الموضوع: تقرير استلام التو 2015 الشكل الجديد

المشاركة الأصلية كتبت بواسطة ibrahimahmed

365 يوم نيو التو 2015 ...... :) :) :)
النهاردة هيكون مر سنة على استلامى للعربية ... :) :) :) ... من سنة عملت موضوع( اللى انا برد فيه دلوقتى ) على نايل موتورز الحمد لله ربنا جعله سبب فى ان ناس كتير تعرف العربية اكتر وتشترى العربية كمان بسبب مشاركات الناس واسئلتهم وارائهم ( حوالى 990 رد على الموضوع الاصلى) .... ومع مرور سنة كاملة وعداد عامل 19340 كم بالظبط ... فكرت اعمل تقرير للعربية عن السنة اللى فاتت وتقييمى للعربية من جميع النواحى :

1- الحمد لله كنت من اوائل الناس اللى استلمو 2015 لانى مستلمها 10-8-2014 وكانت لسه مش مشنترة تماما ... فكان الريسك كبير بس كان اللى مطمنى شوية هو اسم سوزوكى

2- فى خلال سنة ... الحالة العامة للعربية تمام ... مفيش اى مشكلة واجهتنى ... مفيش اى حالات طارئة او غربية حصلتلى

3- التكييف الحمد لله زى الفل .... الجو حر او مش حر ... الصبح او بالليل ... كفاءته ثابتة على الطريق ... ومازالت مشكلته الازلية انه بيأثر بشكل ملحوظ على سحب العربية ... وده مش عيب فى الالتو ... اى عربية اقل من 1300 سى سى التكييف هيأثر على السحب ( فى هذه النقطة احب اوجه الشكر لمراتى لانها هى اللى اقنعتنى انى اجيب الالتو بدل الماروتى عشان التكييف ... انا كنت مع نظرية ان ال 15000 جنيه فرق فى السعر مايخلونيش اجيب الالتو عشان التكييف ... استحمل الحر احسن واهى كلها عربيات صغيرة وانا مش فارق معايا موضوع الجرى على طريق والكلام ده فى مقابل انى اوفر 15 الف جنيه فى السعر ... بس بعد ما جبتها عرفت غلطتى ... الله يباركلك يا ام ياسين )

4- العفشة ناشفة شوية مقارنة بعربيات تانية ... وده يمكن لانها عالية بشكل ملحوظ عن الارض

5- علو العربية ده ميزة جامدة جدا ... مع المطبات اللطيفة بتاعتنا عمر العربية ما حكت فى مطب

6- مفيش ولا سائل من السوائل نقص خلال سنة كاملة ... ولا مياه خضره ولا زيت فرامل ولا زيت موتور

7- البنزين ثم البنزين ثم البنزين ... موفرة جدا فى البنزين ... بحسبة بسيطة كده : انا عامل بالعربية 19430 كم بالظبط خلال السنة ... اللتر معايا بيمشى العربية فى المتوسط 18 كم ( مش هاقول 20 ولا 22 ... خلينا فى المتوسط ... 18 كم بس ) ... اقسم بقى ال 19340 على 18 يساوى 1143 لتر ...اضرب فى 2.6 جنيه يساوى حوالى 2800 جنيه بنزين فى سنة ... لو انا معايا عربية زى الفيرنا او الاكسنت او اللانوس (متوسط اللتر بيعمل 10 كيلو ... مش هاقول اقل من كده ... خليها علينا احنا ) بنفس الحسبة تلاقى انى لو مشيت نفس المسافة اللى هى 19430 هادفع بنزين مقداره 5050 جنيه ... يعنى فرق 2250 جنيه فى السنة .... متخيلين الفرق ؟؟؟!!!

8- الكابينة الداخلية ضيقة ... وده واقع نظرا لان العربية اصلا صغيرة ... اتنين ورا مستريح .. اكتر من كده هاتبقى ضيقة عليهم ... وقدام لو حد ضخم الجسم شوية هايبقى متضايق فى القعدة خصوصا لو متعود على عربية اوسع

9- العجل بتاعها صغير ... وشكله وهو صغير كده موحش شكل العربية جدا ... الناس بتتغلب على كده بانها تجنط العربية ... عيب تانى فى الجنط الحالى وهو انه بيتعوج مع النقر والحفر ... ودى كانت شكوى من اكثر من مستخدم للالتو

10- قطع الغيار فى المتناول ... لا هى غالية اوى ولا هى رخيصة اوى ... والاهم انها متوفرة الحمد لله ... ماتعرضتش الحمد لله لغاية دلوقتى لتغيير اى قطعة بس كله متوفر الحمد لله

11- الشكل الانسيابى الجديد عامل جذب هام للعربية عن الشكل القديم ( زمايلنا اللى معاهم موديلات قديمة مايزعلوش ... :) ) وهى كلها ازواق برضو

12- مازالت مشكلة العربية الازلية بالنسبة ليه هى فقر الكماليات ... مفيش باور - كاسيت - سنتر - انذار - مفيش مفتاح داخلى للشنطة - مفيش زراير ابواب - مفيش زجاج كهربا - اكصدام مش بلون العربية - مرايات رديئة جدا .... كل دى نقط ضعف ... منه لله الوكيل اللى منزلها كده عشان يزود مكسبه

اخيرا .... العربية حلوة جدا على قد فلوسها ... افضل عربية فى الفئة السعرية بتاعة 60 او 65 الف جنيه

ادعولى بقى اخطف يوم اجازة كده واروح ارخص لانى كده دخلت فى شهر السماح وربنا يستر :) :)

طب يا باشا بالنسبه لمشكلة الجنط لما اغيره اركب جنط حجمه ايه ؟؟ يعني 12 بردو بس عريض شويه ولا اركب 13؟؟؟؟
وبالنسبه للوكيل هما مودرن موتورز ربنا ينتقم منهم لحد دلوقت مستلمتش العربيه وانا حجز من 4/16 ولو وصلت 8/25 ومكنتش لسه استلمت هسترجع فلوسي واجيب فيرنا نضيفه من فابريكا غبور اوتو مستعمله على خفيف اكرم لي.

المشاركة الأصلية كتبت بواسطة مدحت صابر1986

طب يا باشا بالنسبه لمشكلة الجنط لما اغيره اركب جنط حجمه ايه ؟؟ يعني 12 بردو بس عريض شويه ولا اركب 13؟؟؟؟
وبالنسبه للوكيل هما مودرن موتورز ربنا ينتقم منهم لحد دلوقت مستلمتش العربيه وانا حجز من 4/16 ولو وصلت 8/25 ومكنتش لسه استلمت هسترجع فلوسي واجيب فيرنا نضيفه من فابريكا غبور اوتو مستعمله على خفيف اكرم لي.

الجنط اللى فى العربية اصلا 13 بوصة مش 12 ... واللى عاوز يغير الجنط يجيب جنط اعرض شوية انما بنفس القطر ... 13 بوصة
وبخصوص الاستلام انا عارف ان مودرن بتتاخر اوى فى التسليمات ... ان شاء الله تستلم على خير قبل 25/8

المشاركة الأصلية كتبت بواسطة ahmed_moeaz

ربنا يباركلك فيها ويرزقك خيرها ويكفيك شرها والله انت تقريبا بتتكلم عنى بالظبت بس انا مش معاك ف حكاية الجنط انا لسه مرصص وكاشف على الجنوط وبفضل الله اقصى عجلة كان فيها 20 درجة ولا حاجة ، سؤال بقى انت لسه متابع مع التوكيل ؟! اصلى غيرت زيت بره ورصصت وصينت العفشة وظبط زوايا مش عارف اروح التوكيل اعمل ايه وحرام اليوم اللى بيروح ده على الفاضى انا خلصت الكلام ده كله ف ساعتين زمن بعد الشغل

اه انا بتابع مع التوكيل عشان الضمان ... مجبر اخاك لا بطل

متابع

السلام عليكم ورحمه الله وبركاته
بعد اذنكوا عندى سؤال انا عملت صيانة 1000 كيلو فى 21/3/2015
ودلوقتى انا مشيت بيها 4100 كيلو المفروض اروح اعمل صيانة ولا لسه عند 5000 بالضبط
يعنى اقصد بتتحسب بالشهور اقرب ولا عدد الكيلو

وممكن حد يفيدنى بخصوص الفتيس الايام ديه مش بينقل بسلسلة كده
وكانه بيحك وانا بينقل الغيارات

المشاركة الأصلية كتبت بواسطة ندى كامل

وممكن حد يفيدنى بخصوص الفتيس الايام ديه مش بينقل بسلسلة كده
وكانه بيحك وانا بينقل الغيارات

اكشفي على زيت الفتيس

المشاركة الأصلية كتبت بواسطة ندى كامل

السلام عليكم ورحمه الله وبركاته
بعد اذنكوا عندى سؤال انا عملت صيانة 1000 كيلو فى 21/3/2015
ودلوقتى انا مشيت بيها 4100 كيلو المفروض اروح اعمل صيانة ولا لسه عند 5000 بالضبط
يعنى اقصد بتتحسب بالشهور اقرب ولا عدد الكيلو

زيت ال5 الاف المفروض مايقعدش فى الموتور اكتر من 6 اشهر
لو عدت 6 اشهر لازم يتغير حتى لو العربية ما مشيتش 5 الاف

وانتى فى الصيانة قوليلهم على الفتيش .. بيشحمو عصاية الفتيس ويرجلشو دواسة الدبرياج ونقل السرعات هايبقى اسهل من الاول