الموضوع ببساطه ان جدى لوالدتى رحمة الله علية كان يمتلك اراض زراعية ، وكان مخلف والدتى وخمسة ذكور الى هما اخوالى
وكلهم كويسين ما عدا واحد منهم وهو الى عايش فى البلد الى فيها الاراض الزراعية
وعلشان جدى الله يرحمه عارف ان خالى ده متعب فراح مسجل لكل واحد نصيبه فى الارض الزراعية بما فيهم والدتى فى السجل العينى والشهر العقارى وكمان نقل التكليف فى الضرائب العقارية بإسم كل واحد حسب نصيبه فى الارض ، وإحتفظ جدى فقط بالحيازة الزراعية للارض بإسمه
جدى توفى إلى رحمه الله وتولى خالى المتعب ده رعاية الارض بإعتباره الى عايش جنب الارض ، وكان تاعبنا فى موضوع إيجار الارض ، بس سكتنا عليه نزولا على رغبة والدتى الله يرحمها
ثم توفيت والدتى من حوالى عام عليها رحمة الله واتكلمت انا واخواتى مع باقى اخوالى علشان كل واحد ياخد ارضه ونعمل بطاقة حيازة زراعية باسم كل واحد بنصيبه فى الارض ، ولكن خالى المتعب ده رفض مع اننا بقالنا اكتر من سنه بنحاول معاه ، ولكن لانه مستفيد من الوضع الحالى فمش عايز يمضى على ورقة ولا يعمل اى اجراء ولا عاوز يخلى الارض
وكمان والدى يمتلك ارض زراعية مسجلة باسمة بالشهر العقارى والسجل العينى والضرائب العقارية وله بطاقة حيازة زراعية عنها ومجاورة لارض والدتى وكان جدى لوالدتى الله يرحمه هو الى كان بيديرهاله ومن بعديه خالى المتعب وبرضه مش عاوز يخلى ارض والدى
فرحت الشهر العقارى والسجل العينى والضرائب العقارية وجبت اوراق الملكية الرسمية الى بإسم والدى ووالدتى ، ولما خالى المتعب ده عرف انى عملت كده فشاط واتغاظ بس انا مسألتش فيه على اعتبار انه مش ناوى على الخير ولا همه صلة الرحم وكل الى همه انه ميديش اى حد سهم واحد من الارض
فدلوقتى انا واخواتى عايزين نرفع قضية على خالى ده بخصوص
1-تسليم ارض والدى
2- تسليم ارض والدتى
3-نقل حيازة الارض الزراعية الخاصة بوالدتى
وسألت على المحامين لغاية موصلت لمحامى كويس إن شاء الله
بس انا عاوز اعرف قبل ما اروح للمحامى دهان كان فى حد عنده تجربة ، القضية دى تاخد قد أيه من الوقت وتتكلف كام
واذا كان فى اجراءات تانية ممكن تتعمل ضد خالى المتعب ده أتعبه بيها زى ما هو تاعبنا فياريت تفيدونى
