احتاج لاستشارة ضرورية.... عاوز اشتري جين2 ومفيش غير واحدة بس..

**essamostafa** · 21-10-2008 01:57 PM

قمت بالسؤال في عزالعرب على سيارة جين2 مانيوال ولم اجد غير واحدة فقط من هذا النوع موديل 2008 ولم اتعاقد وقمت بمعاينة السيارة اولا وجدت الملاحظات التالية....
1- عدم وجود القطع البلاستيك في باب الشنطة اللي بيتثبت فيها الحبل اللي طالع من الرف اللي فيه السماعات الخلفية واللي بترفع الرف لما تيجي تفتح الشنطة.
2- نور الصالون ما بينورش ويطفي لما تيجي تفتح الباب او تقفله بس شغال.
3- الزجاج اللي قدام راكب كويس وكل حاجة بس الركن بتاعه من فوق قدام الكرسي اللي جنب السواق بعيد عن البودي بتاع العربية فتحس ان السن بتاعه طالع برة.
مع العلم بان ثمنها 81900 اي ارخص 2000 جنيه من ثمنها الاصلي 83900...
فاسالكم النصيحة: هل دي تعتبر عيوب جوهرية ولا ممكن تتعمل بسهولة. فاشتريها.
ولا بلاش؟؟؟
وشكرا

**creative** · 21-10-2008 02:38 PM

انا لو مكانك استنى واخد موديل 2009 ايه اللى يخلينى اخد موديل السنة دى وقدامى موديل اعلى

**khpopo** · 21-10-2008 04:01 PM

استاذى
زى ماقال الاخ الفاضل فى موديل جديد هاينزل لو ممكن تستنى ؟؟ ...واذا فارق معاك السعر الى اخدتة ... اطلب منهم يظبطوها قبل التسليم مش فى صيانة الاف
هو كل الحاجات عادية بس الزجاج الامامى دة اول مرة اسمع بية ومش عارف جوهرى ولا عادى اسئلهم الاول ان العربية تتعمل قبل التسليم لانى مش هاقدر افيدك فى الزجاج واذا مارتحتش استنى الجديدة او ممكن تلاقى برة عند موزع لو انى اسمع مافيش حاليا يمكن حد من الزملاء يفيدنا فى النقطة دة لان الزجاج الامامى مهم وخصوصا فى السفر
ربنا يوفق

**l0new0lf** · 21-10-2008 04:37 PM

صعب جدا مصنع يطلع عربيه بالعيب بتاع الزجاج ده
المشاكل دى كلها حاجات بسيطه بس موضوع الزجاج ده مقلق
لو انته فعلا محتاجها خليهم يفكوا الزجاج الامامى و يركبوه تانى
لو معرفوش يضبطوه ابعد خالص عن العربيه دى لان ده معناه القائم الامامى مش مضبوط
يعنى العربيه دى اتهبدت مطب جامد او عامله حادثه
و الله اعلم

**momenhamdy** · 21-10-2008 05:36 PM

انا رأي حضرتك استني موديل 2009

**MohabSaeed** · 21-10-2008 06:09 PM

بلاش تجيب عربيه ملعوب فيها ....لانها اكيد حتكون مليانه عيوب تقفيل

العربيه ده تتباع على انها استوك ب 75 مثلا
انا مع رأى الاخوه استنى 2009 احسن

**ZIMOFOX** · 21-10-2008 06:28 PM

لاء طبعا اوعى تشتريها
هوة انت لاقي فلوسك فى الارض
انت تشترى عربية وانت حاطط رجل على رجل

**mazagnge** · 21-10-2008 07:08 PM

بص يا حبيبي ها تشترى و تستلم و تتبسط يوم ولا أثنين
و بعد كدة هاتقعد تفكر فى العيوب دى
و هتبقي عايز تدفع بدل ال 2000 بزيادة 4000 و تخلص من الزن اللى فى دماغك

يا تاخد سليم ، يا تنتظر الجديد

**essamostafa** · 21-10-2008 08:47 PM

شكرا لنصايحكوا الغالية وتعبكوا بس انا يا استاذ مزاجنجي مش قصدي ان السعر لقطة انا قصدي ان تقليل السعر ده يقلق اكتر يعني حتى لو ضحكوا عليا وقالولي نفس السعر الواحد ممكن يفكر بس يقلل السعر ليه مش عارف او يمكن عشان دلوقتي مفيش طلب على 2008 والناس كلها مستنية الموديل الجديد.