-
ليييه جايب مرسيدس
للأسف الموضوع ده كان ف دماغي أكتبه من أيام ما رحت التوكيل ف رمضان بس أهه الحمد لله الواحد فضي شوية..
الموضوع وما فيه اني رحت توكيل رينو ف سموحة.. ويا ريتني ما رحته..
نفس الاهمال بتاع أول مرة والعربية برضه بيطلعهالك برة وابقي اكشف انت عن ملحوظاتك اتعملت ولا لأ ماتقرفناش...
المهم بعض النكت اللي حصلت معايا:
1- طلبت أغير فيبرة اضائة الستوب اللي ورا عشان سايحة من حرارة اللمبة.. غيروهالي بواحدة تانية سايحة
2- لمبة الايرباج نورت بعد ما ف مرة العربية ضربت رصيف من الجنب (فاديت واحد علي سرعة عاليه بس كنت مضطر أخبط العجلة اللي قدام شمال ف الرصيف والاكصدام اتحك معاها).. المهم طلبت تظبيتها وكان الرد ان وحدة الايرباج كلها حاتتغير ب 1500 جنيه!!!!!!!!!!!!!!!!! طب معلش هو الايرباج ماضربش.. المهندسة قالتلي لأ طالما حس بخبطة خلاص كدة الوحدة كلها لازم تتغير!! بس برضه طب أهه حس بالخبطة برضه الايرباج ليه ماضربش؟ ع العموم انا ناوي أروح العامرية لو قالولي نفس الكلام حاطلع علي حماية المستهلك.. يعني ايه اغير وحدة الايرباج بالكارتة بتاعتها بالكامل وهي ماضربتش أصلا!!
3- الفحص بيقول تغيير ريدياتير حايعمل 2000 جنيه غير المصنعية!! كلمت المهندسة قلتلها مش ده ف الضمان؟ قالتلي لأ أصل فيه رجليت من اللي بيمسكوه تحت مكسورين! يعني مايتلحموش ولا يتغير كفر ولا أي حاجة؟ علي طول تغيير ريدياتير!! قلتلها لأ سيبيه انا حاعمله برة هو شكله توكيل بيستعبطنا أساسا (والحق يقال هي بنفسها اللي قالتلي مالهاش لازمة تغيره أساسا)
4- تابع نفس الخبطة.. الاكصدام محتاج يتغير وحايكلف.. مش فاكر بس فوق الباكو برضه... لييييييييييييييه!! أصله معووج لتحت شوية!!! طب يعني مثلا مافيش لحام فيبر ولا أي حاجة؟ دنا ألحم أو أعدل أي حتة ف الفيبر اللي ماسك الاكصدام وأمعجنه وأرشه من تاني ومش حايكلف 200 جنيه! ويمكن كمان أشيل اللون وأسيبه ع الاسود بتاعه قدام وورا والله شكلهم أروش مع العتب وكدة! (مع ملاحظة ان الخبطة دي من 4/2013 يعني بقالها داخل ف سنة ونص وعمر ما حاجة من اللي بيقولوا عليها دي عملت مشاكل)
المختصر المفيد.. توكيل رينو بيتعامل معانا اننا راكبين مرسيدس مش داتشيا اللي هم مجرد حاطين عليها علامتهم (عشان ماحدش يقولي فرنساوي والبقين دول لأ روماني علي فكرة).. أنا كنت بافكر جديا اني أصبر سنة ونص لما ان شاء الله تنزل اللوجان الاوتو وأبدل من التوكيل وادفع الفرق.. بس بالطريقة دي التوكيل بيستعبطنا رسمي.
-
كل التوكيلات كده .. و على فكره انت كده كويس .. أنا من 30 ألف كيلو بالضبط التوكيل في كل صيانة بيقول لي العربية عاوزة تيل و طنابير و أنا أقول له متغيرش .. و ماشي بيها 30 ألف كيلو و مفيش ولا ريجه ولا رجرجه مع الفرامل ولا حاجه .. الفكرة ان في شفه في الطنبورة و دي حاجه عادية جدا.
واحد صاحبي كان معاه كورسا سيدان كان مع كل صيانة بيغير الطنابير عشان التوكيل بيقول له غيرها عشان الشفه دي .. و الطنابير بالمصنعية ب 2000 جنية تقريبا .. مره خدت منه طقم طنابير كأنه جديد حطيته في عربيتي الكورسا.
الخلاصة التوكيلات بيغيروا بطريقة مبالغ فيها .. اه في حاجه اسمها صيانة وقائية و أنا فاهمها كويس و بعملها في حاجات كتير زي مثلا زيت الفتيس و زيت الموتور و سير الكاتينة .. بس المفروض يكون في نوع من التوازن ان في حاجات ممكن تتصلح بدون ما تؤثر على أداء القطعة .. زي عند حضرتك ايه المشكلة لما ألحم رجل الرادياتير .. أو أشيل شفة الطنبورة على المخرطة .. أو أريستارت ال error بتاع الايرباج.
و الله أنا بيصعب عليه لما بروح أعمل صيانة لما يكون في حد مبيفهمش في العربيات أو سيدة أو بنت مثلا أوي و المهندس يكلمه يقول له العربية عاوزه تغير كذا و كذا .. و يقول له ماشي غير .. و تلاقي قطع الغيار طالعه كأنها جديدة مافيهاش حاجه و ممكن تستخدم 50 ألف كيلو كمان بدون مشاكل.
Content Relevant URLs by
vBSEO 3.6.0 PL2