الموضوع: بعد تغير مسامير العجل الدركسيون بيرعش فوق الميه

السلام عليكم

انا يا جماعه حصلى ان العجله نامت وجيت اغيرها كان فيه طبه ناعمه وقافشه فى المسمار ومش راضيه تتفك خالص واطريت اطلع بيها لبتاع الكاوتش والعجله نايمه بس مفيش حل تانى وبتاع الكاوتش قعد ساعه يحاول يفكه مش راضى يتفك وفى الاخر سمكرى فكه بالنار

المهم بعد كده اشتريت طبات او صمولات جديده لان اللىل عندى كانوا السنون بتاعتهم ناعمه ومش بيتفكوا بالمفتاح بسهوله بعد كده جينا نركبهم لقينا السمامير اللى بتركب فيهم متحتاجه تتخرط ومفيش خراط عرف يعملها
بالصدفه وانا ماشى قابلت الميكانيكى بتاعى وغيرلى طقم المسامير طبعا بعد ما فك المسامير القديمه و كان بيدخل المسمار ويدق عليه بعد كده ركبت العجله وطلعت مشوار ومره واحده وانا جايب الرابع وماشى على ميه حسيت ان الدركسيون بيرعش وده مكنش بيحصل الاول تفتكروا الموضوع حصل لوحده كده ولا تغير المسامير ليه علاقه ؟ انا عديت عالميكانيكي قولتله قالى مستحيل تكون من تغير المسامير وده مساعد الغربله هوه اللى لما بيبوظ الدركسيون بيرعش
تفتكروا ايه ممكن يكون السبب ؟ انا رايحله على اول اللشهر نعمل شغل خفيف فى العربيه واخليه يشوف موضوع الرعشه ده هل فى حاجه معينه اقوله يبص عليها ؟

شكرا يا جماعه على الرد والاهتمام
انا امبارح روحت أرصص الراجل اول ما بص على الكاوتش عندى الأربع فرد بالأستبن قالى الكاوتش عندك رايح فى داهيه والترصيص مش هيفيد معاك هوه يعنى ممكن يظبط معاك بنسبه 50 % بس مش هتبقى مظبوطه عالاخر
قولتله ماشى رصص بس دلوقتى لحد ما اجيب كاوتش جديد
المهم الراجل فك العجلتين اللى قدام وحطهم عالجهاز ورصص طبعا كان بيحطط حتت عحديد كده عند حرف الجنط وهوه ده الترصيص على ما اعتقد
المهم خلص حسابك كام يا ريس 30 جنيه يا باشا دفعت وطلعت بالعربيه واول ما جبت سرعه 80 ربنا ما يوريكوا العربيه بترعش بشكل مرعب مش دركسيون بقى لا ده العجل من تحت وصوت عالى انزل عن 80 تتظبط اوصل ل 80 يحصل تانى روحت لافف وراجعله خليته يشيل شويه من الحديد اللى اتركب ده وطلعت جربت لحد قبل الميه وكانت تمام مفيش رعشه كنت عايز اعدى الميه بس الطريق مسمحش فكتفيت بكده :(