فكرة مشروع مش محتاج راس مال كبير وربحه عالي . رأيكم ؟؟

**Mahmoud Naguib** · 18-08-2014 09:04 PM

محلات اي اللي هتغتت عليا !!
هو في محلات ف مصر أصلا بتبيع فشار ولآ غزل بنات !!

المشروع ده مش منتشر أبدا وأعتقد يعني مفيش منافسين أد كدة علشان يطلعلي مشاكل من وراهم !

كدة يمكن اللي توصلتله ف أفضل الأماكن هو كورنيش الزمالك وكلية فنون جميلة ف الزمالك والرحاب !

أنا عايز حد يدلني ع نادي كويس أو مجمع سينيمات مشهور علشان أضيفه للقايمة اللي هطلع عليها إن شاء الله قريب !

**M_samii** · 18-08-2014 09:39 PM

في مجمع سينيمات امريكانا بلازا في اكتوبر ده حلو جداا و ممكن بردو تشوف هايبر وان و ممكن تشوف نادي الرحاب حلو

**Mohamed.Raafat** · 18-08-2014 10:02 PM

مشروع جميل و ربنا يوفقك فيه بس حاول برضه انك واحدة واحدة توسع نشاطك و تزود حاجات تانية مع الفشار و غزل البنات
و بالنسبة للأماكن انت أحسن أماكن بتبقى الجناين المفتوحة خصوصا في الاجازات و الاعياد
بس خلى بالك من البلطجية و اللى بيحبوا يعملوا فردة عليك
و ربنا يبارك لك في مشروعك

**Mahmoud Naguib** · 18-08-2014 11:13 PM

M_samii شكرا جدا لحضرتك وربنا يوفق للخير

Mohamed.Raafat جناين مفتوحة زي إي مثلا ؟؟

**3mr Farrag** · 19-08-2014 01:43 AM

الفكره كويسه
بس انا ليا رأي مختلف في شويه حاجات
اولا سيبك من موضوع غزل البنات و الفشار و الحاجات ديه
لأنها هتحتاج مكان يبقي في اطفال اكثر و ده لأما في النوادي او المولات و السينمات و هنا هيكون صعب تقف من غير ايجار

ثانيا خلي العربيه طبعا شيك و معموله بشكل مبتكر ذي ما قولت بس الافضل علي موتسكل بشكل شيك علشان تعرف تتنقل بيها بسهوله بدون مشاكل

ثالثا خلي نشاطك في الاكل السريع هيبقي عليه اقبال اكثر من كل الناس اكثر ما يكون علي الاطفال و العائلات فقط

رابعا حاول تركز في المناطق الجديده او المدن الجديده اللي بيكون الخدمات مش كتير بس فيها مناطق تمركز و قهاوي و كافيهات او مناطق قديمه بس نضيفه ذي المعادي مثلا
او الكليات او الجامعات بس مش اي حاجه هتنفع اوي
لازم تكون حاجه محتاجه فعلا الموضوع ده و فيها نقص في الكافتريات
ذي ما قال حد علي الزمالك فيه هناك مدارس مستواها كويس و 3 كليات و معظمهم بيجيبوا اكلهم من بره

**zorg** · 19-08-2014 08:00 AM

مشروع جميل بس فعلا موضوع الاتاوات والبلطجة مشكلة

**Mahmoud Naguib** · 19-08-2014 10:02 AM

3mr Farrag مشكور ياعمرو بس الأكل السريع ده أعتقد موضوع كبير شوية عليا خلينا على أدنا نبدأ كدة وبعد كدة نفكر !!

zorg مفيش حاجة ياعم ان شاء الله أعتقد لو مكان راقي محدش هيبص لواحد بيبيع فشار يعني !!

**elhelwany188** · 19-08-2014 11:16 AM

السلام عليكم ورحمة الله وبركاته ...
جميل جدا انك فكرت بره الصندوق ...
ونصيحتى ليك ممكن تسأل فى حديقة الحيوان لان فيه كافتيريات هناك وممكن تقف جنب اى كافتيريا بايجار ....
هو مش مكان راقى بس عليه اقبال كبير طوال السنة ....
وربنا يوفقك ان شاء الله للى فيه خير ليك ....

**Mahmoud Naguib** · 19-08-2014 11:21 AM

elhelwany188 فكرت ف المكان ده برضه بس مش عارف حاسس ان في أفضل

طب اي رأيك ف الأزهر بارك ؟؟؟

**bekatcho** · 19-08-2014 04:01 PM

عندى اقتراح ليك حلو اوى وخصوصا الفترة الى جاية
انت شاب ومش عايز تهين نفسك
وبتعتمد على الشباب
وانت صح
طيب اية رايك فى الجامعات الخاصة
يعنى عندك مثلا فيوتشر اكاديمى فى ميدان الحجاز
والقلق واللبش هناك قليل جدا
وطبعا المكان طبيعته مستوى عالي
تقدر تقف هناك من نحية عمر افندى وماحدش هيضايقك
وعندك مودرن اكاديمى على الدائرى ودى كانت جامعتى
عايز اقولك 90% من الطلاب كنا بنسيب الكافتيريا ونطلع برة الجامعة من ورا
كان فى شوية شباب عاملين كشك مشروبات وساندوتشات بطاطس وكدة
برضو لو عرفت تظبط مكان هناك هيبقى حلو ليك
ممكن تروح لادارة الجامعة لو مودرن وتتافهم معاهم علشان تقدر تدخل وتقف قدام الجامعة
وصدقنى المكانين دول لو جربتهم هيمشو معاك حلو اوى اوى اوى فى فترة الجامعة والدراسة