شغال ميطفيش ولا الانو تطفى بينقل لحظى
وبمجرد رجوع التيار بيشحن تلقائى مبتحسش بانقطاع الكهرباء غير من صفاره 3 مرات من الجهاز
فى الطبيعى فى اليومين النور قطع 3 مرات يوميا بين ساعه وسعه ونصف لكل مره وهو شغال عادى تقريبا الشقه كلها منوره== المهندس قال ان لو التحميل ده كله شغال مع بعضه هيشتغل 3 ساعات بس مجربتهاش
هو ممكن يكون سعر مولد والمولد قدرته اكبر ..لكن المقابل لا ازعاج ولا عادم ولا محطات بنزين ولا اقوم اشغل وافصل وشكله شيك وآمن بدرجه كبيره عن المولد
شكرا على ردك الوافى ... كلك ذوق :)
هو طبعا حل معقول جدا و مش مكلف و ليس له تكاليف متكرره كثل المولد الى بالبنزين ...
هو اخره حتغير له بطاريه كل حوالى ٣ سنوات ...
يا ريت يا باشا لما تعرف اجمالى التكاليف بالبطاريه ال ١٥٠ امب تبقى تقولى :) و لو لهم فرع فى اسكندريه ...
تحياتى ...
تحت امرك بمجرد ما اعرف هبلغك ان شاء الله
للمهتمين :
و انا ببحث عن الانفرتر لقيت موقع الفيس ده لشركه عندهم موديلات كتير و قدرات من ١٠٠٠ حتى ٦٠٠٠ و اسعار من ٧٠٠ جم
https://ar-ar.facebook.com/inverteregypt
تحياتى ...
يا جماعة الأنفرتر اهم حاجة يكون بيور صاين وويف مش سكور ساين ويف عشان الأجهزة الكهرباية ممتحرقش
وللعلم الاستاذ طارق عمله عنده مكلف مش رخيص بس المهم ياريت يقولنا أتكلفه كأم
يا جماعة ,, لو فى شركة بتركب الانفيرتر ده فى اسكندرية ياريت تقولولى , بس يكون حد مجرب الشركة من قبل ..
السلام عليكم المشكلة فى الانفرتر حجتين الأولى و الأهم هى استهلاكه الشديد للبطارية يعنى عمرها قصير و البديل هو بطارية ديب سيكل بها تقريبا من ضعفين الى 3 اضعاف كمية الخامة اللى بتتفاعل علشان تطلع الكهرباء و دى غالية و سعرها يزيد عن 1000 جنية و الحاجة الثانية هو ان الانفرتر بيسخن جدا و ده بيعرض الملف للتلف و محدش ادانى فكرة عن انفرتر مستخدم لعدة شهور او سنه , بالنسبة للقدرة المولد بالبنزين طبعا اقوى بكثير و الصيانه الاساسية له تنظيف الكاربراتير بالنسبة للاخ اللى بقول تشغيل تكييف طبعا فى بس محتاج قدرة عالية بس باستثناء التكييف تشغل كل حاجة فى البيت وممكن ثلاجة صغيرة كمان بس تحسب الواط بتاعها زى ما وضح العضو الزميل روتانا.
اللى عاوز يعرف تفاصيل الانفرتر يكتب على اليو تيوب انفرتر و سيجد العديد من الفيديوهات بس ارجع اقول انا بحكم عملى كنت باشتغل على اجهزة يو بى اس و هى اجهزة انفرتر حديثة كانت تعطى انذار عند ارتفاع درجة الحرارة.
اخيرا هناك مولدات بنزين كاتم صوت اعتقد الكفة ارجح للموتور الكهربائى و بالمناسبة كل المحلات و حتى دلوقت الاكشاك بتجيب مولدات مشفتش حد جايب انفرتر مع خالص تحياتى
والله عندى ولا بيسخن ولا حاجه ثانيا البطاريه عندى مش هتفرق انها تفعد سنتين كل الناس بتقول 3 سنين
بس لابشترى بنزين ولا بشيل جراكن ولازيت ولا ضوضاء
ياجماعه انا احتياجى للانفيرتر بالشكل ده مكفينى ومرضى جدا جدا بالنسبه لى على فكره انا واخد ضمان سته على الجهاز
بس محدش يشتريه وارجوكم اشتروا مولدات كهرباء
انا اسف انى عرضت تجربتى كنت هضيع عليكم فلوسكم
الاختلاف فى الراى لا يفسد للود قضية , الغرض الاساسى من طرح النقاش ليس الاختلاف و لكن اثراء النقاش بوجهات النظر المختلفة و ده يعطينا فكرة اكبر عن المشكلة و حلها و عموما لحد دلوقت ملقيتش مولد كهربائى ملفه سلك نحاس و شركة الغاز رفضت عمل توصيلة غاز فى حالة شراء المولد يعنى فيه مشاكل بتوجهنا و النقاش بيحلها و يمكن اجيب فى الاخر انفرتر بعد الموضوع ما يقتل بحثا, المشكلة دلوقت انا مسافر ان شاء الله مدة 5 ايام فى منطقة مفيهاش شبكة انترنت ولا موبيل مش هقدر اتابع الموضوع بس هبلغ حضرتك باى تطورات و ياريت برضه الاخوة اللى جيبين انفرتر يبلغونا خبرتهم فى الموضوع مش استعماله على المدى القصير و لكن بعد عدة شهور
انا حاولت انزل الرسالة الخاصة اللى بعتهالك على الموضوع العام و اكيد انا خبرتى محدودة جدا و رايك هيكون افيد من هحاول انزل النص كوبى باست .....أولا جزاكم الله خيرا للبحث الرائع اللى عملته عن مولدات الكهرباء و قررت أشترى واحد 5 او8 ك طبعا اما ماركيز او سويس كرافت و السلك نحاس و هسأل عن قطع الغيار للصيانه , شركة الغاز الطبيعى رفضت توصيل وصلة مش لى انا فقط ده للكل و السبب الاساسى على كلمهم اجراءات الامان و بالتالى مش هحاول اعمل وصلة و هاكتفى بالبنزين بس عندى لو سمحت شوية أسئلة و استحملنى لانى علاقتى بالكهرباء زى معلوماتى بمكوك الفضاء تشالنجر وهاحاول الاختصار علشان وقت حضرتك:
-ايه معنى نفتح المحبس و نفتح الهوا ( حضرتك كتبت ده عند التلين)
-تغير الزيت ....هل هناك خزان خاص بالزيت و بعد التلين يتغير كل قد ايه.
هل هناك مكان مضمون علشان السلك يبقى نحاس مش الومونيوم ؟
هل اوبشن كاتم الصوت و المارش على المولدات اللى حضرتك ذكرتها و لا ده نوع تانى و أخيرا الدائرة الالكترونية بتتباع برضه كأوبشن ؟ مع خالص تحياتى
يافندم مفيش خلاف ان شاء الله انا مجرد فقط بحاول انقل تجربه وفعلا انا حاسس انه نعمه كبيره
فى الايام الغامقه دى انا بردوا كنت مهتم جدا بمصدر للكهرباء واللى طمنى اكتر انى عرفت ناس مركبه نفس الانفرتر الموجود عندى اكتر من سنه ونصف ومحدش اشتكى منه بس حكايه ان تجربتى تعد بالايام لاتديننى بشىء مجرد نقل تجربه لا اكثر.. ولا انصح اى حد بشراء شىء غير بعد دراسه وتمحيص احنا بنجيب الفلوس بصعوبه... لكن فى الايام القليله دى اشتغل فى اليوم اربع مرات بمعدل 6 ساعات متقطعه وتمام التمام ولا سخونيه لانه مجهز بمراوح تبريد ولا بحس اصلا بانقطاع الكهرباء نهائى .... الجهاز الموجود عندى مختلف لانه حتى مفيش سلوك باينه منه هو بالظبط شكل الريسيفر وبشاشه زى الريسيفر .. وموضوع البطاريه هو جاى ببطاريه جافه 150 امبير شغاله عند الناس سنه ونصف كامله وكفائتها عاليه حتى لو باظت البطاريه هى تمنها كام .. بالمقارنه بثمن البنزين.. سيبك من ثمن البنزين انا عندى عقده من وضع جركن بنزين فى العربيه .. صديق لى كان شايل جركن بنزين ورايح بيه المزرعه الخاصه به وترك العربيه فى الشمس وبعت السواق يجيبها فى الضل السواق كان بيشرب سيجاره بمجرد ما فتح العربيه العربيه انفجرت وكانت اوكتافيا ايه فايف هاى لاين والسواق طار فى الهواء واتبهدل .......... فتفكير ى انا ليه اشيل بنزين واخزن فى بيتى بنزين للمولد(خطر جدا) .. ناهيك عن ازعاجه الفظيع . والعادم الخطر جدا وقلق الجيران .. والنور يقطع اقوم اشد المنفله وارفع السكينه .. النور يجى اقوم افصل السكينه وابطل المولد .(انا مش هكون فى البيت على طول مين هيتعامل مع المولد ). انا حسبتها كده مش اكتر .. بمجرد تركيب الانفيرتر نسيت انى مركبه هو يقوم بعمله بدون تدخل منى..وبخصوص موضوع المحلات مبتشغلش انفيرتر .. ردى هو مين يسمع عن الانفيرتر وهل هو ناجح ولا لا مش كل الناس بتدخل نت ومنتديات وبيهتموا بحاجه زى دى .. انا عرفت الانفرتر من هنا من نايل موتورز وبدأت اهتم بيه....لكن لو محتاج قدرات عليه لتشغيل تكييف مش هينفع انفيرتر الابسعر عالى جدا جدا .. حتى عندى مينفعش اقل تكييف 2.25 ... كفايه على المراوح .هو انا كنت طايل حتى المروحه.. وطالما شقتى منوره خلاص مش محتاج حاجه.. وفى الاخر عيب الانفيرتر لو بطاريه احسبها تانى سعر البنزين فى عدد مرات التشغيل وشيل جركن وبنزينه وخطوره .. كل ده بناقصه خالص قصاد ثمن بطاريه حتى لو هجيبها جافه كل سنتين مثلا ان احيانا الله..
وربنا يوفقك للاختيار الاصلح
فعلا تكلفة تغير بطارية كل سنتين 3 سنين اقل من تكلفة البنزين خلال نفس الفترة.
متابع بشدة لان كده مدة انقطاع الكهربا تخطت 5 ساعات يوميا
و يا ريت لو الشركة دى ليها فرع فى اسكندرية