لو خبطك توك توك أو مكروباص .. هتعمل اية ؟!

السلام عليكم

كنت واقف مع واحد زميلي وكان راكن عربيتة قدامي وكنا بنتكلم .. جة توك توك .. كان هيخبطها .. بكل بروووووود ..

جيت أقول لزميلي حاسب التوك توك هيخبط العربية .. لقيت رد فعلة عادى خالص .. بقولة دة كان هيخبطها انت لية مافيش رد فعل ليك ..؟

قال . . هيحصل اية يعنى ؟ أروح اتخانق معاة ؟ طيب وبعدين .. مافي الاخر دمي هيتعكر بزيادة وفى النهاية بردة هروح اصلح العربية على حسابي .. انا من الاخر ما عدتش بهتم . اتخبطت .. ما اتخبطتش . ما عتش بهتم .. فى الاخر هبقى اصلح الانكسر ومش هقل من نفسي اكتر من كدة .

رأيكم اية ؟

وانت . لو خبط عربيتك .. توك توك او مكروباص .. هتعمل اية ؟. رد فعلك اية ؟

انا بصراحة على حسب الشخص اللي قدامي
انا في مرتين نزلت ضربت :d

طب مانت اذا خبطك اى حد اصلا مش هتاخد حاجه يبقى فرقت ايه !! مش شرط توك توك ولا ميكروباص

البلطجه بقت السمه الاساسيه فى مصر ، بس زمان كان البلطجى انضف بكتير من السرسجيه بتوع اليومين دول وعاملين بلطجيه

دلوقتى بقى عادى خالص لما تلاقى عيل 13 سنه سايق توكتوك ورايح يمين شمال وعمال يزنق ويخبط ف الخلق ولو كلمته هتلاقيه عامل سبع رجاله ف بعض

بص ، الواحد بيشوف بلاوى كل يوم ف الشارع سواء من التاكسيات او الميكروباصات او التوكتوك ، ولو اتخانق مع كل واحد مش هيخلص ، بس لما بتعرض لموقف من دا فى الشارع بيبقى على حسب المزاج والحاله بتعتى ، لو هادى ومبسوط هاخد حقى بكل برووود وبالحق هاخد اللى يرضينى ، لو مزاجى مش عال يبقى يوم اسود وخناق وفى الحاله دى بتنتهى لـ عناد والحق يضيع ف النص غالباً :)

عشان كدا بفضل اتعامل ببرود وهدوء ف المواقف اللى زى دى لحد ما اخد حقى من الاشكال الضاله دى

فى كل الحالات مش هتاخد حاجه بس لو انت عارف انك تقدر تضربه يبقى توكل على الله وكسره لان معظمهم اشكال ضاله الا من رحم ربى

يعنى هو زميل حضرتك مكسل ينبهه انه هايخبط العربيه ..
التنبيه يعنى مفيهوش حاجه

صاحبك دة متصالح مع نفسة ودة للاسف فى بلدنا لو حضرتك مش من اصحاب السلطة او الواسطة او بلطجى حقك بيضيع فعلى اية الانفعال نصبر لحد ما تتصلح او نهاجر ايهما اقرب

قدامي عربيه ديهاتسو هاتش بالك دخل فيها موتوسيكل من قدام جاي في المخالف كسره الفانوس وطبق الاكصدام والمنطقه اللي حول الفانوس كلها كرمشت والصاج اتعجن الناس اتلمت صاحب العربيه معاه مراته لا عرف ياخد اي حق مع الموتو سيكل قد يزعق ويتخانق وخلصه الليله علي كدا برود صاحبك عنده حق

البقاء للأقوى
إذا كنت شايف تقدر تاخد حقك ، أو على الاقل تكسر له التوكتوك أو الموتوسيكل يبقى العين بالعين
أما إذا كنت حاسس انك مغلوب ، يبقى طنش وخلاص

لو خبطك حد كبر دماغك وامشي ...... قبل كده واحد معاه نيسان صني اتزنق في الرصيف اللي على اليمين راح داخلي في العربية من عند الرفرف قبل الباب لغاية الباب اللي ورا ........ نزلت بصيت على العربية وقلتله امشي ربنا يستر طريقك بس الصراحة كان راجل محترم

علي حسب لو مش معاك حاجة اخرك تشتمه او تسيبه
إنما لو معايا حاجة اقدر ادافع بيها عن نفسي يبقي ليلته سودة خاصة لو سواق ميكروباص او توكتوك علشان دي ناس زبالة و اللي بقوله ده بسبب اللي بشوفه منهم

طلع ل ^$%% الطبنجه لو دفع خير وبركه ( من افسد شيء فعليه اصلاحه ) حبايب

مدفعش يبقى العين بالعين والسن بالسن والبادي اظلم

نفس التلفيات الي حصلت اعملهاله وفوقيهم كام خربوش

وعلى راي المثل وانا ماشي بيه

الي تعرف ديته اقتله

لو كل واحد عمل كده مش حيجي حتت عيل كلب سرسجي راكب ميكروباص ولا توكتوك وييخش فيك ويخسرك

1000 ولا 5000 جنيه بدون وجه حق بستعجب من الناس الي بتخاف وتقولك حرام غلبان

غلبان ولا زفت يتنيل يموت ويريحنا او يحترم نفسه ويمشي زي الاوادم عدل

وللأسف الاشكال الوسخه بقت ماليه مصر الا من رحم ربي

انا عــندي عربيتي عندي من المحرمات ان حد يجي جنبها . . . لو حد خربشها ممكن اتغابي عليه فيها
انما لو خبطه زي تك تك او ميكروباص .. بحكم خبرتي وتعاملي معاهم و اختلاطنا بشكل دايم يعتبر ف ميفرقش عندي هنزل واجيبه وادفع تمن كل حاجة ولو معوش اخده شخصيا يا احسسه اني هاخد منه التكتك لكن اأذيه واني اعمله مصيبه دي اخر الحلول مش ضعف بس لو عملت كده هبقي اخدت حقي رسمي بس عربيتي متصلحتش ف مستفتدش غير راحه نفسيه هحس ضعفها لو سكت وخليته يصلحها غصب عنه ف ممكن نخليه اخر حل لو لقيت مفيش فايده . . . ولو وصلت اني اخده و اروح للسمكري اخليه يصلحها ويفنشها وبعد ما يخلصها اقوله خد حسابك منه ساعتها بقي يحلبوا او يعصروا او يشغله عنده مش مشكلتي .. عشان انا مش شاري عربيه عشان واحد يخبطهالي واصلح انا .. و ع الخناق اهو اختبار نشوف مين نفسه اطول ومعنديش مانع اقعد اسبوع والغي كل اللي ورايا ...

من فترة لسة واحد كان صديقي كان بيحكيلي .. كان راكب ميكروباظ ترامكو .. ومرة واحدة الميكروباظ راح رامي على العربية اللانسر طبق الرفرف وكسر المراية .,,, صاحب العربية بكل هدووء نزل وفتح الشنطة وجاب ماصورة طويلة وبكل هدوء ومن غير ولا كلمة راح رازع البامسورة كسرله الازاز وراح واخد باعضة وركب عربيتة ومشي زز وفي حالة من الاسبهلال حصلت ساعتها للسواق ....

وانا من فترة واحد زيه راح رامي عليا ومريح على الاخير آل ايه كان عاوز يكرب واحد وانا كنت على يمينه ولحد اخر لحظة عمال اكلكسله وازعق وهو لا هو هنا .. رجت مخبطله على العربية .. وعينك ماتشوف الا النور .. شتيمة منه وزعيق وسب دين ووساخة على الاخر .. لسة هاقلوه انت بتبجح وهانزل لاقيت الناس اتلمت وخلاص يا عم اركب عربيتك وماحصلش حاجة والجو ده ... انا بصراحة كان معايا المدام وقصرت وقلت اخد باعضي وامشي وخلاص ...

من الاخر كده ..
انا رايي ان لو لا قدر الله حصل الموقف ده .. اخد باعضي وببرود وهدوء وكأن ولا حاجة حصلت ... لان في النهاية مش هاتعرف تاخد منه حاجة .. ولو فرضنا انك تقدر عليه وهاتنزل تضربه بمجرد انك تفش غلك فيه .. ففي النهاية برضو شتمته واتشتمت وضربته واتضربت وقليت من نفسك .. ياعني مش هاتطلع من الموضوع غير مقلل من نفسك ومبهدل نفسك وممكن كمان تتأخر على الشغل ...
وربنا يستر طريقنا جميعا ...

ههههههههههههههههههههههه

انا الميكروباص مخبطش العربية ..


الميكورباص طلع فوق العربية .


باختصار العربية كانت مركونه تحت البيت وانا كنت فى الشغل العربية نوعها فيات 128

البيت فى شارع رئيسى وانا كنت راكنها على ناصية الشارع الجانبى يمين من جوا ومحيطها و العربية شنطتها ناحية الشارع الرئيسى و فى عامود فى نص شنطة العربية يعنى لو حد حاول يدخل الشارع على الضيق حيخبط عربيته فى العامود ومش حيخبط عربيتى

المهم معرفش ايه اللى حصل الميكروباص كان ماشى فى الشارع الرئيسى طلع على الرصيف بتاع العمارة اللى هو ارتفاعه 30 سم تقريبا و كشر شجرة و تنى عمود الكهرباء و خبط العربية بتاعتى من ورا طبق الرفرف و القايم اللى ورا وكسر الازاز و عوج الشطة .


من الاخر مخدتش منه ولا حق ولا باطل و طلبت البوليس و الموضوع كبر ودفع غرامة لوزارة الكهرباء 2000 فورى علشان العمود و اتحبس لغاية بالليل و بعدين خرج المفروض انى اتابع القضية .

المهم العربية اتكلفت حوالى 3000 جنيه .

حسبى الله ونعم الوكيل فيه

اه نسيت اقول انى عربيتى اتسحبت على المرور علشان المحضر وفضلت هناك حوالى اسبوع .

وكان ليا موضوع سابق عن عربية بتاعة اخويا . اللى استفدته من الموقفين ان حتى لو انت المجنى عليه ممكن تدفع فلوس علشان تنجز الموضوع لانك حتدفع رشاوى للعساكر علشان تخرج العربية

اه نسيت اقول انى عربيتى اتسحبت على المرور علشان المحضر وفضلت هناك حوالى اسبوع .

وكان ليا موضوع سابق عن عربية بتاعة اخويا . اللى استفدته من الموقفين ان حتى لو انت المجنى عليه ممكن تدفع فلوس علشان تنجز الموضوع لانك حتدفع رشاوى للعساكر علشان تخرج العربية

بص يا باشا ربنا ما يعرض حد لانه يتخبط او يخبط حد
بس المفروض من اتلف شيئا فعليه اصلاحه بدون خناق او زعيق - الكلام دا طبعا فى المدينه الفاضله بس - اما هنا اخبط واجري او اخبط وانزل زعق واتخانق
حسبي الله ونعم الوكيل

مصر دولة فاشلة لا تطبق القانون
لو ليك حق فعلا هتصرف فلوس ومش هتاخد حقك

عمرى ما اخدت حقى بالقانون

الى استفدتة منكم فى الاخر . ان فية ناس اخرها هتنزل تضرب اللى خبطلك العربية .. يا اما فية ناس تانية تمشى

طيب والحل اية ياجدعان ... ما فى الحالتين خسارة .. لان الحل هو ان الى خبطلك حاجة يصلحها على حسابة .

وانك ما تفضلش كل شوية خناق فى الشارع ..

انا هقولكم حكاية جديدة خالص .. كنت مرة ماشي علي رجلي بدون عربية... و كنت بعدي علي طريق سريع ... فامكروباص خبطني .. و داس علي رجلي و كان غلطان علشان كان ماشي عكسي .. المهم السواق كان محترم و شالني من الارض و قاعد يقولي أنا أسف ورحنا المستشفي .. و قعد يقولي اي تكليف هدفعها ... المهم في ناس تبعي جت المستشفي لما لقت السواق راجل محترم و مخبطنيش و جري و كان عاوز يدفع تكليف العلاج .. خلاص قلت للسواق حصل خير و سبت الراجل

المهم بعد كدة دفعت تكليف علاج علي رجلي من فلوسي الشخصية حولي 1500 جنية و دة غير القعدة في البيت و الاألم بس كدة

المهم انا كنت علي كوبري اكتوبر عند الحتة المعلقة كدا اتجاه رمسيس...

الطريق كان كله واقف , بعدين مشي سنة و بعدين وقفنا تاني عادي لسة هتكلم مع اللي جانبي و القتلك دببب,,, مكروباص لبس فيا من ورا...

المهم نزلت بصيت لقيتلك الاكصدام راح طبعا و غطاء الشنة في حتة دخلت لجوة بس الحمد لله مسمعتش فالحوض و الرفارف...

جي ظابط الشرطة شاف الرخص و طبعا مكنتش معاه رخصت سواقة و اللي جنب السواق عمل نفسه انه هو اللي كان سايق, الظابط اداني رخصه و قلي انا لو خدت اجراء هحبسه و مش هتاخد منه حق ولا باطل المهم كلمت واحد صاحبي جالي و انا معايا رخص المكروباص و خدها و مشيت و رحت علي السمكري...

السمكري قلي 400 جم رد علي البارد و اكصدام جديد...
قلتله ابدا سمكر,, مفيش سعتين لقتلك الواد بتلع المكروباص عايز الرخص و بيعيطلي فالتليفون ,قلتله هتصلح هتاخد الرخص و قلتله التكلفة.. قعد يقلي انا غلبان و بتاع قتله مليش فيه,,

شوية و لقيته جبلي اكصدام جديد و جه و عايز يخلع من تمن السمكرة المهم انا كنت في حتتي و حاطط رجل علي رجل ولا اجدها بلطجي يعرف يخش حتتي في شبرا...

خلص الكلام مضيته وصل امانة بالمبلغ و مشيته...


خلاصة الكلام لو ليك حق خده, متتخنقش و اتصرف بحكمة و ربنا يسترها معنا كلنا..

ايوة علشان قاعد فى حتتك :) بس لو انت قاعد فى حتة تانية .. هتعمل ايةةة ؟

حسب الي قدامي والله لو اعتذر وعرف غلطه بسيبه لو بجح بقئ وقل ادبه يبق يستاهل بقئ الضرب

متابع :(

ساعات بشوف ان كلامه صح

علي حسب الموقف