اتصدمت لما كشفت عن مخالفات المرور

**Elawany13** · 22-04-2015 05:43 PM

المشاركة الأصلية كتبت بواسطة mohamed a s

أنا عارف ان الموضوع قديم بس حبيت أقول لكم اني عملت معارضة في المرور اللي انا تبعه (وليس تظلم في مرور الدراسة) والحمد لله اتقبلت والقاضي كان في منتهى الاحترام بجد واتشالت المخالفة وجددت الرخصة من غير ولا مليم مخالفة والحمد لله .. الدنيا لسه فيها خير وفيه أمل.
لكل من يتاخد مخالفة ومش عارف جاتله منين ومتاكد انه معملهاش بما يرضي الله .. يعمل معارضة وإن شاء الله تتشال من عليه المخالفة.

ألف مبروك ياباشا
طيب المعارضة ديه بتتعمل ازاى ؟
وخدت وقت قد ايه ؟

**Dr\Mohamed** · 23-04-2015 01:44 AM

أنا اشتريت عربية لأختي تتعلم عليها وركنتها في الجراج ورا عربيتي لغاية ما أفضى أعلمها ..... العربية أخدت مخالفة وهي في جراجي !!

فقط يحدث هذا في مصر

http://www.nilemotors.net/Nile/457109-a.html

**Mohamed A S** · 23-04-2015 07:56 AM

المشاركة الأصلية كتبت بواسطة elawany13

ألف مبروك ياباشا
طيب المعارضة ديه بتتعمل ازاى ؟
وخدت وقت قد ايه ؟

ربنا يكرمك .. اجراءات المعارضة بسيطة بتروح المرور اللي انت تبعه (يعني المرور اللي بتجدد فيه رخصة العربية) وبتطلب انك تعمل معارضة على المخالفة ولو سألوك طب انت عملت تظلم في الدراسة قلهم عملت واترفض (كده كده التظلم بيترفض وبتطخ مشاور للدراسة على الفاضي وبتدفع رسوم اينعم هيه بسيطة لكن بتضيع وقت ومجهود كبير). وبعد ما بتقدم الاوراق المطلوبة اللي هيه الرخصة وصورة البطاقة الشخصية وبيقولوك على ورق من عندهم بتروح تصوره لهم وبتدفع رسوم حوالي 8 جنيه، بيحددولك ميعاد بعدها بشهر تقريباً في محكمة زينهم. بتروح في الميعاد المحدد وبتاخد معاك صورة البطاقة الشخصية وبتقول أسبابك المقنعة للقاضي. وبعدها بيومين أو ثلاثة بتروح الدراسة تكشف عن نتيجة المعارضة وإن شاء الله بتتقبل وبتتشال المخالفة. نقطة هامة انك طالما قدمت على معارضة يبقى لازم تحضر في ميعاد الجلسة وإلا بيعتبروا عدم حضورك إهانة للقضاة وبيثبيتوا المخالفة أو يزودوها كمان حسب ما يشوف القاضي.
على فكرة لما بتعمل المعارضة في نيابة المرور بيدولك تصريح مؤقت (رخصة مؤقتة) انك تمشي بالعربية لغاية ما المعارضة تنتهي ويتبت فيها.

المشاركة الأصلية كتبت بواسطة باسم يوسف

استاذ محمد

احب اقول لحضرتك و انا بطلع براءه الذمه لعربيتي ... لقيت مخالفه عكس اتجاه في محافظه ما ... معرفش فين علي الخريطه اصلا و لا عمري دخلتها اساسا ... عملت تظلم و لم يتم قبوله و دفعت من سكات عشان ابيع العربيه و اخلص

ربنا يرحمنا

أنا عملت تظلم واترفض لكن التظلم وحده لا يكفي .. لكني اصريت اكمل المشوار لاخره وعملت المعارضة وإن شاء الله بيبقى فيها كلام طالما بتقدم اسبابك المقنعة للقاضي. المعارضة غير التظلم ودايما في النيابة بيضللوك ويقولوك اعمل تظلم في الدراسة (مش اعمل معارضة) لان النيابة بتستفاد من قيمة المخالفة. والله أعلم.

**emad_2020** · 23-04-2015 12:54 PM

انا كمان اسبوع رايح اجدد وخايف كتير من المخلفات الشرطة شغاله الله ينور وخده عاطل فى باطل
وعلشان الرخصه لسه اول سنه مش نزلت على النت ولا اتسجلت علشان كدة خايف اتصدم وانا فى المرور ربنا يستر
اما عن مخلفات عكس السير مفيش فيها تظلم
تترحل فى حاله واحدة اما تكون شارى العربية من شخص تانى والتاريخ قديم عن تاريخ الشراء غير كده هتدفع
وربنا على الظالم

**Mohamed A S** · 23-04-2015 01:54 PM

المشاركة الأصلية كتبت بواسطة emad_2020

انا كمان اسبوع رايح اجدد وخايف كتير من المخلفات الشرطة شغاله الله ينور وخده عاطل فى باطل
وعلشان الرخصه لسه اول سنه مش نزلت على النت ولا اتسجلت علشان كدة خايف اتصدم وانا فى المرور ربنا يستر
اما عن مخلفات عكس السير مفيش فيها تظلم
تترحل فى حاله واحدة اما تكون شارى العربية من شخص تانى والتاريخ قديم عن تاريخ الشراء غير كده هتدفع
وربنا على الظالم

انا كانت مخالفتي عكس سير وعملت المعارضة والحمد لله اتشالت . بالإضافة أن أي مخالفة ممكن يتعمل ليها تظلم أو معارضة مش عكس السير بس. وبعدين لازم نفرق كويس أوي بين التظلم والمعارضة الفرق شاسع بين الاثنين.