هل البطارية إذا كان فيها مشكلة تسبب تشغيل لمبة الأعطال؟
الحقيقة أنا معي سيارة كيا شوما أوتوماتك 98 ، بعد ما جبتها بشهر تقريبا البطارية تلفت، وطبعا اشتريت بطارية جديدة 55 أمبير ، وطبعا سألت صاحب المحل أيهما أفضل للسيارة 55 أو 70 ، فأخبرني أنه تقريبا مفيش فرق، وبالفعل ركبت البطارية واشتغلت والحمد لله، لكن لاحظت أن لمبة الأعطال بدأت تنور أحيانا، وأحيانا تفصل، قلت يمكن يكون الأمر محتاج بعض الصيانة، غيرت السيور، ونظفت الحساسات، وغيرت البوجيهات وكابلاتها، ونظفت البوابة، فكانت اللمبة بتطفي لفترة، ثم تشتغل مرة تانية. لكن كل ده مش واضح تأثيرة في أي حاجة، الحمد لله العربية سحبها كويس، واستهلاكها كويس، فمشغلتش بالي قوي بموضوع لمبة الأعطال.
لكن بعد سنتين بدأت البطارية تخسع معايا، فلو تركت العربية أكتر من يوم ، البطارية متدورش العربية، صبرت عليها شوية، أديها مشوار طويل، حطيتها على التونجر، لكن بلا فائدة.
ثم تأتي المفاجأة : بدأت لمبة أوفر درايف تنور وتطفي من أول ما أدور العربية ، وعند المشي بدأت أشعر بتنتيشة خفيفة، وكأن العربية مخنوقة.
قلت شكلها كدة لازم أغير البطارية، وبالفعل غيرتها ، لكن المرة دي جبتها 70 أمبير، والحاجة الجديدة بالنسبة لي أن لمبة الأعطال طفت تماما، ومبقتش تنور، وحسيت إن صوت الموتور هدي عن الأول، والحمد لله، الله يدمها نعمة.
وكنت من فترة وأنا بتصفح منتداكم المحترم قرأت بعض الموضوعات المتعلقة بلمبة الأعطال، والحقيقة استفدت، فبارك الله في الإخوة، لكن مشفتش حد اتكلم على البطارية خالص، كل الكلام كان عن الحساسات والرشاشات، وبعض الأشياء الأخرى، فحبيت أضيف المعلومة دي يمكن تنفع أحد الإخوة، ولو في حد عنده رد أو تعليق ممكن نستفيد منه، يبقى مشكورا يقولنا رأيه، وينقل خبرته، وزكاة العِلم نشره. وللعلم أنا مجرد مستخدم للسيارة، ولست متخصصا في أي مجال من مجالات السيارات.
